އަލީ ހުސައިން ވިދާޅުވީ ދިވެހި ފުލުހުންނަށް މިއަދު ރައްޔިތުން އިތުބާރު ނުކުރާ ކަމަށެވެ. އަދި ސަރުކާރުގެ އެހެން މުއައްސަސާ ތަކަށް ވެސް ރައްޔިތުން އިތުބާރު ނުކުރާ ކަމަށާ ސަބަބަކީ މުއައްސަސާތައް ހިންގަން ތިބީ ރައްޔިތުން އިތުބާރު ކުރާ މީހުންނަށް ނުވުން ކަމަށެވެ.
ރައްޔިތުން މަޖިލީހުގެ ކުރީގެ މެންބަރު އަލީ ހުސައިން
މިހާރު ރާއްޖޭގެ ރައީސުލްޖުމްހޫރިއްޔާ ގެ މަގާމުގައި ހުންނެވި ޑރ. މުހައްމަދު މުއިއްޒު އަކީ މަގާމުތަކަށް ރަނގަޅު މީހުން ލުމުގެ ގާބިލުކަން ނެތް ވެރިއެއް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސައިން ވިދާޅުވެއްޖެ އެވެ.
ރާއްޖެޓީވީ ގެ 'ފަލަ ސުރުޚީ' ޕްރޮގްރާމް ގައި ވާހަކަ ދައްކަވަމުން އަލީ ހުސައިން ވިދާޅުވީ ދިވެހި ފުލުހުންނަށް މިއަދު ރައްޔިތުން އިތުބާރު ނުކުރާ ކަމަށެވެ. އަދި ސަރުކާރުގެ އެހެން މުއައްސަސާ ތަކަށް ވެސް ރައްޔިތުން އިތުބާރު ނުކުރާ ކަމަށާ ސަބަބަކީ މުއައްސަސާތައް ހިންގަން ތިބީ ރައްޔިތުން އިތުބާރު ކުރާ މީހުންނަށް ނުވުން ކަމަށެވެ.
އަލީ ހުސައިން ވިދާޅުވީ ފުލުހުންނަށް ވެސް ރައްޔިތުން އިތުބާރު ނުކުރަނީ އެހެންވެ ކަމަށެވެ. ޒަމާނުއްސުރެ ފުލުހުންގެ ތެރޭގައި އޮންނަ ސަގާފަތީ ވެރިން ދިފާއު ކުރުމާއި ސަރުކާރު ދިފާއު ކުރުން ކަމަށް އަލީ ހުސަައިން ވިދާޅުވި އެވެ. ފުލުހުންނަކީ ރައްޔިތުންނާ ގުޅޭ، ރައްޔިތުންގެ މުދަލާއި އަމަންއަމާން ކަމާއި ރައްޔިތުންނަށް ފަސޭހަވާނެ ގޮތްތަކެއް ހޯދައި، ރައްޔިތުންނަށްޓަކައި އޮތް މުއައްސަސާ އެއް ނޫން ކަމަށް ގިނަ ބަޔަކު ގަބޫލު ކަމަށް ވެސް އަލީ ހުސައިން ވިދާޅުވި އެވެ.
އަލީ ހުސައިން ވިދާޅުވީ މިކަންކަން ބަދަލު ކޮށް، ރައްޔިތުންގެ އިތުބާރު ލިބިފައިވާ މުއައްސަސާ އަކަށް ފުލުހުންގެ މުއައްސަސާ ބަދަލު ކުރަން ޖެހޭ ކަމަށެވެ.
އެހެން ނަމަވެސް މި ސަރުކާރަކަށް އެކަން ކުރެވޭނެ ކަމަކަށް ގަބޫލު ނުކުރައްވާ ކަމަށް އޭނާ ވިދާޅުވި އެވެ. އެއީ އެކަން އެގޮތަށް ތަރުތީބުވެފައި ނެތުމުން ކަމަށާ ފުލުހުންގެ ކަންކަން ވިލަރެސް ކުރުމަށް ހުންނެވި ހޯމް މިނިސްޓަރަކީ ވެސް ފުލުހުންގެ އުސޫލުތައް އެނގޭ ބޭފުޅެއް ވެސް ނޫން ކަމަށް އަލީ ހުސައިން ވިދާޅުވި އެވެ.
ފުލުހުންގެ ޓްރެއިނިންގ އެއް ނޫން ހައްދަވާފަ މި ހުންނަނީ. މިލިޓަރީ ޓްރެއިނިންގ. އެހެންވީމަ މިލިޓަރީ ޓްރެއިނިންގ ހައްދަވާފަ ތިއްބަވާ ބޭފުޅުންގެ ވިސްނުން ބޮޑަށް ހުންނާނީ މިލިޓަރީ ކަހަލަ ގޮތަކަށް. އެއީ ބައެއް މައްސަލަތަކުގައި ސީން އަށް ވެސް ވަޑައިގަންނަވާ ނޫންތޯ ހޯމް މިނިސްޓަރު. އެގޮތަށް ވެސް އަޅުގަނޑުމެންނަށް ފެނުނު. އެއީކީ ކޮންމެހެން ހޯމް މިނިސްޓަރު މައްސަލައެއް ނޫން. އެއްގޮތަކަށް ވެސް ހޯމް މިނިސްޓަރު ގެ މައްސަލައެއް ނޫން. ހަމަ ރައީސުލްޖުމްހޫރިއްޔާގެ މައްސަލަ. އެއީ ހޯމް މިނިސްޓަރަކީ ރައީސް އައްޔަނު ކޮށްފަ ހުރި މީހެއް. ރައީސުލްޖުމްހޫރިއްޔާގެ ގާބިލު ކަން ނެތީ. ރަނގަޅު މީހާ އެތަނަށް އައްޔަނު ކުރުމުގެ ގާބިލުކަން ނެތީ.ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސައިން
އަލީ ހުސައިން ވިދާޅުވީ ކޮންމެ ކަމަކުން ވެސް ފެންނަނީ ސަރުކާރުގެ އަގު ވެއްޓޭ މަންޒަރު ކަމަށެވެ. އަދި މި ހުރިހާ ކަމެއް ވެސް ދިމާވަނީ ރައީސް ޑރ. މުއިއްޒަށް އެކިއެކި މަގާމުތަކަށް ރަނގަޅު މީހުން އައްޔަނު ކުރަން ނޭނގޭތީ ކަމަށް ވެސް އޭނާ ވިދާޅުވި އެވެ.
ދިވެހި ފުލުހުންނަށް މި ސަރުކާރު އޮވެގެން ރައްޔިތުންގެ އިތުބާރު ލިބޭތަން ނުފެންނަ ކަމަށާ އެއީ ސަރުކާރަށް ނެތް އިތުބާރެއް، ސަރުކާރަށް ނުހޯދުނު އިތުބާރެއް، ނުހޯދުނު ލޯތްބެއް ފުލުހުންނަކަށް ނުހޯދޭނެތީ ކަމަށް އަލީ ހުސައިން ވިދާޅުވި އެވެ. އޭނާ ވިދާޅުވީ އެއީ ނުވާނެ ކަމެއް ކަމަށެވެ.
އެހެންކަމުން ފުރަތަމަ އިސްލާހު ވާންވީ ރައީސް ޑރ. މުއިއްޒު ކަމަށް އަލީ ހުސައިން ވިދާޅުވި އެވެ.
