ބެނިންގެ ކުރީގެ ރައީސްގެ ދަރިކަލުން ހައްޔަރު ކޮށްފި

ބެނިންގެ ކުރީގެ ރައީސް، އަދި މިހާރުގެ އިދިކޮޅު ލީޑަރުގެ ގޮތުގައި ހުންނެވި ތޯމަސް ބޯނީ ޔާއީގެ ދަރިކަލުން، ޗާބީ ޔާއީ ހައްޔަރު ކޮށްފައިވާ ކަމަށް އޭނާ ގެ އާއިލާ މެމްބަރުން ބުނެފި އެވެ. 

އާއިލާގެ ފަރާތުން ހާމަ ކޮށްފައިވާ ގޮތުގައި، އާދީއްތަ ދުވަހުގެ ވަގުތެއް ގައި އޭނާ ހައްޔަރު ކޮށްފައި ވަނީ އޭނާ ދިރި އުޅޭ ގެއިންނެވެ. ނަމަވެސް، އޭނާ ހައްޔަރު ކޮށްފައި ވަނީ ކޮން ސަބަބަކާ ހުރެ ކަމެއް ހާމަ ކޮށްފައި ނުވެ އެވެ. 

އޭއެފްޕީ އަށް މައުލޫމާތު ދެމުން އެ އާއިލާގެ މެމްބަރަކު ބުނެފައި ވަނީ، އޭނާ ގެ މައްޗަށް ކުރާ ތުހުމަތަކީ ކޮބައިކަން ވެސް ސާފު ނުވާ ކަމަށެވެ. ދަ ޑިމޮކްރަޓްސް ޕާޓީގެ މެމްބަރަކު، އަދި އޭނާ ގެ ގާތް ރަޙުމަތްތެރިޔަކު ބުނެފައި ވަނީ، މިއީ މިދިޔަ އާދީއްތަ ދުވަހު ހިނގި ބަޣާވާތުގެ ހާދިސާއާ ގުޅިފައިވާ ކަމެއްތޯ ވެސް އެނގެން ނެތް ކަމަށެވެ. 

ބެނިންގެ އިދިކޮޅު ފަރާތްތަކުގެ މައިގަނޑު ޕާާޓީ އަކީ ޑިމޮކްރަޓްސް ޕާޓީ ކަމަށްވާއިރު، ބޯނީ އަކީ އެ ޕާޓީގެ ލީޑަރެވެ. ބެނިންގެ މިހާރުގެ ރައީސް ޕެޓްރިސް ޓެލޮންގެ ވެރިކަން ވައްޓާލުމަށް ދާދި ފަހުން އެ ޤައުމުގައި ބަޣާވާތެއް ހިންގަން އުޅުނު ކަމުގެ ތުހުމަތު ވަނީ ކޮށްފަ އެވެ. އަދި ސަރުކާރަށް ވަފާތެރި ސިފައިން، އެ ބަޣާވާތް ނާކާމިޔާބު ކޮށްލާފައިވާ ކަމަށް ބުނެފައިވެ އެވެ. 

މި ހިނގާ ޑިސެމްބަރު މަހުގެ ހަތް ވަނަ ދުވަހު ވެރިކަން ވައްޓާލުމަށް ބަޣާވާތެއް ހިންގަން އުޅުނު މައްސަލައިގައި މިހާތަނަށް ވަނީ ގިނަ ބަޔަކު ހައްޔަރު ކޮށްފަ އެވެ. އޭގެ ތެރޭގައި އެކަމުގައި އަމަލީ ގޮތުން ބައިވެރިވި މީހުން އަދި ކުރީގެ ޑިފެންސް މިނިސްޓަރު ވެސް ހިމެނެ އެވެ. ހަމަ އެހެންމެ، އިދިކޮޅު މުހިންމު ފަރާތެއްގެ ގޮތުގައި ފާހަގަ ކުރެވޭ ކެންޑިޑް އަންޒަންނާއީ ވެސް ހިމެނެ އެވެ. އޭނާ ފުލުހުންގެ ހައްޔަރަށް ގެންގޮސްފައި ވަނީ ދައުލަތުގެ ބާރުތަކާ ދެކޮޅަށް ބަޣާވާތް ކުރުމާއި، ބަޣާވާތަށް ހިތްވަރު ދިނުމުގެ ތުހުމަތުގަ އެވެ. 

ބެނިންގެ ސަރުކާރު ވައްޓާލުމަށް ރޭވި ބަޣާވާތުގައި ބައިވެރިވި ގިނަ ބަޔަކު މިހާރު ވެސް ފިލައިގެން އުޅޭ ކަމަށް ބެލެވޭ ކަމަށް، ކަމާ ގުޅުން ހުރި ފަރާތްތަކުން ވަނީ ހާމަ ކޮށްފަ އެވެ. އޭގެ ތެރޭގައި ބަޣާވާތް ރޭވުމުގައި އިސްކޮށް މަސައްކަތް ކުރި ލެފްޓިނަންޓް ކާނަލް ޕާސްކަލް ޓިގްރީ ވެސް ހިމެނޭ ކަމަށް ބުނެފައިވެ އެވެ. 

ސަރުކާރާ ދެކޮޅަށް ރޭވި މި ބަޣާވާތަކީ އެ ޤައުމުގެ ސިޔާސީ ޙާލަތު އިތުރަށް ގޯސްވެފައިވާކަން ދައްކުވައިދޭ ހާދިސާއެއް ކަމަށް ގިނަ ބަޔަކު ފާހަގަ ކުރެ އެވެ. ވެރިކަން ވައްޓާލުމަށް ކުރި މަސައްކަތް ނާކާމިޔާބު ވެފައިވާއިރު، ބެނިންގެ ސަރުކާރުން މިހާާރު ކުރަމުން އަންނަނީ އެކަމުގައި ބައިވެރިވި މީހުން ހޯދުމުގެ މަސައްކަތެވެ.

ތޯމަސް ބޯނީ ޔާއީ ވަނީ ބެނިންގެ ވެރިކަމުގައި ދެ ދައުރު ހޭދަ ކުރައްވައިފަ އެވެ. އެންމެ ފުރަތަމަ ބެނިންގެ ރައީސް ކަމުގެ މަޤާމަށް އޭނާ ވަޑައިގެންނެވީ 2006 ވަނަ އަހަރު އެވެ. އޭގެ ފަހުން 2011 ވަނަ އަހަރު ވަނީ އައު ދައުރަަކަށް އިންތިޚާބުވެ ވަޑައިގެންފަ އެވެ. ދެ ވަނަ ދައުރަށް ފަހު، ބެނިންގެ ވެރިކަމުން ދުރަށް އޭނާ ވަޑަައިގެންނެވީ 2016 ވަނަ އަހަރު އެވެ.