ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ހައްޔަރުކުރި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރުގެ ބަންދަށް ހުކުރު ދުވަހު ކްރިމިނަލް ކޯޓުން 5 ދުވަސް ޖަހާފަ އެވެ. މިކަމާ ގުޅިގެން ހުކުރު ދުވަހުގެ ރޭ އެމްޑީޕީ އިން ވަނީ ކުއްލި ހަރަކާތުގެ ނަމުގައި ހަރަކާތެއް ބާއްވާފަ އެވެ.
ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް
މިއަދު ފެންނަނީ ރައްޔިތުންގެ މަޖިލީހުގެ މެޖޯރިޓީ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހު އާއި، މަޖިލީހުގެ ރައީސް އަބްދުއްރަހީމް އަބްދުﷲ ފެއިލް ވެފައިވާ މަންޒަރު ކަމަށް މަޖިލީހުގެ ކަނޑިތީމު ދާއިރާގެ އެމްޑީޕީ މެންބަރު އަމީން ފައިސަލް ވިދާޅުވެއްޖެ އެވެ.
ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ހައްޔަރުކުރި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރުގެ ބަންދަށް ހުކުރު ދުވަހު ކްރިމިނަލް ކޯޓުން ވަނީ 5 ދުވަސް ޖަހާފަ އެވެ. މިކަމާ ގުޅިގެން ހުކުރު ދުވަހުގެ ރޭ އެމްޑީޕީ އިން ވަނީ ކުއްލި ހަރަކާތުގެ ނަމުގައި ހަރަކާތެއް ބާއްވާފަ އެވެ.
މި ހަރަކާތުގައި ވާހަކަ ދައްކަވަމުން މެންބަރު އަމީން ވިދާޅުވީ ސުލްހަވެރިކަމާ އެކު އިހުތިޖާޖު ކުރަމުން ދިއަ މަޖިލީހުގެ މެންބަރެއް ފުލުހުން އަނިޔާވެރި ކަމާއެކު ހައްޔަރު ކޮށްފައިވާއިރު ފުލުހުން ވަނީ މަޖިލީހުގެ އިމްތިޔާޒަށް އަރައިގަނެފައި ކަމަށެވެ. އަދި ހޯމް މިނިސްޓަރު އަލީ އިހުސާން ވެސް މަޖިލީހުގެ އިމްތިޔާޒަށް އަރައިގަނެފައިވާ ކަމަށެވެ.
އެބޭފުޅުންގެ ސުޕަރ މެޖޯރިޓީ އެއޮތީ. މެޖޯރިޓީ ލީޑަރު ފަލާހު އާއި ރައްޔިތުންގެ މަޖިލީހުގެ ރައީސް އާއި ނައިބު ރައީސް މިއަދު ފެއިލް ވެއްޖެ. ރައްޔިތުންގެ މަޖިލީހުގެ އިމްތިޔާޒް އަށް ހޯމް މިނިސްޓަރު އަރައިގަނެއްޖެ. ފުލުހުން އަރައިގަނެއްޖެ. މަޓޭ ޖަލަށް ލައިގެން މައިތިރި އެއް ނުކުރެވޭނެ. އެމްޑީޕީ ޕީޖީ ގައި ތިއްބަވާ 12 މެންބަރުން ލައިގެން ވެސް ލާހިކެއް ނޫން މައިތިރި ކުރާކަށް،ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް
ސަރުކާރުގެ އަމަލުތައް މިހެން ހުރި އިރު މަޖިލީހުގެ ރައީސް އަބްދުއްރަހީމް އާއި މެޖޯރިޓީ ލީޑަރު ހަނު ހުންނެވުމުން ދޭހަވަނީ ޕީއެންސީގެ ކޮންޓްރޯލް އޮތް 20 ވަނަ މަޖިލިސް ފެއިލް ވެފައިވާ މިންވަރު ކަމަށް ވެސް އަމީން ވިދާޅުވި އެވެ.
