ރަސްމާލެ ހިއްކުމާ ގުޅިގެން ކުރާ ތިމާވެށީގެ މައްސަލަތަކުގެ ޝަކުވާތަކަށް ރައީސް މުއިއްޒުގެ ތިމާވެއްޓާ ބެހޭ ވަޒީރު ޖަވާބެއް ނުދެއްވި!
ރަސްމާލެ ހިއްކުމާ ގުޅިގެން ތިމާވެށީގެ މައްސަލަތަކުގައި މިހާތަނަށް ކިހާ ޝަކުވާއެއް ލިބިފައިވޭތޯ އާއި އެކަމާ ގުޅިގެން ކޮންޓްރެކްޓަރަށް އެއްވެސް ފިޔަވަޅެއް އެޅިންތޯ ރާއްޖެއެމްވީ އިން މިނިސްޓަރާ ސުވާލު ކުރި ނަމަވެސް މިނިސްޓަރު ވަނީ ކުރި މެސެޖަށް ޖަވާބު ދެއްވުމަށް ދެކޮޅު ހައްދަވައި، ފޯނުން ގުޅުމުން ވެސް ފޯނަށް ޖަވާބު ނުދެއްވާ ފިއްލަވާފަ.
އެންވަޔަރަމަންޓް މިނިސްޓަރު ތޯރިގް އިބްރާހިމް
ސަރުކާރުން ކުރިއަށް ގެންދާ ފުށިދިއްގަރު ފަޅު ހިއްކުމުގެ މަސައްކަތުގެ ސަބަބުން ތިމާވެއްޓަށް ގެއްލުން ލިބެމުންދާތީ ހުށަހަޅަމުންދާ ޝަކުވާތަކާ ގުޅޭ ގޮތުން އެއްޗެއް ވިދާޅުވުމަށް ރައީސް ޑރ. މުހައްމަދު މުއިއްޒު ގެ ތިމާވެއްޓާ ބެހޭ ވަޒީހު ތޯރިގް އިބްރާހިމް ދެކޮޅު ހައްދަވައިފި އެވެ.
ރަސްމާލެ ހިއްކުމާ ގުޅިގެން ތިމާވެށީގެ މައްސަލަތަކުގައި މިހާތަނަށް ކިހާ ޝަކުވާއެއް ލިބިފައިވޭތޯ އާއި އެކަމާ ގުޅިގެން ކޮންޓްރެކްޓަރަށް އެއްވެސް ފިޔަވަޅެއް އެޅިންތޯ ރާއްޖެއެމްވީ އިން މިނިސްޓަރާ ސުވާލު ކުރި ނަމަވެސް މިނިސްޓަރު ވަނީ ކުރި މެސެޖަށް ޖަވާބު ދެއްވުމަށް ދެކޮޅު ހައްދަވައި، ފޯނުން ގުޅުމުން ވެސް ފޯނަށް ޖަވާބު ނުދެއްވާ ފިއްލަވާފަ އެވެ.
ބެލްޖިއަމްގެ ޔާން ޑި ނޫލް ކުންފުނިން ރަސްމާލެ ހިއްކަމުން ދަނީ ތިމާވެއްޓަށް އެއްވެސް މިންވަރަކަށް ބެލުމެއް ނެތި ކަމަށް ތިމާވެށީގެ ތަޖުރިބާކާރަކު ވަނީ ދާދި ފަހުން ވިދާޅުވެފަ އެވެ. ނަން ހާމަ ނުކުރުމަށް ޝަރުތުކޮށް ވާހަކަ ދައްކަވަމުން އޭނާ ވިދާޅުވީ، ރަސްމާލެ ސަރަހައްދަށް އެ ކުންފުނީގެ ބޮޑު ޑްރެޖަރުން ވެލި އަޅަމުންދާ އިރު ފަރުމައްޗަށް ކިސަޑު ފައިބައިގެން ދިއުން ކޮންޓްރޯލު ކުރުމަށް އެއްވެސް ފިޔަވަޅެއް އަޅާފައި ނުވާ ކަމަށެވެ.
އޭނާ ވިދާޅުވި ގޮތުގައި މީގެ އާޚިރު ނަތީޖާ އަކަށް ވެގެން ދާނީ އިއާދަ ނުކުރެވޭ ވަރުގެ ބޮޑު ގެއްލުމެއް ވަށައިގެންވާ ފަރަށާއި، ފަރުގެ ދިރުންތަކަށް ލިބިގެން ދިއުމެވެ.
އޭނާ ވިދާޅުވީ ތަރައްގީގެ މަޝްރޫއުތަކުން ތިމާވެއްޓަށް އަސަރު ކުރާ މިންވަރު ވަޒަން ކުރާ ރިޕޯޓު ހެދުމާ ބެހޭ ގަވައިދަށް މުއިއްޒުގެ ސަރުކާރުން ގެނައި ބަދަލުތަކާ އެކު "މިހާރު އެއީ ނަމެއް ގައި ހަދާ ރިޕޯޓެކެވެ."
