ފޭދޫ ސްކޫލްގައި ކުރިއަށްދާ ބޭސިކް ކެޑޭޓް ކޭމްޕްގެ ތެރެއިން ގިނަ އަދަދެއްގެ ކުދިންތަކެއް ހޮޑުލެވި ބޭރަށް ހިންގާތީ ފަރުވާ ދެނީ!
24 އޯގަސްޓު 2026 | ހޯމަ 14:09ފޭދޫ ސްކޫލްގެ ކެޑޭޓް ކޭމްޕްގެ ގިނަ ދަރިވަރުންތަކަކަށް ކާނާ ވިހަވެގެން ފަރުވާދޭން ފެށުމާ ގުޅިގެން، އެޗްއާރްސީއެމުން އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަން ވަނީ ފަށާފައި. މި ހާދިސާގައި 31 ކުއްޖަކަށް އެކި ހޮސްޕިޓަލްތަކުގައި ފަރުވާ ދެމުންދާއިރު، އެއްވެސް ކުއްޖެއްގެ ހާލު ސީރިއަސް ނޫން ކަމަށް މައުލޫމާތު ލިބޭ
އައްޑޫ ސިޓީ، އެކުއެޓޯރިއަލް ހޮސްޕިޓަލް. މި ހޮސްޕިޓަލްގައި 7 ކުއްޖަކަށް ދަނީ ފަރުވާ ދެމުން
އައްޑޫ ސިޓީ ފޭދޫގައި ހުންނަ ފޭދޫ ސްކޫލްގައި ކުރިއަށްދާ ބޭސިކް ކެޑޭޓް ކޭމްޕްގެ ތެރެއިން ގިނަ އަދަދެއްގެ ކުދިންތަކެއް ހޮޑުލެވި ބޭރަށް ހިންގާތީ ފަރުވާ ދޭން ފަށައިފި އެވެ.
ހޯމަ ދުވަހު ރާއްޖެއެމްވީއަށް މައުލޫމާތުދިން ބެލެނިވެރިއެއް ބުނީ، މި ކެންޕްގައި ގިނަ އަދަދެއްގެ ކުދިންތަކެއް ކާނާވިހަވި ކަމަށް ބެލެވޭ ކަމަށެވެ. އަދި މި މައްސަލަ ދިމާވީ ހޯމަ ދުވަހުގެ ހެނދުނުގެ ވަގުތެއްގައި ކަަމަށެވެ.
ހޮޑުލެވި، ބޭރަށް ހިންގާތީ ފޭދޫ ސިއްހީ މަރުކަޒުގައި 12 ކުދިންނަށް އަދި މަރަދޫ ސިއްހީ މަރުކަޒުގައި 12 ކުދިންނަށް އެޑްމިޓްކޮށްގެން ފަރުވާ ދެމުން އަންނަ ކަމަށާއި، އައްޑޫ އިކުއިޓޯރިއަލް ހޮސްޕިޓަލުގައި 7 ކުއްޖަކަށް ފަރުވާ ދެމުން އަންނަ ކަމަށް މައުލޫމާތު ލިބެ އެވެ.
ފަރުވާ ދެމުން އަންނަނީ އެ ސްކޫލުގެ ގްރޭޑް 7 އަދި 8 ގެ ދަރިވަރުންތަކަކަށްވާއިރު، އެއްވެސް ކުއްޖެއްގެ ހާލަ ސީރިއަސް ނޫން ކަމަށް ވެސް މައުލޫމާތު ލިބެ އެވެ.
އައްޑޫ އިކުއަޓޯރިއަލް ހޮސްޕިޓަލް (އޭއީއެޗް) އިން ބުނީ މަޑުމަޑުން ކުދީންގެ ހާލަތު ރަނގަޅުވަމުން އަންނަ ކަމަށާއި، ފަރުވާ ދެމުންދާ ކުދީންގެ ފަރާތުން ފެންނަނީ އެއްކަހަލަ އަލާމާތްތަކެއް ކަމަށެވެ. އެއީ ބޭރަށްހިންގުމާއި ހޮޑުލެވުމުގެ އިތުރުން ބަނޑުގައި ރިއްސުން ކަމަށް އެ ހޮސްޕިޓަލުން ބުނެފައިވެ އެވެ. ނަމަވެސް މި މައްސަލަ ދިމާވި ސީދާ ސަބަބެއް ހާމަކޮށްފައިނުވެ އެވެ.
މީގެ އިތުރުން މި މައްސަލައާ ގުޅިގެން އެކްސްގައި އެޗްއާރްސީއެމުން ބުނީ، އައްޑޫ ސިޓީ ބޭސިކް ކެޑޭޓް ކޭމްޕުގައި ބައިވެރިވި ދަރިވަރުން ކާނާ ވިހަވެ ބައެއް ކުދިން ހާލުދެރަވެ ހޮސްޕިޓަލުގައި އެނދުމަތިކުރަން ޖެހުމަކީ އެ ކޮމިޝަނުން ނުހަނު ކަންބޮޑުވާ ކަމެއް ކަމަށެވެ. އަދި މި ހާދިސާ މޮނިޓަރކުރަމުންދާ ކަމަށް އެ ކޮމިޝަނުން ބުނެފައިވެ އެވެ.
މިކަން ހިނގާދިޔަ ގޮތް ހައްސާސް މައްސަލައެއްގެ ގޮތުގައި ތަހުގީގު ކުރާނެކަން ފާހަގަކޮށް އެޗްއާރްސީއެމުން ބުނީ، މިބާވަތުގެ ކަންކަން ތަކުރާރު ނުވާނޭ ގޮތެއްގެ މަތިން ކަމާބެހޭ އިދާރާތައް ކަންކަން ބައްޓަންކޮށް، ބަލަހައްޓަން ޖެހޭ ކަމަށެވެ.
ރާއްޖޭގެ ހުރިހާ ސަރުކާރު ސްކޫލެއްގައި މިހާރު ދަނީ ކޭމްޕްތައް ހިންގަމުންނެވެ. އަދި މަދުން ނަމަވެސް މިފަދަ ހާދިސާތައް ހިނގަމުންދިއުމަކީ ބަލައިގަނެވޭނެ ކަމެއް ނޫން ކަމަށާއި މިއީ ކަންބޮޑުވާ ބޮޑު މައްސަލައެއް ކަމަށް ގިނަ ބެލެނިވެރިން ދަނީ ބުނަމުންނެވެ.
