ސީއެޗްއެސްއީ މާލެ އިން ޑައިމަންޑް ޖުބިލީ މުބާރާތް ކާމިޔާބު ކޮށްފި

ރާއްޖޭގެ ފުޓުބޯޅަ އަށް 75 އަހަރު ފުރުން ފާހަގަ ކުރުމުގެ ގޮތުން، 19 އަހަރުން ދަށަށް ކުރިއަށް ގެންދިޔަ ޑައިމަންޑް ޖުބިލީ އިންވިޓޭޝަނަލް މުބާރާތުގެ ޗެމްޕިއަންކަން ސީއެޗްއެސްއީ މާލެ އިން ހޯދައިފި އެވެ.

އާދީއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗުގައި ސީއެޗްއެސްއީ މާލެ އިން ވާދަކޮށްފައި ވަނީ އަހުމަދިއްޔާ އިންޓަނޭޝަނަލް ސްކޫލްއާ އެވެ. ފައިނަލް މެޗުގައި ސީއެޗްއެސްއީ މާލެ އިން ވަނީ 4-1 އިން އަހުމަދިއްޔާގެ މައްޗަށް ކުރި ހޯދައިފަ އެވެ. މެޗުގައި ދެ ޓީމުން ވެސް ލަނޑުތައް ޖެހީ ދެ ވަނަ ހާފުގަ އެވެ.

މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ސީއެޗްއެސްއީ މާލެ އަށް ލީޑު ނަގައިދިނީ އަޙުމަދު މިކްޔަލް މުއީން އެވެ. އޭގެ ފަހުން މެޗުގެ 65 ވަނަ މިނެޓުގައި އަހުމަދިއްޔާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އަހުމަދިއްޔާ އަށް ޖަހައިދިނީ އަލީ އަލާން އަޝްރަފް އެވެ.

އަހުމަދިއްޔާ އިން ނަތީޖާ ހަމަހަމަ ކުރިތާ ތިން މިނެޓުގެ ތެރޭގައި ސީއެޗްއެސްއީ މާލެ އިން ދެ ވަނަ ފަހަރަށް ލީޑު ނެގި އެވެ. އެއީ އިސްމާއީލް ޝާމިލް ޖެހި ލަނޑުންނެވެ. އޭގެ ފަހުން މެޗުގެ 71 ވަނަ މިނެޓުގައި ސީއެޗްއެސްއީ މާލޭގެ ތިން ވަނަ ލަނޑު ޖެހީ މުޙައްމަދު ސާއިމް އިބްރާހީމް ފާއިޒް އެވެ. އަދި މެޗުގެ 82 ވަނަ މިނެޓުގައި އެ ޓީމުގެ ފަހު ލަނޑު ޖެހީ މިކްޔަލް އެވެ. 

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން މި މުބާރާތް ކުރިއަށް ގެންދިޔައީ ހަތަރު ޓީމުގެ މެދުގަ އެވެ. އެގޮތުން ކޮންމެ ޓީމެއް ކޮންމެ ޓީމަކާ ކުޅުމަށް ފަހު، އެއް ވަނަ ޓީމާއި ދެ ވަނަ ޓީމަށް ވަނީ މުބާރާތުގެ ފައިނަލްގެ ޖާގަ ލިބިފަ އެވެ.