އޭނާ ފާހަގަ ކުރެއްވި ގޮތުގައި، ރިޕޯޓް ތައްޔާރު ކުރުމަށް ކުރިން އަމަލު ކުރަމުން އައީ ބައިނަލް އަގުވާމީ ފެންވަރުގައި ގަބޫލު ކުރެވޭ މިންގަނޑުތަކަށް ފެތޭ ގޮތަށެވެ. އެހެން ނަމަވެސް މިހާރު އެ ރިޕޯޓު ހެދުމުގައި އެކުލެވޭ މުހިންމު އެތައް މަރުހަލާތަކެއް ވަނީ ލާޒިމު ނުވާ ގޮތް ހަދާފައެވެ.
އޭނާ ވިދާޅުވީ، ސަރުކާރުގެ މަޝްރޫއެއް ނަމަ ބަލަން ޖެހޭ އެއްވެސް ކަމެއް މިހާރު ނޯންނަ ކަމަށާއި، ޝަކުވާ އެއް ހުށަހެޅި އަސް އޮފިޝަލުންނަށް ކުރެވޭނެ ކަމެއް ވެސް މިހާރު ނޯންނަ ކަމަށެވެ.
ތިމާވެށީގެ ތަޖުރިބާކާރުން ކަންބޮޑުވަނީ، އެތައް މިލިއަން ޑޮލަރުގެ ފައިދާ ބެލްޖިއަމްގެ ކުންފުންޏަށް ލިބޭނެ ކަމަށް ބެލޭ މި މަޝްރޫއުގައި ތިމާވެށީގެ ރައްކައުތެރި ކަމަށް އެއްވެސް ހޭދަ އެއް އެ ކުންފުނިން ކޮށްފައި ނެތް ކަން ފާހަގަ ކުރެވުމެވެ. މަޝްރޫއު އެންމެ ފުރަތަމަ ފެށި އިރު ވެސް އެފަދަ އެއްވެސް ފިޔަވަޅެއް އަޅާފައި ނެތްކަން އޭރު ވެސް ފާހަގަ ކުރެވުނެވެ. މަޝްރޫއުގެ ދަށުން ގާތްގަނޑަކަށް 100 ހެކްޓަރުގެ ބިން ހިއްކި އިރު އެންވަރަޔަންމަންޓަލް މޮނިޓަރިންގ ރިޕޯޓެއްގެ މިންވަރު ވެސް އާންމު ކޮށްފަ އެއް ނުވެ އެވެ.
ފުށިދިގަރު ފަޅު ހިއްކުމުގެ މަސައްކަތުގެ ސަބަބުން ކައިރީގައި ހުރި ފަރުތަކަށް ބޮޑެތި ގެއްލުންތަކެއް ލިބެމުންދާ ދާ ކަމަށް ރައީސް މުހައްމަދު ނަޝީދު ވެސް ވަނީ މި ފަހުން ވިދާޅުވެފަ އެވެ. އެންވަޔަރަންމެންޓަލް އިމްޕެކްޓް އެސެސްމެންޓް ރިޕޯޓުގައި ބަޔާންކޮށްފައިވާ ކަންކަމަށް ވެސް ފުރިހަމަ އަށް އަމަލު ކުރަން ޖެހޭނެ ކަމަށް ވެސް ރައީސް ނަޝީދު ވިދާޅުވި އެވެ.
ރައީސް މުއިއްޒުގެ ތިމާވެއްޓާ ބެހޭ މިނިސްޓަރ ތޯރިގް އިބްރާހިމް އަށް ޓެގް ކުރައްވާ ރައީސް ނަޝީދު ކުރެއްވި ޕޯސްޓުގައި "މިފަދަ ހުރިހާ މަސައްކަތެއް ވެސް ގަވާއިދުތަކާ އެއްގޮތަށް ކުރިއަށް ގެންދެވޭނެކަން ކަށަވަރު ކުރުމަކީ ސަރުކާރުގެ ޒިންމާ އެއް،" ކަމަށް ވިދާޅުވެފައިވެ އެވެ. އަދި ގަވާއިދުތައް ތަންފީޒުކުރުން ކުރިއަށް ގެންދަން ޖެހޭނީ ހާމަކަން ބޮޑު ދެފުށް ފެންނަ ގޮތަށް ކަމަށް ވެސް ރައީސް ނަޝީދު ވިދާޅުވި އެވެ.
ރަސްމާލެ ހިއްކަން މާފުށި ކައިރިން ވެލި ނަގާތީ އެކަމާއި ދެކޮޅަށް މިދިއަ ޑިސެމްބަރު މަހު ވަނީ މާފުށީގައި މުޒާހަރާ ވެސް ކޮށްފަ އެވެ.
ފުށިދިއްގަރު ފަޅު ހިއްކުމުގެ ސަބަބުން ކައިރީގައި ހުރި ފަރުތަކަށް ގެއްލުން ވަމުންދާކަން ފާހަގަ ކުރެވިފައި ވަނިކޮށް، ހުޅުމާލެ ފޭސް ތިނެއް ހިއްކުމުގައި ކުނި އަޅާ ކަމުގެ މައްސަލަ އެއް ވެސް ވަނީ ފެންމަތިވެފައެވެ. އެކަން ވެސް ރައީސް މުއިއްޒު ދޮގު ކުރައްވާފައި ވަނިކޮށް އެ ސަރަހައްދުން ގިނަ އަދަދެއްގެ ކުނި އެއްގަމާއި މޫދުން ފެންނަ ވީޑިއޯ ތައް ވެސް ވަނީ އާންމުވެފަ އެވެ.
