ހަނދާނަށް އަންނަނީ 31 އޮކްޓޯބަރު 2024 ގައި ގައުމީ ޔުނިވާސިޓީގެ ދަސްވެނިވުމުގެ ރަސްމިއްޔާތުގައި ވާހަކަ ދައްކަވަމުން ޑރ މުޢިއްޒު ބަޖެޓަކަށް ނަމެއް ދިން ހަނދާނެވެ. އެ ދުވަހު ރަސްމިއްޔާތުގައި ވާހަކަ ދައްކަވަމުން މުޢިއްޒު ވިދާޅުވީ، 2025 ވަނަ އަހަރަށް ލަފާކޮށްފައި ސަރުކާރުން މަޖިލީހަށް ހުށަހަޅާ ބަޖެޓަކީ ރާއްޖޭގެ ތާރީހުގައި ވެސް އެންމެ ފުޅާ ދާއިރާއެއްގަ ގެދޮރުވެރިކަމަށް ޓަކައި މަގުފަހިކޮށްދޭނެ ބަޖެޓު ކަމަށެވެ. އަދި އެ ބަޖެޓަށް "ބޯހިޔާވަހިކަމުގެ ބަޖެޓު" ގެ ނަމުން ނަން ވެސް ދެއްވި އެވެ. ބޯހިޔާވަހިކަމުގެ ބަޖެޓޭ ކިޔައި ރައްޔިތުންނަށް މި ބަޖެޓު ވިއްކީ ރައްޔިތުންގެ އެންމެ ބޮޑު ތަކުލީފު ކަމުގައިވާ ބޯހިޔާވަހިކަމުގެ ދަތިކަމަށް އޮތް މައްސަލައިގެ ހައްލު ކަމަށް ބުނެ އެވެ.

އެހެނަސް މުޅި ބޯހިޔާވަހިކަން ދިޔައީ ފަނުފުލުންނެވެ. 56.6 ބިލިއަން ރުފިޔާ ދެކުނު މީހަކު ނެތެވެ. 2025 ވަނަ އަހަރު ދެބައިވެގެން ދިޔައިރުވެސް ގަލެއްގެ މިންވަރު ބޭންދުނު ކަމަކަށް ނުވި އެވެ. މި ފަހަކަށް އައިސް ފިނި މައިޒާންތަކަށް މީހުން އެއްވާ ވަރަށް ހައުސިންގ މިނިސްޓްރިއަށް އާންމުން އެއްވެ އެވެ. މަ ހިތުން އެތަނަށް މީހުން އެއްވަނީ މުޢިއްޒު ސެޕްޓެމްބަރު މަހުގެ ކުރިން ހަވާލުކުރަން ބުނި ފުލެޓުތަކުގެ ތަޅުދަނޑި ބަލައެ އެވެ. އެތަނަށް ވަންނަ މީހުން ނިކުމެގެން އަންނައިރު ހުންނަނީ ދެވަރުން އެއްވަރު ވެފަ އެވެ. ތަޅުދަނޑި ނުލިބޭތަނުގަ ފުލެޓު ގަނޑުވެސް ލިބޭނެ ކަމުގެ ޔަގިން ކަމެއް ނޯވެ އެވެ.

