2023 ގައި އެމްޑީޕީ އަށް ލިބުނު ޑެމޭޖަކީ ހަރުދަނާ ވުމަށް ލިބުނު ފުރުސަތެއް: މެންބަރު މީކާއީލް
2 ޖެނުއަރީ 2026 | ހުކުރު 06:22ރާއްޖޭގެ ސިޔާސީ ޕާޓީތަކަށް އިޝާރާތް ކުރައްވައި މެންބަރު މީކާއީލް ވިދާޅުވީ އެހެން ސިޔާސީ ޕާޓީތަކާ ހިލާފަށް ޕާޓީއެއްގެ ގޮތުގައި ދެމިއޮތް ހަމައެކަނި ޕާޓީއަކީ އެމްޑީޕީ ކަމަށް.
އެމްޑީޕީގެ ހަރުގޭގައި ބޭއްވި ޖަލްސާއެއް ގައި ރައްޔިތުން މަޖިލީހުގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް ވާހަކަ ދައްކަވަނީ
ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަށް 2023 ގައި ލިބުނު ޑެމޭޖަކީ ހަރުދަނާ ވުމަށް ލިބުނު ފުރުސަތެއް ކަމަށާއި، މިހާރު ޕާޓީއަށް އިތުރު ކުރިއެރުންތައް ލިބެމުންދާ ކަމަށް ރައްޔިތުން މަޖިލީހުގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު މީކާއީލް ވަނީ 2023 ވަނަ އަހަރު އެމްޑީޕީގެ ބައިބައިވުމުގެ ނަތީޖާ އަށް އަލިއަޅުއްވާލައްވާ ވާހަކަ ދައްކަވާފަ އެވެ. މެންބަރު މީކާއީލް ވިދާޅުވީ ޕާޓީ އަށް ވަރަށް ބޮޑު ޑެމޭޖެއް ލިބުނު ކަމަށާއި، އޭގެ ނަތީޖާއަކީ މިއަދު އެމްޑީޕީ ވެރިކަމުގައި ނެތުން ކަމަށެވެ.
ރާއްޖޭގެ ސިޔާސީ ޕާޓީތަކަށް އިޝާރާތް ކުރައްވައި މެންބަރު މީކާއީލް ވިދާޅުވީ އެހެން ސިޔާސީ ޕާޓީތަކާ ހިލާފަށް ޕާޓީއެއްގެ ގޮތުގައި ދެމިއޮތް ހަމައެކަނި ޕާޓީއަކީ އެމްޑީޕީ ކަމަށެވެ. އެއާއެކު އަދިވެސް ރައްޔިތުންގެ އުންމީދާ އިތުބާރު އޮތީ އެމްޑީޕީ އަށް ކަމަށް އޭނާ ވިދާޅުވި އެވެ.
މީގެ އިތުރުން މެންބަރު މީކާއީލް ވިދާޅުވީ ޕާޓީއަށް 2023 ވަނަ އަހަރު ބޮޑު ޑެމޭޖެއް ލިބުނު ނަމަވެސް މިއަދާ ހަމައަށް ޕާޓީއަށް ކުރިއެރުންތަކެއް ލިބިފައިވާ ކަމަށާއި، އެކުރިއެރުންތައް ލިބޭ މަންޒަރު ފެންނަ ކަމަށެވެ. އަދި އިތުރު ހަރުދަނާ ކަމެއް ޕާޓީއަށް ލިބިފައިވާ ކަަމަށް މެންބަރު މީކާއީލް ވިދާޅުވި އެވެ.
ޑެމޭޖް ލިބުނީމަ ތެދެއްތޯ މިހާރު ވެރިކަމުގައި އެމްޑީޕީ އަޅުގަނޑުމެން މި ނެތީ. އެކަން އަޅުގަނޑުމެން ގަބޫލުކުރަން ޖެހޭނެ. ދެން އެކަމަކު ޑެމޭޖް ވެގެން ވެސް ޕާޓީއެއްގެ ގޮތުގައި އަދި ދިވެހިރާއްޖޭގައި ސިޔާސީ ޕާޓީއެއް އުފެދުނީއްސުރެ އެގޮތުގައި ދެމިއޮތް ޕާޓީއަކީ ހަމަ އެމްޑީޕީ. އެމްޑީޕީގައި ޕްރައިމަރީއެއް އޮންނާނެ ކަމުގެ ޔަގީންކަން ވެސް މިއޮންނަނީ. މިސާލަކަށް ދަންނަވާ ކަމަށްވާނަމަ ލޯކަލް ކައުންސިލް އިންތިޚާބުގެ ޕްރައިމަރީތަކުގައި ޕީއެންސީގެ ދައިރާތަކުގައި އަޅުގަނޑުމެންނަށް ހަމަ ވަރަށް ގަދައަށް ކެންޕޭންގައި އުޅުއްވި ބޭފުޅުން މިހާރު އަހާލީމަ ބުނަނީ ރައީސް އޮފީހުން އަންގައިގެން މިހާރު ނުލާ ގޮތަށްށޭ. އެހެންވީމަ ރައީސް އޮފީހާ ހަމައިން ކަންކަން ނިމޭ ޕާޓީއެއްގެ ގޮތުގައި ޕީއެންސީ އޮންނަހާ ހިނދެއްގައި އަނެއްކާ ވެސް ޕީއެންސީގެ ކުލަ ޕީއެންސީގެ ނަން ބަދަލުވެގެންދާތަން ފެންނާނެ.ރައްޔިތުން މަޖިލީހުގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް
މެންބަރު މީކާއީލް ވިދާޅުވީ މިއަދު ރާއްޖޭގައި ފެން ހިފޭ މުއައްސަސާއެއްގެ ގޮތުގައި އަދި ބޮޑު ރައުސްމާލެއް، ތަރިކައެއްގެ ގޮތުގައި އެމްޑީޕީ އެބައޮތް ކަމަށެވެ.
އެހެންކަމުން ގައުމާއެކު ރައްޔިތުން ކުރިއަށް ދިއުމުގައި އެމްޑީޕީއާއެކު ކުރިއަށްދާން ޖެހޭ ކަމަށާއި، ރައްޔިތުން ބޭނުންވާ ޑިމޮކްރަސީ ހިފަހައްޓާ ޕާޓީ އަކީ އެމްޑީޕީ ކަމަށް މެންބަރު މީކާއީލް ވިދާޅުވި އެވެ.
