ޗިލީ ގެ ސަރުކާރު ހިންގާ ޕާޓީ ބަލިކޮށް އިދިކޮޅު ލީޑަރ ކާސްޓް ރައީސް ކަމަށް އިންތިޚާބުވެއްޖެ

ވެރިކަން ހިންގާ ޕާޓީ ބަލިކޮށް އިދިކޮޅު ލީޑަރު ހޯސޭ އެންޓޯނިއޯ ކާސްޓް ޗިލީގެ 38 ވަނަ ރައީސް ކަމަށް އިންތިޚާބު ވެއްޖެ އެވެ.

ކާސްޓް އިންތިޚާބު ކާމިޔާބު ކުރެއްވީ ދެވަނަ ބުރުގެ ވޯޓުގެ ނަތީޖާ އާ އެކުގަ އެވެ. 

އާދީއްތަ ދުވަހު، ގާތްގަނޑަކަށް ހުރިހާ ވޯޓެއް ގުނާ ނިމުނު އިރު، ކާސްޓް ވަނީ ވޯޓުގެ 58 ޕަސެންޓް ހޯއްދަވާފަ އެވެ.

ވެރިކަން ހިންގާ ކޮމިއުނިސްޓް ޕާޓީގެ ފަރާތުން އިންތިޚާބުގައި ވާދަ ކުރެއްވީ ލޭބަރ މިނިސްޓަރ ޖެނެޓް ޖާރާ އެވެ.

ދެކުނު އެމެރިކާ ގައި އޮންނަ ޗިލީ ގެ އިންތިޚާބުން ބަލިވިކަން ޖާރާ އާއި އޭނާގެ ކޯލިޝަން، ޔުނިޓީ ފޯ ޗިލީ އިން ވަނީ ގަބޫލު ކޮށްފަ އެވެ.

މި ނަތީޖާ އަކީ 59 އަހަރުގެ ރިޕަބްލިކަން ޕާޓީގެ ލީޑަރު ކާސްޓް އަށް ލިބުނު ބޮޑު ކާމިޔާބެއްގެ ގޮތުގައި ބެލެވެ އެވެ. 2025 ގެ އިންތިޚާބަކީ ރިޔާސީ ރޭހުގައި އޭނާ ވާދަ ކުރެއްވި ތިންވަނަ ފަހަރެވެ.

އެންމެ ފަހުން 2021 ވަނަ އަހަރު އޮތް ރިޔާސީ އިންތިޚާބު ގައި ކާސްޓް ބަލިވީ މިހާރުގެ ރައީސް، ގަބްރިއެލް ބޮރިޗް އާ ވާދަ ކޮށް ބޮޑު ތަފާތަކުންނެވެ.

ޗިލީގެ އެންމެ ޒުވާން ރައީސް ގެ ގޮތުގައި މަގާމަށް ހަވާލުވެވަޑައިގެންނެވި ބޮރިޗް ގެ މަގުބޫލުކަން އޭނާގެ ހަތަރު އަހަރުގެ ދައުރު ނިމުމުގެ ކުރިން ގާތްގަނޑަކަށް 30 ޕަސެންޓަށް ދަށްވެފައިވެއެވެ. އަދި ޗިލީގެ ގާނޫނުގެ ދަށުން އޭނާ އަށް ދެވަނަ ދައުރަކަށް ވާދަކުރުމުގެ ހައްގު ވެސް ނެތެވެ.

އާންމު ރައްޔިތުންގެ ހިޔާލު ހޯދުމުގެ ސާވޭތަކުގައި، ވޯޓުދޭ މީހުން ފާހަގަކުރި ގޮތުގައި ބޮރިޗް ގެ މަގުބޫލުކަން ދަށްވީ ފަހަކަށް އައިސް ކުށް ކުރުން އިތުރުވުމާއި، އަދި ޗިލީގެ އިގްތިސާދު ހީނަރުވުމާ ގުޅިގެން ކަމަށެވެ.