އިނގިރޭސިވިލާތުގެ ރާނީ އެލިޒަބަތު ތުއްޕުޅު ދުވަސްވަރު އަތްޕުޅުން ލިޔުއްވާފައިވާ ސިޓީއެއް ނީލަން ކިޔުމަށް ތައްޔާރުވެއްޖެ

އިނގިރޭސިވިލާތުގެ ރާނީ އެލިޒަބަތު ދެވަނަ ތުއްޕުޅު ދުވަސްވަރު އަމިއްލަފުޅު އަތްޕުޅުން ލިޔުއްވާފައިވާ ސިޓީއެއް ނީލަން ކިޔުމަށް ތައްޔާރުވެއްޖެއެވެ. މި ސިޓީ ނީލަމުގައި 4،000 ޕައުންޑަށް ވުރެ މަތީ އަގަކަށް ވިކޭނެ ކަމަށް ބެލެވެ އެވެ.

ވިންޑްސަރގައި ހުންނަ ރޯޔަލް ލޮޖްގެ ހެޑް ހައުސްމެއިޑް އަށް އެޑްރެސްކޮށް ލިޔުއްވާފައިވާ މި އެއް ސަފުހާގެ ސިޓީގައި ކުއްތާއާއި، އަހާއި އަދި ކުޑަކުދިންގެ ކުރެހުންތައް ހިމެނެއެވެ. އަދި އެ ސިޓީގައި "ދޫނިތަކުގެ ހާލު ރަނގަޅުތޯއާއި، ގޯލްޑްފިޝްތައް މަރުނުވޭތޯ" ރާނީ ސުވާލު ކުރައްވާފައިވެއެވެ.

ނީލަން ކިޔާ ފަރާތުން ބުނި ގޮތުގައި، އޭރުގެ ޕްރިންސަސް އެލިޒަބަތު މި ސިޓީ ލިޔުއްވާފައިވަނީ 1936 އާއި 1940 އާ ދެމެދުގެ ދުވަސްވަރެއްގައި ކޯންވޯލްގެ ޕްރާ ސޭންޑްސްގައި ހުންނަވަނިކޮށެވެ. އެއީ އެކަމަނާގެ އުމުރުފުޅުން 10 އަހަރާއި 12 އަހަރާ ދެމެދުގެ ދުވަސްވަރެވެ.

ޕެންސްހަރސްޓްގައި މި ސިޓީ ނީލަން ކިޔުމުގެ މަސައްކަތް ކުރަމުންދާ ހެންސަންސް އޮކްޝަނިއާސްގެ ޖަސްޓިން މެތިއުސް ބުނީ، ބައިނަލްއަގުވާމީ ނީލަމުގެ ދާއިރާގައި އޭނާ ހޭދަކުރި 27 އަހަރުގެ ތެރޭގައި މިހާ ސަޅި އެއްޗެއް ދުވަހަކުވެސް ފެނިފައިނުވާ ކަމަށެވެ.

މި ފެބްރުއަރީ މަހުގެ 27 ވަނަ ދުވަހު ނީލަން ކިޔުމަށް ހަމަޖެހިފައިވާ މި ސިޓީގައި، މިހާރު އަވަހާރަވެފައިވާ ރާނީ ބިންނަވާފައިވާ "ޕްރިމްރޯސް" މާތަކެއްގެ ވާހަކަވެސް ފާހަގަކުރައްވާފައިވެ އެވެ. އަދި އެ މާތައް ރޯޔަލް ލޮޖްގެ މުވައްޒަފުންގެ މެދުގައި ބެހުމަށް އެކަމަނާ އެދިވަޑައިގެންފައިވެ އެވެ.

މި ސިޓީއަކީ ރޯޔަލް ލޮޖްގެ ކުރީގެ ހެޑް ހައުސްމެއިޑް ބިއެޓްރިސް ސްޓިލްމަން އަށް އެޑްރެސްކޮށް ފޮނުވާފައިވާ ސިޓީތަކުގެ ތެރެއިން ފެނުނު ސިޓީ އެކެވެ.