ޗެމްޕިއަންސް ލީގު: ބެސިކްޓަސް ފަސޭހަކަމާއެކު މޮޅުވިއިރު، މޮނާކޯ މެޗު އެއްވަރުވެއްޖެ.

ޗެމްޕިއަންސް ލީގުގައި ރޭ ކުޅުނު މެޗުތަކުން ބެސިކްޓަސް ފަސޭހަ ކަމާއެކު މޮޅުވިއިރު، މޮނާކޯ ކުޅުނު މެޗު އެއްވަރުވެގެން ނިމިއްޖެއެވެ.

ބުދަ ދުވަހުގެ ރޭ ކުޅުނު މެޗުން ބެސިކްޓަސް މޮޅުވެފައިވަނީ ޕޯޓޯއާ ވާދަކޮށް 1-3 ގެ ނަތީޖާއިންނެވެ.

ޕޯޓޯގެ އަމިއްލަ ދަނޑުގައި ކުޅުނު މި މެޗުގައި ބެސިކްޓަސްގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު، އެޓީމުން ވަނީ މެޗުގެ 13 ވަނަ މިނެޓުގައި ލަނޑެއް ކާމިޔާބުކޮށް ލީޑު ނަގާފައެވެ. ރިކާޑޯ ކޮރެސްމާގެ އެހީތެރިކަމާއެކު މި ލަނޑު ބެސިކްޓަސްއަށް ކާމިޔާބު ކޮށްދިނީ ޓެލިސްކާއެވެ.

އެހެން ނަމަވެސް ބެސިކްޓަސްގެ ކުޅުންތެރިއެއްގެ އަތުން ބައިކޮޅަށް ވަތް ލަނޑަކުން މެޗުފެ 21 ވަނަ މިނެޓުގައި ޕޯޓޯއިން ވަނީ ނަތީޖާ އެއްވަރުކޮށްފައެވެ.

ބެސިކްޓަސްއިން ދެވަނަ ފަހަރަށް މެޗުގެ ލީޑު ނަގާފައިވަނީ މެޗުގެ 28 ވަނަ މިނެޓުގައި ސެން ޓޯސުން ކާމިޔާބު ކޮށްދިން ލަނޑުންވެ.

ދެ ލަނޑުގެ ލީޑެއްގައި އޮވެ ބެސިކްޓަސްއިން މެޗުގެ ފުރަތަމަ ހާފު ނިންމާލިއިރު، އެޓީމުން މެޗުގައި ތިންވަނަ ލަނޑު ކާމިޔާބު ކޮށް ލީޑު ފުޅާކުރީ މެޗުގެ 82 ވަނަ މިނެޓުގައި ރަޔަން ބާބެލް ކާމިޔާބު ކޮށްދިން ލަނޑުންނެވެ.

ރޭ ކުޅުނު މެޗުން މޮނާކޯ އެއްވަރުވެފައިވަނީ ޖަރުމަނުގެ އާރުބީ ލެއިޕްޒީ އާ ވާދަކޮށް 1-1 ގެ ނަތީޖާއިންނެވެ.

ލެއިޕްޒީގެ އަމިއްލަ ދަނޑުގައި ކުޅުނު މި މެޗުގައި ދެޓީމުގެ ފަރާތުންވެސް ހަމަހަމަ ކުޅުމެއް ފެނިގެން ދިޔައިރު، މެޗުގެ ފުރަތަމަ ލަނޑު ޖަހާ ލީޑު ނަގާފައިވަނީ ލެއިޕްޒީ އިންނެވެ. މެޗުގެ 32 ވަނަ މިނެޓުގައި މި ލަނޑު އެޓީމަށް ކާމިޔާބު ކޮށްދިނީ އެމިލް ފޯސްބާގްއެވެ.

އެހެން ނަމަވެސް އޭގެ ދެމިނެޓު ފަހުން މެޗުގެ 34 ވަނަ މިނެޓުގައި ޔޫރީ ޓައިލެމަން ވަނީ ލަނޑެއް ޖަހާ މޮނާކޯއަށް މެޗުގެ ނަތީޖާ ހަމަހަމަކޮށްދީފައެވެ.

ދެޓީމުންވެސް އެއްވަރެއްގައި އޮވެގެން މެޗުގެ ފުރަތަމަ ހާފު ނިންމާލިއިރު ފަހުހާފުގައި ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބުކުރެވިފައެއް ނުވެއެވެ. އެހެން ނަމަވެސް ދެޓީމަށްވެސް ވަނީ ލަނޑު ޖަހަން ރަނގަޅު ފުރުސަތު ލިބި ބޭކާރުވެގެން ގޮސްފައެވެ.