މެންބަރު މައުރޫފް ފުލުހުންގެ ބެލުމުގެ ދަށަށް ގެންގޮސްފައިވާ މައްސަލަ މަޖިލީހުގެ އިމްތިޔާޒާއި ސުލޫކު ކޮމެޓީއިން ބަލައި ދިނުމަށް އެދި ހުށައަޅާފައިވާއިރު ބުރާސްފަތި ދުވަހުގެ ރޭ އެ ކޮމިޓީ ބައްދަލު ވުމެއް ވެސް ވަނީ ބާއްވާފަ އެވެ. ނަމަވެސް އިމްތިޔާޒާއި ސުލޫކު ކޮމެޓީގައި ވޯޓަށް އަހަން ބޭނުންވާ މިންވަރަށް މެމްބަރުން ހަމަ ނުވުމުން އެއްވެސް ކަމަކަށް ވޯޓަށް އެހޭ ގޮތެއް ނުވި އެވެ.
މިކަމަށް އިޝާރާތް ކުރައްވާ މެންބަރު އަމީން ވިދާޅުވީ ޕީއެންސީގެ ފުލް މެޖޯރިޓީ އޮތް މަޖިލިހުގެ ކޮމިޓީ ބޭއްވެން ޖެހޭނެ ކަމަށެވެ. އަދި ކޯރަމް ވެސް ހަމަ ކުރެވެން ޖެހޭނެ ކަމަށެވެ.
ބުރާސްފަތި ދުވަހުގެ ރޭ ބޭއްވި އެ ކޮމިޓީ އަށް ހާޒިރުވީ 5 މެމްބަރުންނެވެ. ވޯޓަށް އަހަން ކޯރަމް ހަމަ ވަނީ 6 މެމްބަރުން ކޮމިޓީގެ ބައްދަލުވުމުގައި ތިބެގެންނެވެ.
ކޮމިޓީ އަށް ހާޒިރުވި 5 މެމްބަރުންނަކީ ކޮމިޓީގެ މުގައްރިރު ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު، ކަނޑިތީމް ދާއިރާގެ މެމްބަރު އަމީން ފައިސަލް ގެ އިތުރުން، ހުޅުމާލެ އުތުރު ދާއިރާގެ މެމްބަރު ހުސައިން ޝަރީފް، މަޑުއްވަރީ ދާއިރާގެ މެމްބަރު އަހުމަދު ޒާހިރު އަދި މަޑަވެލި ދައިރާގެ މެމްބަރު މުހައްމަދު ޝަމީޒް އެވެ.
މި ކޮމިޓީގައި ތިއްބަވާ 11 މެންބަރުންގެ ތެރެއިން މި ކޮމިޓީ ބައްދަލުވުމަށް ހާޒިރުވެވަޑައިނުގަންނަވަނީ މެދުހެންވޭރު ދާއިރާގެ ޕީއެންސީ މެންބަރު ހުސައިން ނާސިހް އާއި، މަކުނުދޫ ދާއިރާގެ ޕީއެންސީ މެންބަރު އާދަމް ޝަފީގް އާއި، މިލަންދޫ ދާއިރާގެ ޕީއެންސީ މެންބަރު ހަސަން މުފީދު އާއި، ބިލެތްދޫ ދާއިރާގެ ޕީއެންސީ މެންބަރު އަހްމަދު އަސްލަމް އާއި، ކިނބިދޫ ދާއިރާގެ ޕީއެންސީ މެންބަރު އަލީ އަޝްރަގް ގެ އިތުރުން ހިތަދޫ މެދު ދާއިރާގެ ޕީއެންސީ މެންބަރު އަހްމަދު އަޒާން މަރްޒޫގް އެވެ.
މި ބައްދަލުވުން ފެށިތާ 10 ވަރަކަށް މިނިޓު ތެރޭގައި ބައްދަލުވުން ވަނީ ނިންމާލާފަ އެވެ.
