އުތުރު ތިލަފަޅުގައި ގޯއްޗާއި ފުލެޓު ދިނުންފިޔަވާ އިތުރު އެއްވެސް ކަމެއް ކުރުމަކީ ބަލައިގަންނާނެ ކަމެއްް ނޫން: ޔޫނިއަން

އުތުރު ތިލަފަޅުން ގޯތި ދިނުން ފިޔަވާ ނުވަތަ ގޮއްޗާއި ފުލެޓު ދިނުން ފިޔަވާ އިތުރު ކަމެއް އެތާގައި ކުރުމަކީ އުތުރު ތިލަފަޅު ޔޫނިއަން އިން ބަލައިގަންނާނެ ކަމެއް ނޫންކަމަށް ބުނެފިއެވެ.

އުތުރު ތިލަފަޅު ޔޫނިއަން ގެ ފަރާތުން ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވިދާޅުވީ، އުތުރު ތިލަފަޅު އެހެން ބޭނުންތަކަށް ބިން ދޫކުރުމަކީ ކަންބޮޑުވާ ކަމެއް ކަމަށާއި ރައްޔިތުންގެ ތެރެއިން ނަވާރަ ހާސް މީހުންނާށްވުރެ ގިނަ ބަޔަކު ގޯތި ލިބުމުގެ އުންމީދުގައި ތިއްބާ ދަނޑުވެރިކަމަށް އުތުރު ތިލަފަޅު ހާއްސަ ކުރެވިގެން ދިޔައިމަ އެއީ ރައްޔިތުންގެ ވެސް ކަންބޮޑުވުން އޮތް ކަމެއް ކަމަށެވެ.

އަލީ ހުސައިން ވިދާޅުވީ މިސަރަހައްދަށް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަން ކަމަށާއި އެމައްސަލައަށް ހައްލެއް ހޯދޭނީ ގޯތި ލިބިގެން ކަމަށެވެ. އަދި އުތުރުތިލަފަޅުން ނިމިދިޔަ އެމްޑީޕީގެ ސަރުކާރުން ދޫކުރި ގޯތިތައް ރައްޔިތުންނަށް ލިބޭނެކަން އެޔޫނިއަނުން ކަށަވަރުކުރާނެ ކަމަށް އަލީ ހުސައިން ވިދާޅުވިއެވެ.

މިސަރުކާރުން އުތުރު ތިލަފަޅާއި ގުޅިގެން އެތައް ކަމެއްގެ ވާހަކަ ދައްކާފައިވާ ކަމަށާއި އެގޮތުން އުތުރު ތިލަފަޅުގައި ސަރުކާރުން މަރުކަޒީ ޖަލެއް ގާއިމު ކުރާނެ ކަމަށް ހޯމް މިނިސްޓަރު ވިދާޅުވެފައިވާ ކަމަށް އަލީ އިހްސާން ވިދާޅުވިއެވެ.

މިހާރު އުތުރު ތިލަފަޅުގައި އެގްރިކަލްޗަރ ޒޯން އަކަށް ހަދައި އެތާ ގްރީން ހައުސްތަކާއި ބައިވަރު ޕްރޮޖެކްޓަކެއް ހިނގައި އިގްތިސޯދީ ގޮތުން ވަކިން ހާއްސަކޮށް ދަނޑުވެރިކަމާއި ގުޅޭ ފޫޑް ސެކިއުރިޓީއާއި ގުޅޭ ބޮޑު ޕްރޮޖެކްޓެއް ހިންގާ ވާހަކަ ދައްކަމުން ދައްކަމުން އޭގެ ތާރިހުތަކާއެއްޗެހި ދެމުންގޮސް އަނެއްކާ 25 ޖޫން 2024 ގައި 241 ކޮމެޓިގައި މައުލޫމާތު ދެއްވަމުން ހޯމް މިނިސްޓަރު ވިދާޅުވަނީ އުތުރު ތިލަފަޅުގައި ތިމަންނަމެން ނިންމައިފީމެ ޗެންޓްރަލް ޖަލު އަޅަން، 34:00