ބޯހިޔާވަހިކަމުގެ ބަޖެޓުން ކުރީ ކީއްކަމެއް ނޭންގެ އެވެ. ޔަގީންވާ އެއްކަމަކީ 56.6 ބިލިއަން ރުފިޔާގެ ބަޖެޓެއް ފާސްކުރި ކަމެވެ. އެ ބަޖެޓުން ގެދޮރުވެރިކަމުގެ ލޯނު ދޫކުރަންވެސް ނިންމި އެވެ. އެކަމަކު ދިނީ ލޯނު ކަމެއް ނުވަތަ ހަދިޔާ ކަމެއްވެސް ނޭންގެ އެވެ. ހައުސިން މިނިސްޓަރު ޑރ. އަބްދުالله މުއްތޮލިބު، މިދިޔަ ޖޫން މަހު ރައްޔިތުންގެ މަޖިލީހުގައި މެންބަރުން ކުރި ސުވާލުތަކަށް ޖަވާބު ދެއްވަމުން ވިދާޅުވީ ލަސްވެގެން ޖުލައިގައި ލޯނުތައް ދޫކުރަން ފަށާނެ ކަމަަށެވެ. ނަމަވެސް ޖުލައި ނިމި، އޮގަސްޓު މަސް ވެސް ނިމި ސެޕްޓެމްބަރު މަސް ފެށުނު އިރުވެސް ލޯނުތައް ދޫކުރުމާ ގުޅޭ އެއްވެސް އަޑެއް ނީވެ އެވެ.

ދެން އޮތީ ވެރިކަމަށް އަންނަމުން ރައްޔިތުންނަށް ވިއްކި ބޮޑު ދޮގު ވައުދުގެ ވާހަކަ އެވެ. އެއީ ކުރީ ސަރުކާރުން އެއްވެސް ރައްޔިތަކަށް ދޭން ކަނޑައަޅާފައިވާ ފްލެޓެއް އަތު ނުލާނެ ކަމަށާއި ކުރީ ސަރުކާރުން ކަނޑައަޅާ ދޭން ނިންމާފައިވާ ފްލެޓްތައް އެ ފުލެޓެއް ދިންތަނަކުން ދިންގޮތަކަށް އެއަށްވުރެން ފުރިހަމަ އަށް އެފަރާތްތަކަށް ދޭނެ ކަމަށް ވިދާޅުވެ ކެމްޕެއިން ޕޯޑިއަމް ތަކުގައި އެ ވައުދު ތަކުރާރު ކުރެއްވި އެވެ. އެ ވައުދު ވީ ހަމަ ބިލާހަކަށެވެ. ދިން އެއްޗެއް ހަތްހަރާމުން ހަރާމެވެ. ދިން އެއްޗެއް ދިނީ މުޢިއްޒުގެ އަޅުން ފަދައިން މަސައްކަތް ކުރާ ސިޔާސި ވަޒީފާ ތަކުގައި އުޅޭ މީހުންނަށާއި ގާތް ތިމާގެ މީހުންނަށާއި މަޖިލީސް މެންބަރުންނަށެވެ. މަޖިލީސް މެންބަރުންގެ މާލީ ބަޔާނުން ވެސް އެކަން އޮތީ އެގޮތަށެވެ. ހިލޭ ދިން ރޯހައުސްތަކާއި ނުއަގުގައި ނަގާފައިވާ ބިންތަކާއި ހަދިޔާގެ ގޮތުގައި މިލިއަނުން ދީފައިހުރި ފައިސާތަކެވެ.

ކޮންމެއަކަސް ބަޔަކުމީހުން މުއްސަނދިވެއްޖެ އެވެ. އުމުރު ދުވަހު ދިރިއުޅޭނެ ގެއާއި ފައިސާ ވެސް ދިން ބަޔަކަށް ދީފި އެވެ. ލޮލުފިއެއްވެސް ޖަހާލަން ވަންނާނެ ގެދޮރެއްވެސް ނެތި ވޯޓު ދިން ނިކަމެތި ރައްޔިތުންގެ އެވެ. އާދެސް ކޮށް ދެއިރު ދެދަޅައަށް ހައުސިންގ މިނިސްޓްރީގައި ހަޅޭ ފަޅޭ ޖެހިޔަސް މުޢިއްޒު އެއް ބައްރުން އަނެއް ބައްރަށް އުދުހެނީ އެވެ. މަށައް ފެންނަނީ ޔޫޓިއުބް ޗެނަލެއް ހުޅޫވާފައި "ޓްރެވަލް ވިތް މުޢިއްޒު" ގެ ނަމުން ނަންދޭށެވެ.