ބްރެޒިލްގެ ފިރިހެނަކު 24 ގަޑިއިރު ޓްރެޑްމިލްގައި ދުވެގެން ރެކޯޑެއް ހަދައިފި
އަމިއްލަ ނަފްސާނީ އަދި ޖިސްމާނީ ގާބިލިއްޔަތު އިމްތިހާނުކުރުމަށް ޝައުގުވެރިވާ މި ދުވުންތެރިޔާ މީގެ ކުރިން ވެސް ވަނީ އުނދަގޫ ހާލަތްތަކުގައި ދުވެގެން ދުނިޔޭގެ ރެކޯޑުތައް މުގުރާލާފައި. އޭނާ މި ފަހަރުގެ ގޮންޖެހުން ކުރިމަތިލީ އެއް ތަނެއްގައި ހުރެގެން ދުވުމަކީ އޭނާ އެންމެ ފޫހިވާ ކަންތައް ކަމަށްވާތީ، އެކަން ބަދަލުކުރުމުގެ މަގުސަދުގައި.
ބްރެޒިލްގެ ރިއޯ ޑި ޖެނީރޯގައި ހުންނަ ހާމަ ފިޓްނަސް ސެންޓަރެއްގައި ބެހެއްޓިފައި ހުރި ޓްރެޑްމިލެއްގައި، ޕެޕޭ ފިއަމޮންސިނީ 188 ކިލޯމީޓަރު (116 މޭލު) އަށް ވަނީ ދުވެފައި. | އޭއެފްޕީ
ކުޅިވަރުގެ ރެކޯޑުތައް މުގުރާލުމަށް ޝައުގުވެރިކަން ހުންނަ ބްރެޒިލްގެ ފިރިހެނަކު، އޭނާއަށް ތަސައްވަރު ކުރެވުނު އެންމެ ފޫހި ޗެލެންޖް ކަމަށްވާ 24 ގަޑިއިރު ވަންދެން ޓްރެޑްމިލްއެއްގައި ދުވުމުގެ ރެކޯޑު ބުރާސްފަތި ދުވަހު މުގުރާލައިފި އެވެ.
ޕެޕޭ ފިއަމޮންސިނީ ވަނީ ރިއޯ ޑި ޖެނީރޯގެ އިޕަނެމާ ބީޗުގައި ހުންނަ އައުޓްޑޯ ޖިމެއްގައި ހުރި ޓްރެޑްމިލްއެއްގައި 188 ކިލޯމީޓަރު (116 މޭލު) ދުވެފައެވެ. މިއީ ގާތްގަނޑަކަށް ހަތަރު މެރަތަންގެ ރޭހަށްވުރެ ވެސް ދިގު ރާސްތާއެކެވެ.
ލައިވް ސްޓްރީމް މެދުވެރިކޮށް މި ހަރަކާތް ބެލި އޮފިޝަލުން މި ކަން ކަށަވަރުކުރުމުން، މިއީ އޭނާ ހޯދާ ތިންވަނަ ގިނިސް ވޯލްޑް ރެކޯޑަށް ވެގެންދާނެ އެވެ.
އުމުރުން 35 އަހަރުގެ ފިއަމޮންސިނީ މި ދުވުމުގެ ތެރޭގައި މެދުކަނޑާލާފައި ވަނީ ހަމައެކަނި ޓެނިސް ބަދަލުކުރުމަށާއި ފާޚާނާއަށް ދިއުމަށް ނެގި ކުރު ވަގުތުކޮޅުތަކުގަ އެވެ.
އޭއެފްޕީ ނޫހަށް މައުލޫމާތު ދެމުން ފިއަމޮންސިނީ ބުނީ އޭނާއަކީ އަމިއްލަ ގާބިލިއްޔަތު ހުރި މިންވަރު ބަލަން ބޭނުންވާ، އާ ކަންކަން ތަޖުރިބާކުރަން ޝައުގުވެރިވާ މީހެއް ކަމަށެވެ. އޭނާ ކުޅިވަރުގެ ތެރެއަށް ވަނީ ކޮވިޑްގެ ބަލިމަޑުކަމުގެ ތެރޭގައި، "އަޔަން މޭން" ޓްރިއެތްލޯންގައި ބައިވެރިވި ހިސާބުންނެވެ.
އެ ކާމިޔާބީއަށްފަހު، އޭގެ ދެގުނަ ދިގު ރާސްތާއެއް ކަމަށްވާ "އަލްޓްރާ މޭން" ފުރިހަމަކޮށް، އޭނާގެ އަމާޒު ގިނިސް ވޯލްޑް ރެކޯޑުތަކަށް ދިޔަ އެވެ.
އޭނާ އެންމެ ފުރަތަމަ ރެކޯޑެއް މުގުރާލީ 2023 ވަނަ އަހަރުގެ މޭ މަހުގަ އެވެ. އެއީ ބޮލީވިއާގެ އުޔޫނީ ސޯލްޓް ފްލެޓްސް ހުރަސްކޮށް، 33 ގަޑިއިރަށްވުރެ ކުރު ވަގުތުކޮޅެއްގެ ތެރޭގައި 170 ކިލޯމީޓަރުގެ ރާސްތާއެއް ކަޑަތުކޮށްގެންނެވެ.
ކަނޑުގެ ސަތަހައަށްވުރެ 3,600 މީޓަރު އުހުގައި އޮންނަ އެ ސަރަހައްދަކީ ދުވާލު ގަޑީގައި ހޫނުމިން 30 ޑިގްރީ ސެލްސިއަސްއަށް އަރާ، އަދި ރޭގަނޑު މައިނަސް 10 ޑިގްރީ ސެލްސިއަސްއަށް ފިނިވާ، މޫސުން އިންތިހާއަށް ގޯސް ސަރަހައްދެކެވެ.
މީގެ ކުރިން އެ ރެކޯޑު އޮތީ 55 ގަޑިއިރުން އެ ސަރަހައްދު ހުރަސްކުރި މީހެއްގެ އަތުގަ އެވެ.
މިފަދަ އުނދަގޫ ގޮންޖެހުންތައް ކާމިޔާބު ކުރުމަށްފަހު، އޭނާ ބޭނުންވީ އޭނާގެ ނަފްސާނީ ގާބިލިއްޔަތު ހުރި މިންވަރު އިމްތިހާނު ކުރާށެވެ.
އޭނާ ބުނި ގޮތުގައި، އޭނާ އެންމެ ފޫހިވާ އަދި އެންމެ ނުރުހޭ ކަމަކީ އެއް ތަނެއްގައި ހުރެގެން ހުއްޓުމެއް ނެތި ދުވުމެވެ. އެހެންކަމުން އެކަން ގޮންޖެހުމެއްގެ ގޮތުގައި ނެގީ އެވެ.
ބުރާސްފަތި ދުވަހު ނިންމާލި މި ބޮޑު ގޮންޖެހުމަށް ތައްޔާރުވުމުގެ ގޮތުން، ފިއަމޮންސިނީ ވަނީ މިދިޔަ އޮކްޓޯބަރު މަހު ޓްރެޑްމިލްއެއް ގައި 12 ގަޑިއިރުން 110 ކިލޯމީޓަރު ދުވެ، އޭނާގެ ދެވަނަ ގިނިސް ރެކޯޑު ގާއިމުކޮށްފަ އެވެ.
މަސްދަރު: އޭއެފްޕީ
