މަޖިލީހުގެ މެންބަރުން ޕާޓީ ބަދަލުކުރުމާ ގުޅޭ ގުޅޭގޮތުން ޑރ. ޝަމްސުލްފަލާހް ދެއްވާ ލެކްޗަރ އަށް އެމްއެންޔޫ އޮޑިޓޯރިއަމް ދިނުމަށް ފަހު އަތުލައިފި
އެމްއެންޔޫ އިން ލެކްޗަރ ކެންސަލްކުރީ މި އަހަރުގެ ފުރަތަމަ ސެމިސްޓާގެ ކިޔެވުން ފެށުމުގެ ކުރިއަށް އެ އޮޑިޓޯރިއަމްގެ ކުރަން ޖެހޭ މަރާމާތުގެ މަސައްކަތްތަކެއް ކުރަން ޖެހިގެން ކަމަށް ބުނެ.
ގާނޫނީ ތަޖުރިބާކާރު ޑރ. ޝަމްސުލްފަލާހް މީގެ ކުރިން އެމްއެންޔޫގައި ލެކްޗަރ އެއް ދެއްވަނީ. | ޑރ. ޝަމްސުލްފަލާހް
ގާނޫނުއަސާސީ އަށް ބަދަލުތައް ގެނައުމާއި މަޖިލީހުގެ މެންބަރުން ޕާޓީ ބަދަލުކުރުމާ ގުޅޭ ގޮތުން ގައުމީ ޔުނިވާސިޓީ ގައި ބޭއްވުމަށް ހަމަޖެހިފައިވާ ލެކްޗަރ އަށް ދިން ހުއްދަ އެ ޔުނިވާސިޓީ އިން ކެންސަލް ކޮށްފި އެވެ.
މި ތަގުރީރު ދެއްވުމަށް ހަމަޖެހިފައިވަނީ ގާނޫނުއަސާސީގެ އިލްމީ ދިރާސާތައް ކުރައްވާ ތަޖުރިބާކާރު ޑރ. ޝަމްސުލްފަލާހް އެވެ.
މޯލްޑިވްސް ލޯ އިންސްޓިޓިއުޓުން އިންތިޒާމުކުރާ މި ލެކްޗަރ ބޭއްވުމަށް ހުއްދަ ދިނީ އަންނަ ހޮނިހިރު ދުވަހުގެ ރޭގަނޑު 20:30 އިން ރޭގަނޑު 22:00 އަށް އެމްއެންޔޫގެ ސެންޓްރަލް އެޑްމިނިސްޓްރޭޝަންގެ އޮޑިޓޯރިއަމްގަ އެވެ. އެ ލެކްޗަރ އިސްތިހާރުތައް ސޯޝަލް މީޑިއާގައި ޕްރޮމޯޓްކުރަމުން ދަނިކޮށް އެމްއެންޔޫ އިން ވަނީ އެ ހުއްދަ ކެންސަލްކޮށްފަ އެވެ.
އެމްއެންޔޫ އިން މި ލެކްޗަރ ކެންސަލްކުރީ މި އަހަރުގެ ފުރަތަމަ ސެމިސްޓާގެ ކިޔެވުން ފެށުމުގެ ކުރިން އެ އޮޑިޓޯރިއަމްގައި މަރާމާތުގެ މަސައްކަތްތަކެއް ކުރަން ޖެހިގެން ކަމަށް ބުނެ އެވެ. އެ ހަފްތާ އަކީ އެ ޔުނިވާސިޓީގެ އޮރިއެންޓޭޝަން ކުރިއަށްދާ ހަފްތާއަށް ވާތީ އެހެން އޮޑިޓޯރިއަމެއް ވެސް ލިބެން ނެތް ކަމަށް އެމްއެންޔޫ އިން ވަނީ އަންގާފަ އެވެ.
މި ހަރަކާތް އިންތިޒާމުކުރުމުގައި އިސްކޮށް ހަރަކާތްތެރިވާ ފަރާތްތަކުން ބުނީ އިލްމީ ލެކްޗަރ އަކަށް މިފަދަ ގޮތަކަށް ހުރަސްއަޅައި ކުރިއަށް ގެންދަން ޖާގަ ނުދިނުމަކީ ވަރަށް ބޮޑަށް އެފަރާތްތަކުން ކަންބޮޑުވާ ކަމެއް ކަމަށެވެ.
ޑރ. ޝަމްސުލްފަލާހް އަކީ ގާނޫނުއަސާސީގެ އިލްމީ ދިރާސާތައް ކުރައްވަމުން ގެންދަވާ އެ އިލްމުގެ ފާހަގަކޮށްލެވޭ ތަޖުރިބާކާރެކެވެ. އޭނާ ލިއުއްވާފައިވާ ފޮތަކާއެކު މި ތަގުރީރު ބޭއްވުމަށް ހަމަޖެހިފައިވަނީ ގާނޫނުއަސާސީއަށް ބަދަލު ގެނައުމާއި މަޖިލީހުގެ މެންބަރުން ޕާޓީ ބަދަލުކުރުމާ ގުޅޭ މައުޟޫއުގަ އެވެ.
ފާހަގަ ކޮށްލެވޭ ގޮތުގައި ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ނުވަތަ ވަކިކުރުމުން ގޮނޑި ގެއްލޭ ގޮތަށް ގާނޫނުއަސާސީ އަށް ބަދަލު ގެނައީ، ރައީސް މުއިއްޒު ކޮންޓްރޯލް ކުރާ މަޖިލީހުން އެންމެ ދުވަހެއްގެ ތެރޭގަ އެވެ. އަދި ޕާޓީން ވަކިކޮށް ގޮނޑި ގެއްލުވައިލެވޭ ގޮތަށް ގެނައި ބަދަލު ސުޕްރީމް ކޯޓުގައި ޗެލެންޖުކުރުމުން އެ މައްސަލަ ވެސް ވަނީ ހުއްޓާލާފަ އެވެ.
ސުޕްރީމް ކޯޓުގައި މައްސަލަ ބަލަމުން ދަނިކޮށް މިދިޔަ އަހަރުގެ ފެބްރުއަރީ މަހު ތިން ފަނޑިޔާރަކު ސަސްޕެންޑްކުރި ފަހުން އެ ކޯޓުގައި މައްސަލަ ކުރިއަށް ގެންގޮސްފައެއް ނުވެ އެވެ. މި މައްސަލަ ސުޕްރީމް ކޯޓުގައި އޮތްއިރު ގާނޫނުއަސާސީ އަށް ގެނައި ބަދަލުތަކާ ގުޅޭ ގޮތުން އާންމުންނަށް މަޢުލޫމާތު ހިއްސާކުރުމަށް ބޭއްވުމަށް ހަމަޖެހިފައިވާ ތަގުރީރަށް އެމްއެން ޔޫއިން ހުރަސްއެޅުމަކީ ކަންބޮޑުވާންޖެހޭ ކަމެއްގެ ގޮތުގައި މި ހަރަކާތް އިންތިޒާމުކުރާ ފަރާތްތަކުން ދެކެ އެވެ.
