ސަސްޕެންޝަންގައި ހުރި އެފްއައިޔޫ ގެ ވެރިޔާ ސާޖިދު މަޤާމުން ވަކިކޮށްފި
ސާޖިދު މަގާމުން ވަކިކުރީ އެތެރޭގެ ކޮމިޓީގެ ލަފާގެ މަތިން ގަވަރނަރ އަހުމަދު މުނައްވަރު ކަމަށް މައުލޫމާތު ލިބޭ. ސާޖިދު ޑިސެމްބަރު 25 އިން ފެށިގެން ސަސްޕެންޑުކޮށްފައިވާއިރު، އޭނާ އެ މަގާމަށް ހަމަޖެއްސީ އޯގަސްޓު 3 ގަ އެވެ.
ސަސްޕެންޝަނުގައި ހުރި އެފްއައިޔޫގެ ވެރިޔާ، ސާޖިދު. | ސޯޝަލް މީޑިއާ
މިދިޔަ އަހަރު ފަހުކޮޅުން ފެށިގެން ސަސްޕެންޑު ކޮށްފައި ހުރި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ ވެރިޔާ އިސްމާއިލް ސާޖިދު އެ މަގާމުން ވަކި ކޮށްފި އެވެ.
އޭނާ މަޤާމުން ވަކިކޮށްފައި ވަނީ ބުރާސްފަތި ދުވަހު އެވެ. އޭނާ މަޤާމުން ވަކިކުރީ ޖިންސީ ފުރައްސާރައިގެ މައްސަލައެއްގައި ކަމަށް މައުލޫމާތު ލިބެ އެވެ. އޭނާ މަޤާމުން ވަކިކުރީ މައްސަލަ ބެލި އެމްއެމްއޭގެ އެތެރޭގެ ކޮމިޓީގެ ލަފާގެ މަތިން ގަވަރނަރ އަހުމަދު މުނައްވަރު އެވެ. އެފްއައިޔޫގެ ވެރިޔާގެ މަގާމުން ސާޖިދު ސަސްޕެންޑު ކުރީ ޑިސެމްބަރު 25، 2025 ގަ އެވެ.
އެފްއައިޔޫގެ ކުރީގެ ވެރިޔަކަށް ހުރި އަބްދުالله އަޝްރަފްގެ ބަދަލުގައި ސާޖިދު އެ މަޤާމަށް އައްޔަން ކުރީ ސްޓަރަކްޗަރަލް ބަދަލެއް ކަމަށް ބުނެ ގެނައި ބަދަލުތަކުގެ ތެރެއިންނެވެ. އޭނާ އެ މަގާމަށް ހަމަޖައްސާފައި ވަނީ ބާރަށު ދާއިރާގެ މެންބަރު އިބްރާހިމް ޝުޖާއު އަށް ބޮޑެތި ތުހުމަތުތަކެއް ކޮށް އެފްއައިޔޫ އިން ތައްޔާރު ކުރި ރިޕޯޓެއް ލީކުވިތާ 24 ގަޑިއިރު ތެރޭގަ އެވެ.
އެފްއައިޔޫ އަކީ ކަޅު ފައިސާ ދޮވުމާއި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން ޤާއިމްކޮށްފައިވާ ޔުނިޓެކެވެ. އެ ޔުނިޓުން ކުރާ މަސައްކަތްތަކުގެ ތެރޭގައި މާލީ މުއާމަލާތްތައް ބަލާ ފާރަވެރިވުން ހިމެނެ އެވެ. އަދި އެފަދަ މުއާމަލާތެއް މެދުވެރިކޮށް ކުށް ކުރުމަށް އަރައިގަނޭތޯ ބެލުމަކީ ވެސް އެ ޔުނިޓުގެ ޒިންމާ އެކެވެ.
