އިގްތިސާދީ މަސައްކަތެއް ހިނގާނަމަ ޑޮލަރު ލިބެން ހުންނާނީ 25 ރުފިޔާގައި: ރައީސް ޔާމީން
ކުރީގެ ރައީސް ޔާމީން ވިދާޅުވީ އިގްތިސާދު އޮތީ ވެންޓިލޭޓަރުގައި ކަމަށާއި މިހާރު ވިޔަފާރިތައް ހުއްޓިފައިވާތީ ޑޮލަރަށް ޑިމާންޑް މަދުވެފައިވާ ކަމަށް. އިގްތިސާދީ ހަރަކާތްތައް ހިނގާނަމަ ޑޮލަރު 20 އިން 25 ރުފިޔާއަށް އަރާނެ ކަމަށާއި ރައްޔިތުން އޮޅުވާލުމަކީ ވެރިކަން ބަދަލުވުމަށް މަގުފަހިކުރުން ކަމަށް ވިދާޅުވި.
ކުރީގެ ރައީސް އަބްދުﷲ ޔާމީން | ޕީޕަލްސް ނެޝަނަލް ފްރަންޓް (ޕީއެންއެފް)
އިގްތިސާދީ މަސައްކަތެއް ހިނގާނަމަ ޑޮލަރު ލިބެން ހުންނާނީ 25 ރުފިޔާގައި ކަމަށާއި، މިހާރު ޑޮލަރެއް 20 ރުފިޔާގައި ހުރީ ޑޮލަރުން ކުރާ މާބޮޑު ކަމެއް ގައުމުގައި ނުހިނގާތީ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފް ފްރަންޓް އޮފީސް ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ މިއަދު ޑޮލަރެއް ލިބެން ހުރީ 20 ރުފިޔާ 25 ލާރިއަށް 30 ލާރިއަށް ކަމަށެވެ. ޔާމީން ވިދާޅުވީ އިގްތިސާދު އޮތީ ވެންޓިލޭޓަރުގައި ކަމަށެވެ. އަދި އިގްތިސާދު ވެންޓިލޭޓަރުން ނަގައި އިގްތިސާދީ ހަރަކާތްތަކެއް ހިނގާ ކަމުގައިވާނަމަ 20 ރުފިޔާ 25 ލާރިއަކަށް ޑޮލަރެއް ނުލިބޭނެ ކަމަށެވެ. ރައީސް ޔާމީން ވިދާޅުވީ މިއަދު އިގްތިސާދީ ހަރަކާތްތަކެއް ނުހިނގާ ކަމަށާއި، މިއަދު ވިޔަފާރިތައް ހުރީ ހުއްޓިފައި ކަމަށާއި، ރިއަލް އެސްޓޭޓެއް ނުހިނގާ ކަމަށެވެ. އަދި ބޭރުން މުދާ އިމްޕޯޓު ކުރަން ނުވަތަ އެހެން ކަމެއްގައި ނަމަވެސް މަދުން ޑޮލަރު ބޭނުންވާ ކަމަށާއި، އޭގެ އިތުރުން ރާއްޖެއިން ބޭރަށް ދާ މީހަކު ނުވަަތަ އާސަންދައިން ދާ މީހަކު ޑޮލަރު ނުލިބިގެން ފަދަ މަދުކަމެއްގައި ޑޮލަރު ބޭނުންވާ ކަމަށެވެ.
