ކުރިން ބޭސްފަރުވާ އަށް ސަލާން ޖަހަން ދަނީ ރައީސުލްޖުމްހޫރިއްޔާގެ ގެ ކޮޅު، "ތީމުގެ" އަށް، މިހާރު ދަނީ ރައީސް މުއިއްޒު ގެ ބައްދަލުވުމަށް!

ބޭސް ފަރުވާ އަށް ސަލާންޖެހުން ނައްތާލުމު ގެ ވާހަކަ އަކީ ދިވެހިރާއްޖެ ޑިމޮކްރަސީ އަށް ދަތުރު ކުރި އިރު އެންމެ ބޮޑަށް ދެކެވުނު އެއް ވާހަކަ އެވެ. ރާއްޖެ އަށް ޑިމޮކްރަސީ އައިސް ޑިމޮކްރަސީ ފައްކާވެފައިވާ ކަމަށް މިއަދު މި ދަނީ ބުނަމުންނެވެ. އެކަމަކު ބޭސްފަރުވާ އަށް ރައްޔިތުން ސަލާން ޖެހުން މިއަދު އާއްމުވެފައިވާކަން އާއްމު ރައްޔިތުންގެ ވާހަކަތަކުން ހާމަވެ އެވެ.  

ކުރިން ބޭސްފަރުވާ އަށް ސަލާން ޖަހަން ދަނީ ރައީސުލްޖުމްހޫރިއްޔާ ގެ ގެ ކޮޅު، "ތީމުގެ" އަށް، މިހާރު ދަނީ ރައީސް މުއިއްޒު ބާއްވާ ބައްދަލުވުމަށެވެ. ދެން ވެސް ބުނަންވީ ރައީސް އާއި ބައްދަލުކޮށް މިހެން ބުނެވުނީތީ ހާދަހާ ހެޔޮފުޅޭ ހާދަ ހިތްހެވޭ ތޯ އެވެ؟ ދިވެހީން ދާ އޮހޮރުވައިގެން ހޯދި ޑިމޮކްރަސީގެ ފަންވަރަކީ އެއީތޯ އެވެ؟  

ރައީސް އާއި އެކު ބާއްވާ ބައްދަލުވުންތަކުގައި އެންމެ އާއްމުކޮށް ދައްކާ އެއް ވާހަކަ އަކީ ބޭސްފަރުވާގެ ނިޒާމް މިހާރު އަމުދުން ދޯހަޅިވެފައިވާ ވާހަކަ އެވެ. ބޭސް ނުލިބޭ ވާހަކަ އެވެ. ބޭސް ނުލިބިގެން ވަގަށް ބޭސް ގެންނަ މީހުންގެ ވިޔަފާރި ފުޅާ ކުރާ ވާހަކަ އެވެ.  ކައިރި ގައުމުތަކަށް ބޭސް ފަރުވާކުރަން ދާއިރު އާސަންދަ ލިބެން އޮތް ނިޒާމުގައި ހަމަހަމަ ކަމެއް ނެތް ވާހަކަ އެވެ.

"މީގެ 8 ދުވަސް ކުރިން ދިޔައިން އިންޑިއާ އަށް. ދެ ފަހަރު އާސަންދަ އަށް އެދިގެން ވެސް ނުލިބުނު. ރޮބޮޓިކް ސަރޖަރީ އެއް ކުރަން ޖެހުނީ. ފައިސާ އެއް ނުދެމޭ އާސަންދައިން ބުނީ. ދެން އެންސްޕާ އިން ހެދީ މަކަރާއި ހީލަތް. އަނގައިން ނުބުނެ މަޑުކޮށްލައިގެން ތިބީ. ތިބެފައި ބުނީ ކުރި ޚަރަދަށް ފައިސާ ދެވެން ނެތޭ. ކިހާ ރީތިތޯ." އާއްމު މީހަކު ބުނެފައިވެ އެވެ.

ރާއްޖެ އިން ބޭރުން ކޮންމެހެން ބޭސް ގެންނަން ޖެހޭ މީހުންގެ ބޭސް ގެނެސްދިނުމުގައި ވެސް ފަރުވާކުޑަކަން އިންތިހާ އެވެ. ބަލި މީހާގެ ރައްކާތެރިކަން ނެތި ދާ އިރު މުއައްސަސާތަކަށް ރޭކާ ވެސް ނުލަ އެވެ. ތިމާ އަށް ހައްގު އަސާސީ ބެސްފަރުވާ ހޯދަން ދާން މިޖެހެނީ ރައީސްގެ ބައްދަލުވުމަށެވެ. އެތައް އިރަކު މަޑުކޮށްގެން ރައީސް އަށް އާދޭސް ދަންނަވައިގެން ނޫން ގޮތަކަށް މިކަން ވާން ނެތުން މިއީ އާއްމު މީހާ އަށް ލިބޭ ކިހާ ބޮޑު ނިކަމެތިކަމެއްތޯ އެވެ؟

" އަޅުގަނޑުގެ ބަލީގެ ގޮތުން އަޅުގަނޑުގެ ދިފާއީ ނިޒާމު ދައްކޮށް ހުންނަނީ. ދައްކޮށް ހުންނާތީވެ އިންޖެކްޝަންތަކެއް ޖަހައިގެން އަޅުގަނޑު އުޅެން ޖެހެނީ. ދެމަހުން ދެމަހުން ބޭސްތައް ވެސް ގެންނަން ޖެހެނީ ބޭރުން. އެސްޓީއޯ ފާމަސީން ކޮންމެ ފަހަރަކު އަޅުގަނޑު. މީ ބޭސް ގެންނަން ވެސް އެހާ އުނދަގޫ. ދެމަހުން ދެމަހުން ގެންނަންޖެހޭ ބޭހެއް. ދެމަހުން ދެމަހުން ޖަހާ ބޭހެއް. ތިންމަހުން މި ބޭފުޅުންނަށް ގެނެވެނީ. މިއަށްވުރެ ފަސޭހަ ގޮތެއް ހައްދަވާ ދެއްވާށޭ." އާއްމު މީހަކު ބުނެފައިވެ އެވެ. 

މިއީ އާއްމު މީހުންގެ އުދާސްތަކެވެ. އާދޭހުގެ އަޑެވެ. ރައްޔިތުން ކެކުޅުމާއި އާދޭހާ އެކު އެދެނީ ރާއްޖޭގެ ސިއްހީ ނިޒާމު ނަގަހައްޓާ ދިނުމަށެވެ. ފެއިލް ވެފައިވާ ސިއްހީ ނިޒާމުގެ ސަބަބުން ބަލި މީހާ އިތުރު ތަކުލީފުތަކާއި ކުރިމަތިލުން ނިމުމަކަށް ގެނައުން އެދި އެދަނީ ކެނޑި ނޭޅި އާދޭސްކުރަމުންނެވެ. އެހެންވީމަ ބޭސްފަރުވާ އަށް ސަލާންޖެހުން މިހާރު ނައްތާލެވިފަ އެއް ނެތެއް ނޫންތޯ އެވެ.