ދެކުނު ސޫދާނުގައި އޮންނަ އިންތިޚާބާ ގުޅޭ މަޝްވަރާތަކަށް އުފެއްދި ޕެނެލް ގެ އިސް މީހަކަށް ފަސް އަހަރު ކުރިން މަރުވެފައިވާ މީހަކު އެ ގައުމުގެ ރައީސް އަށް އައްޔަރު ކުރެއްވިއްޖެ

ދެކުނު ސޫދާނުގައި އަންނަ ޑިސެމްބަރު މަހު ބޭއްވުމަށް ތައްޔާރުވަމުންދާ އިންތިޚާބުގެ ޝެޑިއުލް އާ ގުޅޭ މަޝްވަރާތައް ކުރިއަށްގެންދާ ޕެނަލުގެ އިސްފަރާތަކަށް މަރުވެފައިވާ މީހަކު އައްޔަންކުރެވުނު ލަދުވެތި ހާދިސާއާ ގުޅިގެން، އެ ގައުމުގެ ރައީސް ސަލްވާ ކީރް އެމަނިކުފާނުގެ އަރިސް ދެ އޮފިޝަލަކު މަގާމުން ވަކިކުރައްވައިފި އެވެ.

މިދިޔަ ޑިސެމްބަރު މަހުގެ 30 ވަނަ ދުވަހު ރައީސް ނެރުއްވި ގަރާރެއްގައި ސްޓެވާޑް ސޮރޯބާ ބުޑިއާ އެ ޕެނަލަށް އައްޔަންކުރެއްވިކަން އިއުލާންކުރެއްވި ނަމަވެސް، އިދިކޮޅު ޔުނައިޓެޑް ޑިމޮކްރެޓިކް ޕާޓީ (ޔޫޑީޕީ) އަށް ނިސްބަތްވާ އެ މެންބަރު މަރުވިތާ ފަސް އަހަރު ވެފައިވާކަން އެ ގައުމުގެ މީޑިއާތަކުން ވަނީ ފާހަގަކޮށްފަ އެވެ.

މި އައްޔަންކުރުމާ ގުޅިގެން ސޯޝަލް މީޑިއާގައި ގިނަ ބައެއްގެ ފާޑުކިޔުމާއި މަލާމާތް ސަރުކާރަށް ވަނީ އަމާޒުވެފައެވެ.

ވަކި ސަބަބެއް ހާމަކުރުމެއް ނެތި ސަރުކާރުން ނެރުނު ރަސްމީ ބަޔާނެއްގައި ބުނެފައިވަނީ، ރައީސްގެ ޕްރެސް ސެކްރެޓަރީ ޑޭވިޑް އަމޯރް މޭޖަރާއި، މިނިސްޓްރީ އޮފް ޕްރެޒިޑެންޝަލް އެފެއާޒް ގެ ޗީފް އެޑްމިނިސްޓްރޭޓަރު ވެލެންޓީނޯ ދެލް މަލުއެޓް މަގާމުން ވަކިކުރައްވާފައިވާ ކަމަށެވެ.

ރައީސްގެ ރަސްމީ ފޭސްބުކް ޕޭޖުގައި ޝާއިއުކޮށްފައިވާ، އަދި މިނިސްޓަރ އޮފް ޕްރެޒިޑެންޝަލް އެފެއާޒް އެފްރިކާނޯ މަންޑޭ ގެޑިމާ ސޮއިކުރައްވާފައިވާ އެ ބަޔާނުގައި ބުނެފައިވަނީ، އެ ދެ މީހުން މަގާމުން ވަކިކުރެއްވީ ރައީސް "އުފަލާއެކު" ކަމަށާއި، އެ ބޭފުޅުން ކޮށްދެއްވި ޚިދުމަތަށްޓަކައި ރައީސް "އިޚްލާސްތެރި ޝުކުރު" އަދާކުރައްވާ ކަމަށެވެ.

މިދިޔަ ހޯމަ ދުވަހު އަމޯރް ނެރުއްވި ނޫސްބަޔާނެއްގައި ވިދާޅުވީ، އެ ޕެނަލުގައި ހިމެނުމަށް "ސްޓޭކްހޯލްޑަރުން" ނުވަތަ ކަމާބެހޭ ފަރާތްތަކުން ހުށަހެޅި ނަންތަކުގެ "ސައްހަކަމާއި ފުރިހަމަ ކަމަށް" ރައީސް އޮފީހުން ފުރިހަމައަށް އިތުބާރުކުރި ކަމަށެވެ.

"މިހާރު މިވަނީ ކަމާބެހޭ އެއް ފަރާތުން ނަންތައް ކަށަވަރުކުރުމުގައި އިހުމާލުވެފައިވާކަން ހާމަވެފައި. އޭގެ ނަތީޖާއެއްގެ ގޮތުން އިދާރީ ގޮތުން މިފަދަ ހިތާމަވެރި އޮޅުމެއް މިވަނީ އަރާފައި،" އަމޯރް ވިދާޅުވިއެވެ.

މަރުވެފައިވާ ބުޑިއާ އަކީ 2011 ވަނަ އަހަރު މިނިވަންކަން ލިބުމަށްފަހު ދެކުނު ސޫދާނުގައި އުފެދުނު ދާޚިލީ ހަނގުރާމަ ނިމުމަކަށް ގެނައުމަށް 2018 ވަނަ އަހަރު ސޮއިކުރި ސުލްހައިގެ އެއްބަސްވުމުގައި ބައިވެރިވި ފަރާތެކެވެ.

ރައީސް ކީރް މި ޕެނަލް އެކުލަވާލެއްވީ ތަފާތު ސިޔާސީ ޕާޓީތަކުގެ މަންދޫބުން ހިމަނައިގެން، ކުރިއަށް އޮތް އިންތިޚާބަށް މަގުފަހިކުރުމުގެ ގޮތުންނެވެ.

ނަމަވެސް ގައުމުގައި އަދިވެސް ހަމަނުޖެހުންތައް ހިނގަމުންދާތީ، އިންތިޚާބު ބޭއްވޭނެތޯ ގިނަ ބަޔަކު ދަނީ ސުވާލު އުފައްދަމުންނެވެ.

މިނިވަންވީއްސުރެ ރައީސް ކީރް ވެރިކަމުގައި ހުންނެވިއިރު، މީގެ ކުރިން ބާއްވަން އުޅުނު އިންތިޚާބުތައް ވެސް ވަނީ ފަސްކޮށްފައެވެ.

އދ. އިން ބުނާ ގޮތުގައި ފަހަކަށް އައިސް ހިނގަމުންދާ ހަމަނުޖެހުންތަކުގެ ސަބަބުން 180،000 އަށްވުރެ ގިނަ މީހުން ވަނީ ގެދޮރު ދޫކޮށް ދާން މަޖުބޫރުވެފައެވެ.