ބެނިން ގެ ރައީސް ޕެޓްރިސް ޓެލޯން ވެރިކަމުން ދުރުކޮށްފައިވާ ކަމަށް އެ ގައުމުގެ ސިފައިން ގައުމީ ޓީވީގައި އިއުލާނު ކޮށްފި އެވެ.

2016 ވަނަ އަހަރުން ފެށިގެން ވެރިކަމުގައި ހުންނެވި ރައީސް ޕެޓްރިސް ޓާލޯންގެ ވެރިކަން ބަދަލުކޮށްލާފައިވާކަމާއި، ދައުލަތުގެ ހުރިހާ މުއައްސަސާތަކެއްވެސް އުވާލާފައިވާކަމަށް އާދީއްތަ ދުވަހު އެ ގައުމުގެ ސިފައިން ވަނީ އިއުލާންކޮށްފައެވެ.

ހުޅަނގު އެފްރިކާ ގައި އޮންނަ ބެނިން ގައި ހުންނަ ފަރަންސޭސި އެމްބަސީ އިން ނެރުނު މެސެޖެއް ގައި ބުނެފައި ވަނީ ރައީސްގެ ރަސްމީ ގަނޑުވަރު ކައިރީގައި ބަޑި ޖަހާ އަޑު އިވިފައިވާ ކަމަށެވެ.

ސިފައިން އިތުރަށް އިއުލާން ކުރި ގޮތުގައި ގާނޫނުއަސާސީ އަށް އަމަލު ކުރުން ވަގުތީ ގޮތުން ހުއްޓާލާފައިވާ ކަމަށާއި އެގައުމުގެ އެއްގަމާއި ވައިގެ ބޯޑަރު ބަންދު ކޮށްފައިވާ ކަމަަށެވެ.

އެމީހުންގެ ބަޔާނުގައިވާ ގޮތުން، މިލިޓަރީ ޓްރާންޒިޝަން ކައުންސިލެއް ވަނީ ވެރިކަން ހިންގަން އެކުލަވާލާފަ އެވެ. އެ ކައުންސިލުގައި އިސްވެރިއަކަށް ހުންނާނީ ލެފްޓިނެންޓް ކާނަލް ޓިގްރީ ޕާސްކަލް ކަމަށް ވެސް ބުނެފައި ވެއެވެ.

ރައީސް ޓެލޯން ހުންނެވި ތަނެއް އެނގިފައެއް ނުވެއެވެ.

ރައީސް ޓެލޯން 10 އަހަރު ދުވަހު ވެރިކަން ކުރެއްވުމަށްފަހު އަންނަ އޭޕްރީލް މަހު މަގާމުން ވަކިވެވަޑައިގަންނަވާނެ ކަމަށް ވަނީ ވިދާޅުވެފަ އެވެ.