އެހެންވެގެން ޑޮލަރު 20 ގައި އެ އުޅެނީ. މިއީ ޑިޕްރެސްޑް ޑިމާންޑެއް މިހާރު މިއޮތީ ޑޮލަރަށް. އެހެންވީމާ މި ދެންނެވި ކަހަލަ މަސައްކަތްތަކެއް މިތާގައި ކުރާކަމުގައިވާނަމަ ޑޮލަރު މިހާރު އަތްފޯރާ ހިސާބުގައި ނޫން ހުންނާނީ. 22، 23، 25 އާއި ހަމައަށްދާނެ. އެހެންވީމަ އެއީ ރިއަލިސްޓިކް ފިގަރ އަކަށް ވާނީ. އެހެންވީމާ އިގްތިސާދީ ކަންކަމުގައި ރައްޔިތުންނަށް އޮޅުވާލާ ދޮގުހަދާކަމުގައިވާނަމަ އެއީ ދައުލަތެއް ބަނގުރޫޓުވުން، ނުވަތަ ދައުލަތެއް ހަލާކުވުން ނުވަތަ ވެރިކަން ބަދަލުވުމަކީ ރައްޔިތުން އެންމެ އެދޭނެ ގޮތް.ކުރީގެ ރައީސް އަބްދުﷲ ޔާމީން
ރައީސް ޔާމީން ވިދާޅުވީ ތަކުލީފުތަކުގައި ވެސް ރައްޔިތުންނަށް އުނދަގޫވާ ގޮތަށް ކަންތައްތަކެއް ދެމެހެއްޓެނިވި ގޮތެއްގައި ކުރާ ކަމަށްވަންޏާ ރައްޔިތުންނަކަށް އެ ތަހައްމަލެއް ނުކުރާނެ ކަމަށެވެ. އީރާނުން ވެސް މިއަދު ފެންނަނީ އެފަދަ މަންޒަރެއް ކަމަށާއި، ވެރިކަން ބަދަލުވުމުގެ މަގުމަތީގައި އޮތްކަމަށް ރައީސް ޔާމީން ފާހަގަ ކުރެއްވި އެވެ.
ރައީސް ޔާމީން އިގްތިސާދާ ގުޅޭގޮތުން މިފަދައިން ވިދާޅުވެފައިވާ އިރު، ރާއްޖެ ދަރަނިވެރިވުމުގެ ފުރުސަތު ވަރަށް ބޮޑު ކަމަށް ފިޗުން ވަނީ މިދިޔަ ޑިސެމްބަރު މަހުގައި ބުނެފަ އެވެ.
ޑިސެމްބަރު މަހުގެ 22 ވަަނަ ދުވަހު އެ އޭޖެންސީން ރާއްޖޭގެ ކްރެޑިޓް ރޭޓިން އަކީ 'ސީސީ' ކަމަށް ކަނޑައަޅާފައިވާ އިރު، ބުނެފައިވަނީ ރޭޓިންގ އިން ދައްކާ ގޮތުގައި، ބޭރުގެ ފަރާތްތަކުން ކުރިމަތިވާ މާލީ ގޮންޖެހުންތަކާއި، ދައުލަތުގެ މާލީ ނާޒުކުކަން ބޮޑުވުމުގެ ސަބަބުން، މި ރޭޓިންގ ގެ މުއްދަތުގެ ތެރޭގައި ވެސް ރާއްޖެ ޑިފޯލްޓް ވުމުގެ ފުރުސަތު ބޮޑު ކަމަށެވެ.
ފިޗުން ބުނެފައި ވަނީ 2025 ވަނަ އަހަރުގެ ނޮވެމްބަރު މަހު ޖުމްލަ ބޭރު ފައިސާގެ ރިޒާވް 887 މިލިއަން އެމެރިކާ ޑޮލަރަށް އިތުރުވެފައިވީ ނަމަވެސް، ރިޒާވްގެ ކަވަރޭޖް ދަށް މިންވަރެއްގައި ހުރުމުގެ ސަބަބުން، ބޭރުގެ ފަރާތްތަކުން މާލީ އެހީ ހޯދުމަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ.
ދައުލަތުގެ ދަރަނި 8.5 އާއި 9.0 ދެމެދުގެ ބިލިއަން ޑޮލަރަށް އަރާ އިރު، ބޭރުގެ ދައުލަތުގެ ބޭރުގެ ދަރަނި 3.5 އާއި 4.0 ދެމެދުގެ ބިލިއަން ޑޮލަރަށް އަރައެވެ. ގައުމީ އުފެއްދުންތެރި ކަމުގެ ނިސްބަތުން ދަރަނި 120 އާއި 130 އިންސައްތަ އަށް ވަނީ މައްޗަށް ގޮސްފަ އެވެ.
