މިނިސްޓަރު ޝިޔާމް ބައްދަލު ކުރެއްވީ ބައެއް މަސްވެރިންނާ، އެހެން މަސްވެރިން ވެލާނާގެ ކައިރީގައި މަޑުކުރަން ފުރުސަތެއް ނުދިން!

ބޮޑުކަންނެލި މަސްވެރިންގެ ހައްގުތައް ހޯދުމަށް ކުރަމުންދިޔަ ސުލްހަވެރި އިހުތިޖާޖަށް ފަސް ދުވަސް ފާއިތުވި ފަހުން ފިޝަރީޒް މިނިސްޓަރު އަހުމަދު ޝިޔާމް މަސްވެރިންނާ ބައްދަލު ކުރައްވައިފި އެވެ. 

ހޯމަ ދުވަހުގެ 11 ޖެހިއިރު މިނިސްޓަރާ ބައްދަލު ކުރުމަށް ބޮޑު ކަންނެލި މަސްވެރިންގެ ޔޫނިއަން ގެ ކެޔޮޅުންގެ ޓީމުން ވަނީ ވެލާނާގެ ސަރަހައްދަށް ގޮސްފަ އެވެ. ނަމަވެސް މިނިސްޓަރު ބައްދަލު ކުރައްވާނެ ކަމަށް ވިދާޅުވީ ޔޫނިއަން ގައި އިސްކޮށް ހަރަކާތްތެރިވާ 20 މަސްވެރިންނާ އެވެ. 

ބީކޭއެމްޔޫ ޔުނީފޯމުގައި ތިބި ކެޔޮޅުންގެ ޓީމުގައި ދެން ތިބި މަސްވެރިންނަށް އެ ސަރަހައްދުގައި މަޑު ނުކުރެވޭނެ ކަމަށް ބުނެ ފުލުހުން ވަނީ މަސްވެރިން އެ ސަރަހައްދުން ދުރަށް ޖައްސާފަ އެވެ.

ފުލުހުން ވަނީ މުޅި ޓީމު ވެލާނާ ގެ ސަހަރައްދުން ދުރަށް ޖައްސާ ރައްޔިތުންގެ މަޖިލިސް ކުރާ ގެ އާ ހިސާބަށް ޖައްސާފަ އެވެ. 

ބޮޑު ކަންނެލި މަސްވެރިންގެ ޔޫނިއަންގެ ފަރާތުން މި އަހަރުގެ މަސްވެރިންގެ ދުވަސް، ޑިސެމްބަރު 10 ވަނަ ދުވަހުން ފެށިގެން ސުލްހަވެރިކަމާ އެކު ވަނީ އިހުތިޖާޖު ކޮށްފަ އެވެ.

ބޮޑުކަންނެލި މަސްވެރިންނަށް މި ސަރުކާރުން ވީ ވައުދުތައް ފުއްދައިދިނުމަށް ގޮވާލާ ކުރި މި އިހުތިޖާޖުގެ ބައިވެރިން ވަނީ ސަރުކާރަށް 3 ޑިމާންޑެއް ކޮށްފަ އެވެ. 

އެއީ މި ސަރުކާރުގެ މެނިފެސްޓޯގައި ވެސް ހިމަނާފައިވާ ގޮތަށް ސަރުކާރުގެ މަސް ކުންފުނި، މިފްކޯ އަށް ބޮޑު ކަންނެލި ގަންނަން ފެށުމާއި، ކަންނެލި ގަނެވޭނެ އެންމެ ދަށް އަގަކީ 80 ރުފިޔާ އާއި 100 ރުފިޔާ އާ ދެމެދު ކަމަށް ކަނޑައެޅުމުގެ އިތުރުން ބޭސް ރޭޓުގައި މަސްވެރިންނަށް ތެލާއި އައިސް ލިބޭނެ ގޮތް ހަދައިދިނުމެވެ.

އިހުތިޖާޖު ގެ ބައިވެރިން ބުނަމުން އަންނަނީ އެ މީހުންނަށް ސަރުކާރުން ވީ ވައުދުތައް ނުފުއްދަނީސް އިހުތިޖާޖު ހުއްޓައިނުލާނެ ކަމަށެވެ.