ކޭސްތައް އިތުރުވުމާއެކު ޗިލީ ލޮކްޑައުންއަކަށް

ކޮވިޑް-19ގެ ކޭސްތައް އިތުރުވުމާއެކު ޗިލީގައި އައު ލޮކްޑައުންއެއް އިއުލާންކޮށް އަމަލުކުރަން ފަށައިފިއެވެ.

ޗިލީގެ ކަމާ ބެހޭ ފަރާތްތަކުން ބުނެފައިވަނީ އައު ލޮކްޑައުންއެއް އިއުލާންކޮށް އަމަލުކުރަން ފަށާފައިވަނީ ކޮވިޑްގެ ކޭސްތައް އިތުރުވުމާ ގުޅިގެން ރައްކާތެރިކަމުގެ ފިޔަވަޅުތައް އެޅުމުގެ ގޮތުން ކަމަށެވެ. ޗިލީގައި ދުވާލެއްގެ މައްޗަށް ރިޕޯޓްކުރާ ކޭސްތަކުގެ އަދަދު ވަނީ 7000ށް ވުރެ އިތުރުވެފައެވެ. މީގެ އިތުރުން ކޮވިޑްގެ ބަލި މީހުންނާއި ކޮވިޑް ނޫން ބަލިމީހުންނާއެކު އެގައުމުގެ އައިސީޔޫގެ ކެޕޭސިޓީ ވަނީ 95 އިންސައްތަ ފުރިފައެވެ. ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެގައުމުގައި ސިއްހީ އިދާރާތަކުން ބުނެފައިވަނީ ކޮވިޑްގެ ކޭސްތައް އިތުރުވެފައިވާ މި ދަނޑިވަޅުގައި ބްރެޒިލް އަދި ޔޫކޭގެ ވޭރިއަންޓްގެ ކޭސްތައް ވެސް އެގައުމުން ފެނިފައިވާ ކަމަށެވެ. އެ އިދާރާތަކުން ބުނެފައިވަނީ މިއީ ކަންބޮޑުވާ މައްސަލައެއް ކަމަށާއި، މިކަމާ ގުޅިގެން ސިއްހީ އިދާރާތަކާއި ސަރުކާރުން ވެސް އިންތިހާއަށް ކަންބޮޑުވާ ކަމަށެވެ. އަދި މި ކަންބޮޑުވުންތައް ހިއްސާކުރުމަށް ޗިލީގެ ހެލްތް މިނިސްޓަރ އެންރިކް ޕެރިސް ވަނީ ވިދާޅުވެފައެވެ.

ލޮކްޑައުންގެ ސަބަބުން 13 މިލިއަން މީހުންނަށް އަސަރު ކުރާނެއެވެ. އަދި އެންމެ ބޮޑަށް އަސަރުކުރާ އެއް ސަރަހައްދެއްގެ ގޮތުގައި އެގައުމުގެ އެންމެ ކާރުބާރު ބޮޑު ސެންޓިއާގޯ ހިމެނެއެވެ. ގިނަ ސްކޫލްތަކާއި ކޮލެޖްތައް ހުޅުވާފައި ބެހެއްޓި ނަމަވެސް، ޒަރޫރީ ތަކެތި ވިއްކާ ފިހާރަތައް ފިޔަވައި އެހެން ފިހާރަތައް ބަންދުކުރުމަށް ވަނީ ނިންމާފައެވެ. މީގެ އިތުރުން ޒަރޫރީ ދަތުރުތައް ނޫން އެހެން ދަތުރުތައް ހުއްޓާލުމަށް ވަނީ އަންގާފައެވެ.

ކޮވިޑްގެ ކޭސްތައް އިތުރުވެފައިވަނީ އެގައުމުގައި ވެކްސިން ދިނުމުގެ ބޮޑު ކެމްޕެއިނެއް ފެށިގެން ކުރިއަށްދާ ދަނޑިވަޅެއްގައެވެ. ވެކްސިން ކެމްޕޭން ކާމިޔާބު ނަމަވެސް ކޭސްތައް އިތުރުވެގެން ދިއުމަކީ ކެމްޕޭނަށް އެޅިފައިވާ ހުރަހެއްކަމަށް ކަމާބެހޭ ފަރާތްތަކުން ވަނީ ބުނެފައެވެ. ވެކްސިން ކެމްޕެއިންގެ ދަށުން މިހާތަނަށް އެގައުމުގެ 3 ބައިކުޅަ އެއްބައި މީހުން ނުވަތަ 6 މިލިއަން މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ.

ގައުމަށް ކިތަންމެ ދަތިކަމެއް ދިމާވި ނަމަވެސް، ވެކްސިން ކެމްޕެއިނަށް ހުރަހެއް ނާންނާނެ ކަމުގެ ޔަގީންކަން ޗިލީގެ ރައީސް ސަބޭސްޓިއަން ޕިންނޭރާ ވަނީ ދެއްވާފައެވެ. މީގެ އިތުރުން އެހެން ގައުމުތަކަށް ފޯރުކޮށްދޭންޖެހޭ އެހީތެރިކަން ވެސް މެދުނުކެނޑި ދެއްވާނެކަމުގެ ޔަގީންކަން ސަބޭސްޓިއަން ވަނީ ދެއްވާފައެވެ. އެގޮތުން ވެކްސިން، އޮކްސިޖަން އަދި ސިއްހީ އާލާތްތަކާއި ސާމާނު ފޯރުކޮށްދެއްވާނެ ކަމަށް ވިދާޅުވެފައިވެއެވެ.

ޗިލީން ވަނީ މީގެ ކުރިން ޕެރޫ އަށް އޮކްސިޖަންގެ އެހީތެރިކަން ފޯރުކޮށްދީފައެވެ. އަދި ޕެރަގޫ އަދި އިކްއެޑޯއަށް ވެކްސިންގެ އެހީތެރިކަން ފޯރުކޮށްދީފައިވާ އިރު، ވެކްސިން ގެންދިއުމުގައި ވެސް އެހީތެރިކަން ފޯރުކޮށްދީފައިވެއެވެ.

ބުރާސްފަތި ދުވަހު ޗިލީން 7،023 ކޭސް ރިޕޯޓް ކޮށްފައިވާ އިރު، އެގައުމުގައި ޖުމްލަ ޕޮޒިޓިވްވި ކޭސްތައް ވަނީ 954،762ށް އަރާފައެވެ. އަދި ބުރާސްފަތި ދުވަހު 122 މީހަކު މަރުވެފައިވާ އިރު، އެގައުމުގައި މަރުވި މީހުންގެ އަދަދު ވަނީ 22،524ށް އަރާފައެވެ.