އަސާސީ ޚިދުމަތްތައް ހުއްޓުވާ، ސަރުކާރު ތެޅި ފޮޅެނީ ކަނޑު އަޑީގައި ޓަނަލް ނޭޅިގެން!
ރައީސް މުއިއްޒުގެ ސަރުކާރު ވައުދާއި ރިބަން ކެނޑުމުގައި ރިކޯޑު ހައްދަވަމުން ދާއިރު، ރައްޔިތުން ދިރިއުޅެނީ ސާފު ފެން، ކަރަންޓް، ބޭސް ފަދަ އަސާސީ ހައްގުތަކުން މަހުރޫމް ވެގެންނެވެ.
ފުވައްމުލަކާއި އައްޑޫ ފަދަ ބޮޑު ސިޓީތަކުގައި ރައްޔިތުންނަށް ސާފު ފެނާއި ކަރަންޓެއް ނުލިބޭ
ރައީސް މުއިއްޒު ވައުދުވެވަޑައިގަންނަ ވަނީ ކަނޑުއަޑީގެ ޓަނަލް އަޅުއްވަން، އައްޑޫ ސިޓީގައި ކަރަންޓު ނެތް އިރު ފުވައްމުލަކުގައި ފެނެއް ނެތް
ރައީސް ޑރ. މުހައްމަދު މުއިއްޒުގެ މި ސަރުކާރަކީ ރިކޯޑު ހައްދަވަން މޮޅު ސަރުކާރެކެވެ. މި ސަރުކާރަކީ މެޑަލް ޖެހުމާ، ރިބަން ކެނޑުމުގައި ފާހަގަ ކޮށްލެވޭ، ތާރީޚީ ކާމީޔާބީތަކެއް ހޯދަމުން ދާ ސަރުކާރެކެވެ. ވައުދުތައް ވުމާއި، ކަރުދާހުން ބޮޑެތި ކަންކަން ނިންމާލުމުގައި ވެސް ހަމަ އެއްވަނަ އެވެ. ސަރުކާރުގެ އިސްވެރިން ދައްކަވާ ވާހަކަތަކުން ދެންމެ ދެންމެ ގައުމަށް ދިމާވެފައިވާ ހުރިހާ މައްސަލަ އެއް ފޮހެވިގެން، ގެއްލިގެން، ނިމިގެން ހިނގައިދާނެ ހެން ހީވެ އެވެ. ވާހަކަ އަޑު އަހާ މީހަކަށް ހީވާނީ ފަންސޫރަކުން ލިޔެފައިވާ ލިޔުމެއް ފޮހޭ ރަބަރަކުން ފޮހެލަން އުޅޭ ހެންނެވެ.
ނަމަވެސް މިއަދު ގައުމުގެ ހާލަތު އޮތީ ސަރުކާރުން ބޭނުން ވީމާ ލިޔުމެއް ފޮހެލާހެން މައްސަލަތައް ފޮހެލެވޭ ހާލަތެއްގަ އެއް ނޫނެވެ. ހުރި މައްސަލަތަކަކީ ސިކުންތަކުން ހައްލުވާނެ ކަހަލަ މައްސަލަތަކެއް ވެސް ނޫނެވެ. ރައްޔިތުންނަށް ދިމާވެފައި ވަނީ ސަރުކާރު އޮތް ޚިޔާލީ ދުނިޔެއަށް ނުފެންނަ، ހަގީގީ މައްސަލަތަކެވެ.
