ބޭ އޮފް ބެންގޯލުގައި އުފެދިފައިވާ ވަރުގަދަ ކޮޅިގަނޑުގެ އަސަރު ހުކުރު ދުވަހު ލަންކާ އަށް ކުރާނެ އަތީ ސަމާލު ވުމަށް އެދިއްޖެ

ބޭ އޮފް ބެންގާލްގައި އުފެދިފައިވާ ކޮޅިގަނޑު، ކުރިއަށް އޮތް 12 ގަޑިއިރުގެ ތެރޭގައި އިތުރަށް ވަރުގަދަވެ "ޑީޕް ޑިޕްރެޝަން" އަކަށް ބަދަލުވާނެ ކަމަށް ސްރީލަންކާގެ މޫސުމާ ބެހޭ އިދާރާއިން އިންޒާރު ދީފިއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އެ ގައުމުގެ މޫސުމާ ބެހޭ އިދާރާގެ ޑައިރެކްޓަރ ޖެނެރަލް އަތުލާ ކަރުނަނަޔަކަ ވިދާޅުވީ، އެ އިދާރާގެ ހޯދުންތަކުން ދައްކާ ގޮތުގައި މި ކޮޅިގަނޑު ހުކުރު ދުވަހުގެ އިރުއޮއްސި 5:30 އާއި ރޭގަނޑު 11:30 އާ ދެމެދު ހަމްބަންޓޮޓާ އާއި ކަލްމުނާއީ އާ ދެމެދުގެ ސަރަހައްދަކުން އެ ގައުމަށް އަރާނެ ކަމަށް ބެލެވޭ ކަމަށެވެ.

07 ވަނަ ދުވަހު މި ކޮޅިގަނޑު ހުރީ ލަންކާ އާ ގާތްގަނޑަކަށް 490 ކިލޯމީޓަރު ދުރުގަ އެވެ. އަދި ކުރިއަށް އޮތް 24 ގަޑިއިރުގެ ތެރޭގައި މި ކޮޅިގަނޑު ހުޅަނގަށާއި ހުޅަނގު އުތުރަށް ޖެހެމުން ގޮސް، ލަންކާގެ އިރުމަތީ އައްސޭރި ފަށާ ދިމާލަށް ދަތުރުކުރާނެ ކަމަށް ލަފާކުރެވޭ ކަމަށް ވެސް މޫސުމާ ބެހޭ އިދާރާ އާ ހަވާލާދީ ލަންކާގެ ލޯކަލް މީޑިއާ އިން ރިޕޯޓު ކޮށްފައިވެ އެވެ.

މި ދުވަސްވަރު އެ ގައުމުގެ ބޮޑު ބަޔަކަށް އުޑުމަތި ބަރުވެފައި އޮންނާނެ ކަމަށާއި، އުތުރު، މެދުތެރޭ، އިރުމަތި، އަދި ދެކުނު ޕްރޮވިންސްތަކަށް ވާރޭވެހި ގުގުރާނެ ކަމަށް ވަނީ ލަފާކޮށްފަ އެވެ. މީގެ އިތުރުން، އެހެން ސަރަހައްދުތަކަށް މެންދުރުފަހު 1:00 ގެ ފަހުން ބޯކޮށް ވާރޭވެހުން އެކަށީގެންވާ ކަމަށް ބުނެފައިވެ އެވެ.

އިރުމަތީ އަދި އޫވާ ޕްރޮވިންސްގެ ބައެއް ސަރަހައްދުތަކަށް 100 މިލިމީޓަރަށް ވުރެ ގިނައިން ވާރޭ ވެހޭނެ ކަމަށް ބެލެވޭއިރު، އެހެން ސަރަހައްދުތަކަށް 50 އާއި 75 މިލިމީޓަރާ ދެމެދުގެ މިންވަރަކަށް ވާރޭ ވެހިދާނެ ކަމަށް ވަނީ ލަފާ ކޮށްފަ އެވެ.

މީގެ އިތުރުން ހަމްބަންޓޮޓާ، ގަމްޕަހަ، ކޮލަމްބޯ އަދި މޮނަރަގަލާ ޑިސްޓްރިކްޓްތަކަށް ގަޑިއަކު 50 އާއި 60 ކިލޯމީޓަރުގެ ބާރުމިނުގައި ވައިޖެހުން އެކަށީގެންވެއެވެ.

ވިލާގަނޑުގައި ޖެހޭ ބާރު ވަޔާއި ގުގުރުމާއެކު ދިމާވެދާނެ ނުރައްކާތަކުން ސަލާމަތްވުމަށްޓަކައި، ދުރާލައި ރައްކާތެރިކަމުގެ ފިޔަވަޅުތައް އެޅުމަށް އެ ގައުމުގެ މޫސުމާ ބެހޭ އިދާރާއިން އާންމުންނަށް އިލްތިމާސްކުރެ އެވެ.