އެމްޑީޕީ އިން އެކުގައި މަސައްކަތް ނުކުރާނަމަ ވަރަށް ބޮޑު ލޮޅުމެއް އަރައި، 10 އަހަރު ގައުމު ފަހަތަށް ދާނެ: ބިގޭ

ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)އިން އެކުގައި މަސައްކަތް ނުކުރާނަމަ ގައުމަށް ވަރަށް ބޮޑު ލޮޅުމެއް އަރާނެ ކަމަށާއި، 10 އަހަރު ފަހަތަށް ދާނެ ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެ އެވެ.

ރާއްޖެޓީވީގެ ޓީވީޓޯކް ޕްރޮގްރާމްގައި ބިގޭ ވަނީ މި ސަރުކާރުގައި ގައުމާ ރައްޔިތުންނަށް ލިބެމުންދާ ގެއްލުމާއި ދެރަ ނިކަމެތި ކަަމަށް އަލިއަޅުއްވާލައްވާ ވާހަކަ ދައްކަވާފަ އެވެ. ރާއްޖޭގައި އޮތީ ދެ ފިކުރު ކަމަށާއި، އެއީ އެމްޑީޕީ ފިކުރާއި، ރައީސް ޑރ.މުހައްމަދު މުއިއްޒު ސަރުކާރުގެ ފިކުރު ކަމަށް އޭނާ ވިދާޅުވި އެވެ.

ބިގޭ ވިދާޅުވީ އެމްޑީޕީ ބައިބައިވެ ވަކިވެގަތުމަކީ ސަރުކާރަށް ލިބޭނެ ވަރަށް ބޮޑު އުފަލެއް ކަމަށާއި، އެކަތިގަނޑެއްގެ ގޮތުގައި އެމްޑީޕީ މަސައްކަތް ކުރަން ސަރުކާރުން ބޭނުން ނުވާނެ ކަމަށެވެ. އެކުގައި މަސައްކަތް ފެށުމަކީ ސަރުކާރަށް ސިހުން ގެނުވާނެ ކަމެއްގެ ގޮތުގައި އޭނާ ސިފަ ކުރެއްވި އެވެ. 

އެމްޑީޕީ އަށް އިޝާރާތް ކުރައްވައި ބިގޭ ވިދާޅުވީ އެމްޑީޕީ އަބަދުވެސް މަސައްކަތް ކުރަމުންދަނީ ރައްޔިތުންގެ ހައްގުތައް ކަށަވަރު ކޮށްދިނުމަށް ކަމަށާއި، ރައްޔިތުން އެދޭ ގޮތަށް މިނިވަންކަމާއެކު ގައުމު ބިނާ ކުރުމަށް ކަމަށެވެ. ނަމަވެސް ވެރިކަން ބަދަލުވެ މިއަދު އެހާލަތު ބަދަލުވެފައިވާ ކަމަށް ބިގޭ ވިދާޅުވި އެވެ. 

ބިގޭ ވިދާޅުވީ ގައުމު ރަނގަޅު މިސްރާބަށް ގެންދިއުމަށްޓަކައި އަދި ރައްޔިތުންގެ ހައްގުގައި އެމްޑީޕީން އެކުގައި މަސައްކަތް ކުރަން ޖެހޭ ކަމަށާއި، އެގޮތަށް މަސައްކަތް ނުކޮށްފިނަމަ ގައުމަށް ވަރަށް ބޮޑު ލޮޅުމެއް އަރާނެ ކަމަށެވެ. އެމްޑީޕީން ވަކިވެގެންދާ މީހުންގެ ހަޔާތުން 5 އަހަރު ގެއްލި ގައުމު ވެސް 10 އަހަރު ފަހަތަށް ދާނެ ކަމަށް އޭނާ ވިދާޅުވި އެވެ. 

އެމްޑީޕީއަކީ އަބަދުވެސް ރައްޔިތުންގެ ހައްގުތައް ކަށަވަރު ކޮށްދޭން މިނިވަންކަމާއެކު ރާއްޖޭގައި  އޭގެ ޒާތުގައި ކުރިއަށްދާނެ ގައުމެއް ބިނާ ކުރުމަށް މަސައްކަތް ކުރަމުން އަންނަ ޕާޓީއެއް އެނގޭތޯ. މިގޮތަށް މަސައްކަތް ނުކުރެވުނީމާ ނިކަމެތިކަން ލިބެނީ އަޅުގަނޑުމެންގެ ތެރޭގައި ހިޔާލު ތަފާތުވެގެން ނުކުންނަ ބޭފުޅުންނަށް އެކަންޏެއް ނޫން. އެމްޑީޕީއާ ދޭތެރޭގައި ހިތުގައި އޮތް ލޮއެތްބާ، އެކަނޑާލި އަސް އެމްޑީޕީ ވަންތަ ލޭ އަންނަ ގޮތަށް ތިބޭ ބޭފުޅުންގެ ހިތުގައި ވެސް އެނުތަނަވަސްކަމާއި އެ ހިތްދަތިކަން އިހުސާސް ކުރެވޭ. އަދި އޭގެ ނިކަމެތިކަން ލިބެނީ ހިޔާލުތަފާތުވުން ތަކުގައި ނުކުމެގެންދާ ބޭފުޅުންނާ ވެސް އެކުގައި އިނގޭތޯ. އެބޭފުޅުންގެ ހަޔާތުން ވެސް 5 އަހަރު ގެއްލުނީ. ގައުމުގެ ހަޔާތުން ވެސް ގައުމުގެ ކުރިއެރުމާ ތަރައްގީއަށް އޮތް 5 އަހަރުން 5 އަހަރެއް ގެއްލި މާޒީގެ ވެރިކަން ފެންނަން އޮތް ގޮތަށް ބަލާއިރު ގެއްލި ދިޔައީ އިނގޭތޯ.  

އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)

ބިގޭ ވިދާޅުވީ މާޒީން މިހާރު ތަޖުރިބާ ލިބިފައިވާ ކަމަށާއި، ޕާޓީގެ ޕްރައިމަރީ އަށްފަހު ވެސް ހިޔާލުތަފާތުވުން ތަކާއެކު ވެސް އެކުގައި ކުރިއަށްދާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. މި މަސައްކަތުގައި އެމްޑީޕީއާއެކު ރައްޔިތުން ބައިވެރިވާން ޖެހޭ ކަމަށާއި، އެނޫން ގޮތަށް ގައުމުގެ ކުރިމަގު ނުފެންނާނެ ކަމަށް ބިގޭ ވިދާޅުވި އެވެ.