އަލީ ހުސައިން

މީގެ އިތުރުން އަލީ ހުސައިން ވިދާޅުވީ، 300 އެއްހާ ކުދިން ރިހެބިލިޓޭޓު ކުރުމަށް 19،000 އާއިލާގެ އުންމީދު ގެއްލުވާލައިގެން ނުވާނެ ކަމަށެވެ. އަދި އެތަނުގައި ސެންޓްރަލް ޖަލަކާއި ހޯޕް އައިލެންޑެއް އަޅައި، މީހުން ދިރިއުޅުމަށް ގޯތި ދިނުމަށް ކުރަން ޖެހޭ ޚަރަދު މާބޮޑުވާނެ ކަމަށް އޭނާ ވިދާޅުވިއެވެ. އެހެންވެ، ދުރާލާ ވިސްނައި ކަންކަން ކުރަން ޖެހޭ ކަމަށް އޭނާ ވަނީ ވިދާޅުވިއެވެ.

އުތުރު ތިލަފަޅުގައި އަޅަންޖެހެނީ ސެންޓްރަލް ޖަލެއް ނުވަތަ ހޯޕް އައިލެންޑެއްވެސް ނޫންކަމަށާއި އުތުރު ތިލަފަޅަށް ވާންޖެހޭ ގޮތަކީ ކުރީ ސަރުކާރުން އިއުލާން ކޮށްފައިވާ ގޮތަށް އެތަން ހިއްކާ އެތަނުން ގޯތި ދިނުން ކަމަށް އަލީ ހުސައިން ވިދާޅުވިއެވެ. އަދި އެއީ މާލެ ސަރަހައްދުގައި ޖެހިފައިވާ ބޯހިޔާވަހިކަމުގެ މައްސަލަ ހައްލު ކުރުމަށް ކުރީ ސަރުކާރުން ފެށި ކަމެއްކަމަށް އޭނާ ފާހަގަކުރެއްވި އެވެ.

އުތުރުތިލަފަޅާ ގުޅުވައި، ހުރި ކަންބޮޑުވުންތަކަށް ހައްލު ހޯދުމަށް ސަރުކާރާ މަޝްވަރާ ކުރާނެ ކަމަށް އެ ޔޫނިއަނުން ވަނީ ބުނެފައެވެ. އަދި، އެތަނުން ގޯތި ނުދީ އެހެން ކަންކަން ކުރުމަކީ ބަލައިގަނެވޭނެ ކަމެއް ނޫން ކަން އެ ޔޫނިއަނުން ފާހަގަކޮށްފައިވެއެވެ.

އެހެނިހެން ބޭނުންތަކަށް އުތުރުތިލަފަޅު ޚާއްސަކޮށްފައިވާތީ އެޔޫނިއަން އިން ކަންބޮޑުވުން ފާޅުކުރިއިރު، ހޯޕް އައިލެންޑް ތަރައްގީކުރަން މިހާރު ހަތަރު އިންވެސްޓަރަކު ކުރިމަތިލައިފައިވާ ކަމަށް ހޯމް މިނިސްޓަރު އަލީ އިހުސާން ވަނީ މީގެ ކުރިން ވިދާޅުވެފައެވެ.

މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށްޓަކައި ފަށާފައިވާ "ބިންވެރިޔާ" ސްކީމުގެ ދެވަނަ ފިޔަވަހިން ބަންޑާރަ ގޯތި ދޫކުރުމުގެ އުސޫލާއި "ގެދޮރުވެރިޔާ" ސްކީމުގެ ދެވަނަ ފިޔަވަހިން ފުލެޓު ދޫކުރުމުގެ އުސޫލު ގެޒެޓު ކުރީ 23 ސެޕްޓެމްބަރު 2023 ގަ އެވެ. ނަމަވެސް، ބިންވެރިޔާ ސްކީމްގެ ދެވަނަ ފިޔައްސާ ގުޅޭ މާ ގިނަ މައުލޫމާތެއް މި ސަރުކާރުން ހާމައެއް ނުކުރެ އެވެ. އޭގެ ތެރެއިން އެއްވެސް ފޯމެއް ބާތިލު ނުކުރާނެ ކަމުގެ ޔަގީންކަން ވެރިކަމާ ހަވާލުވެވަޑައިގަތުމުގެ ކުރިން ރައީސް މުއިއްޒު ވަނީ ދެއްވައިފަ އެވެ.