މަޝްހޫރު ނޯބޫ އިން ލ. އަތޮޅުގައި ޒަމާނީ ރިސޯޓެއް ތަރައްގީ ކުރަން ނިންމައިފި
ލާމު އަތޮޅު މުންނަފުށީގައި ތަރައްގީކުރާ މި ރިސޯޓުގައި، ޖުމްލަ 56 ވިލާގެ އިތުރުން "ނޯބޫ އައިލެންޑް އެސްޓޭޓް ރެސިޑެންސަސް" ގެ ނަމުގައި އަމިއްލަ ރަށްތަކެއްގައި ހުންނަ 10 ރެސިޑެންސް ހިމެނޭ. ޖަޕާނުގެ ސަގާފަތާއި ގުދުރަތީ ރީތިކަން ފެންނަ ގޮތަށް ފަރުމާކޮށްފައިވާ މި ފެސިލިޓީ ގައި، ދުނިޔޭގެ ފެންވަރުގެ ރެސްޓޯރަންޓްތަކާއި، ސްޕާ އަދި ޕްރައިވެޓް ޔޮޓް ފަދަ ލަގްޒަރީ ޚިދުމަތްތައް ލިބިގެންދާނެ ކަމަށް ބުނޭ.
ނޯބޫ މޯލްޑިވްސް | ނޯބޫ
ނޯބޫ ހޮސްޕިޓާލިޓީން، ލާމު އަތޮޅުގެ ފަޅުރަށެއް ކަމަށްވާ މުންނަފުށީގައި "ނޯބޫ ހޮޓެލް، ރެސިޑެންސަސް އެންޑް ރެސްޓޯރަންޓް މޯލްޑިވްސް" ހުޅުވަން ނިންމާފައިވާކަން އެ ކުންފުނިން އިޢުލާންކޮށްފި އެވެ. ސަރަޓް އިންޓަރނޭޝަނަލްއާ ގުޅިގެން ކުރިއަށްގެންދާ މި މަޝްރޫޢަކީ ނޯބޫ ބްރޭންޑުން ދިވެހިރާއްޖޭގައި ކުރިއަށް ގެންދާ ފުރަތަމަ މަޝްރޫޢެވެ.
ނޯބޫ ހޮސްޕިޓާލިޓީ އަކީ މުޅި ދުނިޔެއަށް މަޝްހޫރު ލަގްޒަރީ ލައިފްސްޓައިލް ބްރޭންޑެކެވެ. މި ބްރޭންޑް އުފެއްދެވީ މަޝްހޫރު ޝެފް ނޯބޫ މަޓްސުހިސާ އާއި، އެކްޓަރު ރޮބަޓް ޑި ނީރޯގެ އިތުރުން ފިލްމު ޕްރޮޑިއުސަރު މެއިރ ޓެޕާ އެވެ. 1994 ވަނަ އަހަރު ނިއުޔޯކްގައި ހުޅުވި އެންމެ ޖަޕަނީޒް-ފިއުޝަން ރެސްޓޯރެންޓަކުން ފެށި މި މަސައްކަތް، މިއަދު ވަނީ ދުނިޔޭގެ ފަސް ބައްރަކަށް ފެތުރި، ލަގްޒަރީ ހޮޓާތަކާއި، ރެސްޓޯރެންޓްތަކުގެ އިތުރުން އަމިއްލަ ރެސިޑެންސްތައް ހިމެނޭ ބޮޑު ހޮސްޕިޓާލިޓީ ވިއުގައަކަށް ބަދަލުވެފަ އެވެ.
ނޯބޫ އިން ތަރައްގީކުރާ މި ރިސޯޓުގައި، އެއް ކޮޓަރި އަދި ދެ ކޮޓަރީގެ 26 ބީޗް ވިލާގެ އިތުރުން، އެއް ކޮޓަރި އަދި ދެ ކޮޓަރީގެ 30 އޯވަަރވޯޓަރ ވިލާ ހިމެނޭނެއެވެ. މި ކޮންމެ ތަނަކުން ވެސް ފެނިގެންދާނީ ނޯބޫ ބްރޭންޑަށް ޚާއްޞަ، ސާދާ ފަރުމާތަކާއި، ގުދުރަތީ ސިފަތަކުގެ އިތުރުން، އަމިއްލަވަންތަކަމާއި މުއްސަނދިކަން ރަމްޒުކޮށްދޭ ހިތްފަސޭހަ ކުލަތައް ކަމަށް ކުންފުނިން ނެރުނު ބަޔާނެއްގައިވެ އެވެ.
