ހުކުމް ތަންފީޒު ކުރަމުންދަނިކޮށް މިމަހު މަރުވި ދެ މީހުންގެ ހަށިގަނޑު އޮޓޮޕްސީ ހެދުމަށް އިންޑިއާއަށް ފޮނުވައިފި
ޖަލުގައި މަރުވާ މީހުންގެ އޮޓޮޕްސީއެއް ހަދަން މަޖުބޫރުކޮށް އުސޫލެއް މިސަރުކާރުން ހަދާފައިވާތީ، ފުލުހުން ވަނީ ދެ މީހުންގެ ހަށިގަނޑުގެ އޮޓޮޕްސީ ހެދުމަށް ނިންމާފައި. ނަމަވެސް ދެ އާއިލާގެ ފަރާތުން ވަނީ އެކަމާ ދެކޮޅު ހަދާފައި.
ހުޅުމާލޭ ޖަލު، ދެ ގައިދީން ވެސް ހުކުމް ތަންފީޒު ކުރަމުން ދިޔައީ ހުޅުމާލޭ ޖަލުގައި | ސަން އޮންލައިން
މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ ބެލުމުގެ ދަށުގައި ހުކުމް ތަންފީޒު ކުރަމުންދަނިކޮށް މިމަހު މަރުވި ދެ މީހުންގެ ހަށިގަނޑު އޮޓޮޕްސީ ހެދުމަށް އިންޑިއާއަށް ފޮނުވައިފި އެވެ.
ފެބްރުއަރީ މަހުގެ 02 ވަނަ ދުވަހު އެމްސީއެސްގެ ހުޅުމާލޭ ޖަލުގައި ދިގު ހުކުމެއް ތަންފީޒު ކުރަމުންދިޔަ ސ. ހިތަދޫ، ދިއްގާގަސްދޮށުގެ / 45 އަހަރުގެ ހަސަން ނިޔާޒް، ހުޅުމާލޭ ހޮސްޕިޓަލްގައި ފަރުވާ ދެމުން ދަނިކޮށް މަރުވެފަ އެވެ. އަދި ހަމަ އެ ދުވަހު އެމްސީއެސްގެ ހުޅުމާލޭ ޖަލުގައި ހުކުމް ތަންފީޒު ކުރަމުންދިޔަ ދަފްތަރު ނރ. 439 / 53 އަހަރުގެ އިބްރާހިމް ސުޙެއިލް، އައިޖީއެމްއެޗްގައި އެޑްމިޓްކޮށްގެން ފަރުވާ ދެމުން ދަނިކޮށް ވަނީ މަރުވެފަ އެވެ.
ޖަލުގައި މަރުވާ މީހުންގެ އޮޓޮޕްސީއެއް ހަދަން މަޖުބޫރުކޮށް އުސޫލެއް މިސަރުކާރުން ހަދާފައިވާތީ، ފުލުހުން ވަނީ ދެ މީހުންގެ ހަށިގަނޑުގެ އޮޓޮޕްސީ ހެދުމަށް ނިންމާފަ އެވެ. ނަމަވެސް ދެ އާއިލާގެ ފަރާތުން ވަނީ އެކަމާ ދެކޮޅު ހަދާފަ އެވެ.
މިކަމާ ގުޅޭގޮތުން ރާއްޖެއެމްވީން ފުލުހުންގެ މީޑިއާ އޮފިޝަލްއާ ސުވާލު ކުރުމުން ވިދާޅުވީ، ނިޔާޒާއި ސުހެއިލްގެ ހަށިގަނޑު އޮޓޮޕްސީ ހެދުމަށް 11 ފެބްރުއަރީ 2026 ވަނަ ދުވަހު އިންޑިއާ އަށް ގެންގޮސްފައިވާ ކަމަށެވެ. އަދި އޮޓޮޕްސީ ހެދުމަށްފަހު ހަށިގަނޑު ރާއްޖެ ގެންނާނެ ކަމަށާއި، އޭގެފަހުން އާއިލާއަށް ހަށިގަނޑު ހަވާލު ކުރާނެ ކަމަށެވެ.
މައުލޫމާތު ލިބޭގޮތުގައި ނިޔާޒު ހުޅުމާލެ ޖަލުގައި މަރުވީ ހުކުމް ތަންފީޒުކުރަން ފެށިތާ ހަފްތާއެއް ނުވަނީހެވެ. އޭނާ ގޮޅީގެ ފާހާނާ ތެރޭގައި ވެއްޓިފައި އޮއްވާ ފެނުނުއިރު، ކޮންމެވެސް ވަރެއްގެ ޒަހަމްތަކެއް ހަށިގަނޑުގައި ހުރި ކަމަށް އާއިލާއާ ހަވާލާދީ ބައެއް މީީޑިއާތަކުގައި ރިޕޯޓު ކޮށްފައިވެ އެވެ.
މީގެ އިތުރުން ސުހައިލް މަރުވީ، އައިޖީއެމްއެޗްގައި ނިއުމޯނިއާއަށް ފަރުވާ ހޯދަމުން ދަނިކޮށް، ހާލު ދެރަވެގެން ކަމަށް ބުނެފައިވެ އެވެ. އަދި އޭނާ އަކީ 2025 ވަނަ އަހަރު ސްޓްރޯކެއް ޖެހިގެން ވެސް، އެކަމަށް ފަރުވާ ހޯދަމުން އައިމީހެއް ކަމަށް އެމްސީއެސްއިން ބުނެ އެވެ.
