ވެކްސިން ނުޖަހާތިބި މަދު ބައެއްގެ ސަބަބުން ކޭސްތައް އިތުރުވެ ޗިލީގެ ވެރިރަށް ލޮކްޑައުންއަކަށް ދާން ނިންމައިފިއެވެ.
ކާމިޔާބު ކަމާއެކު ވެކްސިނޭޝަން ޕްރޮގްރާމް ކުރިއަށް ގެންދިޔަ ނަމަވެސް ވެކްސިން ނުޖަހާ ތިބި މީހުންގެ މެދުގައި ކޮވިޑްގެ ކޭސްތައް އިތުރުވެ ރައްކާތެރިކަމުގެ ފިޔަވަޅެއްގެ ގޮތުން ޗިލީގެ ވެރިރަށް ސެންޓިއާގޯ ލޮކްޑައުން ކުރަން ނިންމާފައިވާކަން ހާމަކޮށްފައިވަނީ އެ ސިޓީގެ ސިއްހީ ކަންތައްތަކާ ބެހޭ އިދާރާތަކުގެ އިރުޝާދުގެ ދަށުން ސަރުކާރުންނެވެ. ޗިލީގައި މިހާތަނަށް 60 އިންސައްތައަށްވުރެ ގިނަ މީހުން ވަނީ ވެކްސިން ޖަހާފައެވެ.
ލޮކްޑައުން ކުރަން ނިންމުމާއެކު ވެރިރަށުގައި ދިރިއުޅެމުން އަންނަ 8 މިލިއަނަށްވުރެ ގިނަ މީހުން ދެން ޖެހޭނީ ގޭ ބަންދުގައި ތިބޭށެވެ. ބުރާސްފަތި ދުވަހު އެކަނިވެސް އެ ގައުމުން ވަނީ 7،716 މީހަކު ޕޮޒިޓިވްވެގެން ރިޕޯޓްކޮށްފައެވެ. ޕޮޒިޓިވްވި މީހުންގެ ތެރޭގައި ގިނައީ ވެކްސިން ފުރިހަމަ ނުކުރާ މީހުންނެވެ.
ޗިލީގެ ހާލަތު ގޯސްވެ އައިސީޔޫ އެނދުތައް ފުރެން ކައިރިވެފައިވާ ކަމަށް އެގައުމުން ވަނީ ހާމަކޮށްފައެވެ. އަދި ސިއްހީ ނިޒާމަށް ނުކަތާވަރަށް ކަންކަން ހިނގައިދާނެ ކަމުގެ އިޝާރާތެއް އެގައުމުގެ ސިއްހަތާބެހޭ ވުޒާރާއިން ވަނީ ދީފައެވެ.
މަސްރަހު ދިރާސާކުރާ ފަރާތްތަކުން ބުނަމުން އަންނަނީ ޗިލީގައި ކާމިޔާބު ވެކްސިނޭޝަން ޕްރޮގްރާމެއް ހިންގި ނަމަވެސް، ސަރުކާރުން ފިޔަވަޅުތަކަށް ލުއިދީފައިވާ ގޮތުން ހާލަތު ގޯސްވަމުން އަންނަ ކަމަށެވެ. އެގޮތުން އަޅާފައިވާ ފިޔަވަޅުތަކަށް މާ އަވަހަށް ލުއި ދިނުން މީގެ ތެރޭގައި ހިމެނެއެވެ.
ކޮވިޑްގެ ހާލަތު ގޯސްވެގެން މިދިޔަ އަހަރުގެ މާޗް މަހުން ނޮވެމްބަރުގެ ނިޔަލަށް އެގައުމުގެ ބޯޑަރު ބަންދު ކުރެވުނެވެ. ނަމަވެސް ހަރުކަށި ލޮކްޑައުނަކާއެކު އަދަދުތައް ދަށް ކުރުމަށްފަހު އަލުން ބޯޑަރު ހުޅުވިއެވެ. އަދި ބޭރުން އަންނަ ފަރާތްތަކަށް އެކި ތަންތަނަށް ދިއުމުގެ ހުއްދަ ދިނުމާއި ހޫނު މޫސުމުގެ ބަންދުގައި ދިން ލުއިތަކުގެ ސަބަބުން ކަންކަން ގޯސްވެގެން ދިޔަކަމަށް ރިޕޯޓްތައް ބުނެއެވެ. އަދި ވެއްޓެމުން ދިޔަ އިގްތިސާދު ކޮޅަށް ޖެހުމަށްޓަކައި ހުރިހާ ވިޔަފާރިތަކަށް ހުއްދަ ދިނުމާއި ރިސޯޓްތައް މާ އަވަހަށް ހުޅުވުން ވެސް މީގެ ތެރޭގައި ހިމެނެއެވެ.
ކޮވިޑް ފެތުރެން ފެށިފަހުން މިހާތަނަށް 1.5 މިލިއަން މީހުން އެގައުމުން ވަނީ ޕޮޒިޓިވްވެފައެވެ. އަދި 30،000ށް ވުރެ ގިނަ މީހުން ވަނީ ބަލީގައި މަރުވެފައެވެ.