އެއްބަޔަކު ދިރިހުރުމަށް ބޭނުންވާ އެންމެ އަސާސީ ފެނަށް ވެސް ސަލާންޖަހަނީ އެވެ. އަނެއް ބަޔަކު ކޮންމެހެން ބޭނުންވާ ޒަރޫރީ ބޭސް ނުލިބިގެން ސަލަންޖަހާއިރު ދެން ތިބި މީހުން ކަރަންޓު ނެތި، އަނދިރިކަމާ ހޫނު ކަންމަތީ ތިބިއިރު، ގައުމުގެ ހުރިހާ ރައްޔިތުން ކަހަލަ ގޮތަކަށް ދިރިއުޅުމުގެ ކަންކަން ދެކޮޅު ނުޖެއްސިގެން ތެޅިފޮޅެނީ އެވެ. ފުވައްމުލަކު ސިޓީ ފަދަ ބޮޑު ސިޓީއެއްގައި ދިރިއުޅޭ އެތައް ބަޔަކު މިއަދު އެވަނީ ފެނަށް ޖެހިފަ އެވެ. އެއޮށް ބޮޑު އައްޑޫ ސިޓީއަށް ކަރަންޓު ލިބެނީ ދަމަކުން ބެރެއް ޖަހާ އުސޫލުންނެވެ.
މިއީ "ސްމާޓް ސިޓީ" އެއް ނުލިބިގެން ކުރާ ޝަކުވާ އެއް ނޫނެވެ. މިއީ އިސްކުރުތަކުން ސާފު ފެން ނުލިބޭތީ ފާޅުކުރާ ކަންބޮޑުވުންތަކެވެ. ސޮކެޓުތަކުން ކަރަންޓު ނުލިބި، ހޫނާ އަނދިރީގައި އުޅެން ޖެހިފައިވާ ބައެއްގެ އަސާސީ ހައްގުތަކެއް ގަސްތުގައި ނިގުޅައިގެންފައިވާތީ ދައްކާ ވާހަކައެވެ. މި ސަރުކާރު ދިރިއުޅެނީ މުޅިން ތަފާތު ރާއްޖެއެއްގަ އެވެ. ރައްޔިތުން އުޅޭ ހާލުގެ އެއް އިންސައްތަ ވެސް ސަރުކާރަށް އެނގޭހެން މި ބޭފުޅުންގެ ވާހަކަތަކުން ހިޔެއް ނުވެއެވެ.
ގަވާއިދުން ބޭސް ބޭނުން ކުރާ މީހުންނާ ދިގު މުއްދަތަކަށް ބޭސް ބޭނުންކުރާ މީހުންނަށް މިއަދު މިވަނީ އެއް ފާމަސީ އިން އަނެއް ފާމަސީއަށް ދުވަން ޖެހިފަ އެވެ. މީހުން އަސާސީ ހައްގުތަކުން މަހުރޫމް ވެފައިވާއިރު، ރައްޔިތުންގެ އޮތީ ހަމަ އެންމެ އާދޭހެކެވެ. ސަރުކާރުން އެ ތިބި ރާއްޖެއަކުން ރައްޔިތުން ދިރިއުޅެމުންދާ ހަގީގީ ރާއްޖެއަށް އަނބުރާ އައުމަށް ކުރާ އާދޭހެވެ. ބޮޑެތި ބިޔަ މަޝްރޫއުތަކާ ކަނޑުއަޑީގެ ޓަނަލްތަކުގެ ވާހަކަ ނުދައްކާ، ދިމާވެފައިވާ ހަގީގީ މައްސަލަތަކަށް ހައްލު ހޯދައިދިނުމަށް އެދި ކުރާ އާދޭހެވެ.
ފުވައްމުލަކާއި އައްޑޫ ފަދަ ބޮޑު ތަންތަނަށް ދާއިމީ ފެނާއި ކަރަންޓު ނުލިބޭއިރު، ގައުމު މިއަދު އޮތީ ބޭސްފަރުވާގެ ކަންކަމަށް ވެސް ރައްޔިތުން އެއްވެސް ވަރަކަށް ބަރޯސާ ނުކުރާފަދަ ހާލަތެއްގަ އެވެ. ބަތާ ގަރުދިޔަ ކައިގެން ރައްޔިތުން އުޅެން ބުނީ ނުހަނު އަޑަށް ބާރުލާފަ އެވެ. ނަމަވެސް އަޑެއް ނެތި، ރައްޔިތުން ކަނު އަނދިރީގައި ބައިތިއްބާ ސާފު ފެނުން މަހުރޫމު ކޮށްލަން ތިކުރާ މަޖުބޫރީ އަމުރުގެ އަޑު މިއަދު މާ ގަދަ އެވެ.
