އިސްރާއީލުން ޣައްޒާއަށް ބޮން އެޅުމަކީ ބައިނަލްއަގުވާމީ ގާނޫނުތަކާ ހިލާފު ކަމެއް ކަމަށް ގަބޫލުކުރައްވާ ކަމަށް ޗިލީގެ ރައީސް ގެބްރިއެލް ބޮރިކް ރައީސް ޖޯ ބައިޑެންއަށް ވިދާޅުވެއްޖެ އެވެ.
ވައިޓް ހައުސްގައި ބުރާސްފަތި ދުވަހު ބައިޑެންއާ ބައްދަލުކުރެއްވުމަށްފަހު ބޭއްވެވި ނޫސްވެރިންގެ ބައްދަލުވުމެއްގައި ބޮރިކް ވިދާޅުވީ، އަމިއްލަ ދިފާއުގައި ކަމަށްބުނެ އިސްރާއީލުން އަސްކަރީ ގޮތުން ދެމުންދާ ނުހައްގު ރައްދު އެންމެ ސާފުކޮށް ކުށްވެރިކުރަން ޖެހޭ ކަމަށެވެ.
ހަމާސްގެ ހަމަލާ އަކީ ބޭއިންސާފު ހަމަލާއެއް ކަމަށް ސިފަކުރައްވަމުން ބޮރިކް ވިދާޅުވީ އިސްރާއީލުން ދިން ހަމަލާތަކުގައި ޣައްޒާގެ 9،000 އަށް ވުރެ ގިނަ މީހުން ޝަހީދުކޮށްލުމަކީ އިންސާނީ ގާނޫނާ ހިލާފު ކަމެއް ކަމަށެވެ. އިސްރާއީލުން ޗިލީގެ ސަފީރު ގެނައުމަށް ނިންމަވާފައިވާކަން އޭނާ ވަނީ މި ހަފުތާގެ ކުރީކޮޅު ވިދާޅުވެފަ އެވެ.
ބައިޑެންގެ ޖަވާބާ ގުޅޭ ގޮތުން ސުވާލު ކުރުމުން ބޮރިކް ވަނީ އެމެރިކާގެ ރައީސްގެ ހައްގުގައި އެއްޗެއް ވިދާޅުވާން ދެކޮޅު ހައްދަވައިފަ އެވެ. ނަމަވެސް ޣައްޒާގެ ހަނގުރާމަ ހުއްޓާލުމަށް ގޮވާލާފައި ނުވާތީ ވައިޓް ހައުސްއަށް ބޭރު ގައުމުތަކުގައި ދަނީ ފާޑުކިޔުންތައް އަމާޒުވަމުންދާ ކަމަށް އޭނާ ވިދާޅުވިއެވެ.
އަދި އާ އިޤްތިޞާދީ ޕާޓްނަރޝިޕެއްގެ ތެރެއިން ހުޅަނގު ހެމިސްފިއާގެ ގުޅުން ބަދަހިކުރުމާ ބެހޭގޮތުންވެސް ދެބޭފުޅުން މަޝްވަރާކުރެއްވިކަމަށް އޭނާ ވިދާޅުވިއެވެ. ޓެރަރިޒަމްގެ ސްޕޮންސަރުންގެ ލިސްޓުން ކިއުބާ އުނިކުރުމަށާއި ކިއުބާގެ އާދައިގެ ރައްޔިތުންނަށް ގެއްލުންވާ ކަމަށް ބުނާ ދަތިކުރުމުގެ ފިޔަވަޅުތައް އުވާލުމަށްވެސް ބޮރިކް ވަނީ ބައިޑެންގެ އަރިހުން އެދިވަޑައިގެންފަ އެވެ.
އިސްރާއީލުގެ އަމަލުތަކާ ދެކޮޅަށް ޗިލީން ގެންގުޅޭ ހަރުކަށި ސްޓޭންޑުން ދައްކުވައިދެނީ ޣައްޒާގެ މައްސަލާގައި އެމެރިކާއިން ފިޔަވަޅު ނާޅާތީ ބައިނަލްއަގްވާމީ މާޔޫސްކަން އިތުރުވުމެވެ. ބައިޑެން ސިޔާސަތު އަލުން ބައްޓަން ކުރެއްވުމަށް ބޮރިކް ގޮވާލެއްވުމުން އެމެރިކާގެ ބައިވެރިންގެ މެދުގައި އޮތް ބައިބައިވުން އެނގިގެންދެ އެވެ.