މި މަޝްރޫޢުގެ އެންމެ ތަފާތު ސިފައަކީ "ނޯބޫ އައިލެންޑް އެސްޓޭޓް ރެސިޑެންސަސް" ގެ ނަމުގައި ތަރައްގީކުރާ، ކޮންމެ ރެސިޑެންސެއް ވަކި އަމިއްލަ ރަށެއްގައި ހުންނަ ގޮތަށް ފަރުމާކޮށްފައިވާ 10 ރެސިޑެންސެވެ. މިއީ ރާއްޖޭގައި އަމިއްލަ ރަށެއްގެ މިލްކުވެރިކަން ހޯދުމަށް ލިބޭނެ ވަރަށް މަދު އަދި އެހާމެ އަގުހުރި ފުރުޞަތެއް ކަމަށް އެ ކުންފުނިން ބުނެ އެވެ. މި ރެސިޑެންސަސްތަކުގެ ވެރިންނަށް ނޯބޫގެ ދުނިޔޭގެ ފެންވަރުގެ މެހެމާންދާރީ އާއި، ކެއިންބުއިމުގެ ޚިދުމަތްތަކާއި، ރިސޯޓުގެ އެހެނިހެން ވަސީލަތްތައް ފަސޭހަކަމާއެކު ބޭނުންކުރެވޭނެ ކަމަށް ވެސް ބުނެފައިވެ އެވެ.
ކޮންމެ "ނޯބޫ އައިލެންޑް އެސްޓޭޓް ރެސިޑެންސް" އަކުން ވެސް ނޯބޫގެ މުއްސަނދި ދިރިއުޅުން ތަޖުރިބާކޮށްލެވޭނެ އެވެ. އެގޮތުން، ލަގްޒަރީ ކޮޓަރިތަކާއި ފާޚާނާތަކުގެ އިތުރުން، މުނިފޫހިފިލުވުމަށް ޚާއްޞަ ތަނަވަސް ޕެވިލިއަން ސްޓައިލްގެ ލިވިންގ އަދި ޑައިނިންގ އޭރިއާތަކާއި، މޫދަށް ސީދާ ފޭބޭ ގޮތަށް ހުންނަ އަމިއްލަ ގޮނޑުދޮށްތައް ހިމެނެއެވެ. މީގެ އިތުރުން، ކޮންމެ ރެސިޑެންސަކަށް ޚާއްޞަ ޕްރައިވެޓް ޔޮޓެއް އޮންނާނެއެވެ. އިންޑިއާ ކަނޑުގެ ހިތްގައިމު މަންޒަރުތައް ފެންނަ މި ރެސިޑެންސަސްތަކުގެ ވެރިންނަށް ފުރިހަމަ މިނިވަންކަމާއި އަމިއްލަވަންތަކަން ލިބިގެންދާއިރު، ކުޑަ ވަގުތުކޮޅެއްގެ ތެރޭގައި ލޯންޗެއްގައި ރިސޯޓުގެ ރެސްޓޯރަންޓްތަކާއި، ސްޕާ، ފިޓްނަސް ސެންޓަރު އަދި އެހެނިހެން ޚިދުމަތްތަކަށް ދެވޭނެ އެވެ.
މި ރިސޯޓުގެ އެންމެ މުހިންމު އެއް ވަސީލަތަކީ ވަކި ރަށެއްގައި ހުންނަ، ލައުންޖް ހިމެނޭ ނޯބޫ ރެސްޓޯރަންޓެވެ. މިތަނުން ޝެފް ނޯބޫގެ މަޝްހޫރު "ޖަޕަނީޒް ޕެރޫވިއަން" ކާއެއްޗެހި ލިބެން ހުންނާނެއެވެ. މީގެ އިތުރުން، ފުރިހަމަ ޚިދުމަތްދޭ ސްޕާއަކާއި، އެންމެ ޒަމާނީ ފިޓްނަސް ވަސީލަތްތަކާއި، ޑައިވިންގ ސެންޓަރާއި، ޓެނިސް ކޯޓުތަކާއި، އިވެންޓްތައް ބޭއްވުމަށް ޚާއްޞަ ތަންތަނުގެ އިތުރުން، ހިތްފަސޭހަ ސްވިމިންގ ޕޫލު ވެސް ހިމެނެއެވެ. ރިސޯޓުގެ އާކިޓެކްޗަރާއި އިންޓީރިއާ ފަރުމާކޮށްފައިވަނީ ޖަޕާނުގެ ސަގާފަތުން އިންސްޕިރޭޝަން ހޯދައިގެން، ރަށުގެ ގުދުރަތީ ރީތިކަމާއި ކަނޑުގެ މަންޒަރުތަކާ ގުޅޭނެ ފަދަ ޒަމާނީ ގޮތަކަށެވެ.
ނޯބޫ އިން ތަރައްގީ ކުރާ މި ފެސިލިޓީ އޮންނަނީ ލ. އަތޮޅުގެ ހުޅަނގު ބިތުގައި އޮންނަ މުންނަފުށި ކިޔާ ކުޑަ ރަށެއްގެ ވަށައިގެންނެވެ. މި ރަށަށް ޒިޔާރަތްފުށިވެސް ކުރިން ކިޔާ އުޅުނެވެ.
