ގައުމު ސަލާމަތްކުރަން އައިމީހުން 38 ބިލިޔަނަށްވުރެ ބޮޑު އަދަދަކުން ދަރުވާލައިފި: އަލީ ހުސެއިން
ސަރުކާރުން ވޭތުވެދިޔަ ދެ އަހަރުގެ ތެރޭގައި ދައުލަތް 38.1 ބިލިޔަން ރުފިޔާއިން ވަނީ ދަރުވާލާފައިވޭ
ގާނޫނީ ވަކީލް އަލީ ހުސެއިން: ވިދާޅުވީ ގައުމު ސަލާމަތް ކުރަން ކަމަށްބުނެ އައިމީހުން 2 އަހަރުގެ ތެރޭ 38 ބިލިޔަނަށް ވުރެ މަތިން ދައުލަތް ދަރުވާލާފައިވާ ކަމަށް
ގައުމު ސަލާމަތްކުރުމުގެ ނަމުގައި ވެރިކަމަށް އައި ރައީސް ޑރ މުހައްމަދު މުއިއްޒުގެ ސަރުކާރުން ވޭތުވެދިޔަ ދެ އަހަރުގެ ތެރޭގައި ދައުލަތް 38.1 ބިލިޔަން ރުފިޔާއިން ދަރުވާލާފައިވާ ކަމަށް ކެންދޫ ދާއިރާގެ ކުރީގެ މެންބަރު އަދި މަޝްހޫރު ޤާނޫނީ ވަކީލު އަލްއުސްތާޛު ޢަލީ ޙުސައިން ވިދާޅުވެއްޖެ އެވެ.
އެކްސް ގައި ކުރެއްވި ޕޯސްޓެއްގައި ޢަލީ ޙުސައިން ވިދާޅުވީ، ގިނަ ވައުދުތަކެއް ވެގެން ވެރިކަމަށް އައިސް ސަރުކާރުން ގަައުމު ރަނގަޅު ކުރަން އެއްވެސް އިސްލާހީ ފިޔަވަޅެއް އަޅާފައި ނުވާ ކަމަށާއި ގައުމުގެ އިގްތިސާދީ ހާލަތު ދަނީ ދުވަހެއް ދުވަހަކަށް ގޯސްވަމުންނެވެ.
އަދި ޑޮލަރުގެ އަގު މިހާރު ހުރީ 20 ރުފިޔާއިން މަތީގައި ކަމަށާ، އާފަލުގެ އަގު ވެސް ހުރީ 10 ރުފިޔާއިން މަތީގައި ކަމަށް ޢަލީ ޙުސައިންގެ ޕޯސްޓުގައި ފާހަގަކުރައްވައިފައިވެ އެވެ.
ގައުމު ސަލާމަތްކުރަން ކަމަށް ބުނެ އައި މީހުން ދެ އަހަރުގެ ތެރޭގައި 38.1 ބިލިޔަން ރުފިޔާއިން ދައުލަތް އިތުރަށް ދަރުވާލައިފި. އެކަމަކު އެއްވެސް އިސްލާހީ ފިޔަވަޅެއް ނޭޅޭ. ހާލަތު މިދަނީ އިހަށްވުރެ ގޯސްވަމުންގާނޫނީ ވަކީލް އަލީ ހުސެއިން
އިންޑޮނޭޝިއާގައި މިހާރު ހިނގަމުންދާ ހަމަނުޖެހުންތަކާ ގުޅުވައި ވާހަކަދައްކަވަމުން، ޢަލީ ޙުސައިން ވިދާޅުވީ ރާއްޖޭގައިވެސް އިސްލާހީ ބަދަލުތައް އަންނާނީ ކަންކަން އެހާ ހިސާބަށް ގޮސްގެން ކަމަށެވެ.
އެގޮތުން އިންޑޮނޭޝިއާގެ ގާނޫނު ހަދާ މަޖިލީހުގެ މެންބަރުންނަށް މުސާރައާއި ހައުސިންގ އެލަވަންސް ބޮޑުކުރުމާ ދެކޮޅަށް އެ ގައުމުގެ ރައްޔިތުން މުޒާހަރާކުރަމުންދާތީ، ރައީސް ޕްރަބޯވޯ ސުބިއަންޓޯ ވަނީ ސަރުކާރުގެ ބައެއް އިނާޔަތްތައް އުވާލުމަށް ނިންމަވާފައިކަމަށް އޭނާ ވިދާޅުވި އެވެ.
ޢަލީ ޙުސައިންގެ މި ބަސްތަކުން ދޭހަވަނީ ގައުމުގެ އިގްތިސާދީ ހާލަތު ރަނގަޅުކުރުމަށް އަވަސް ފިޔަވަޅުތަކެއް އަޅަންޖެހިފައިވާ ކަމާއި، މިހާރުގެ ސަރުކާރުގެ އިގްތިސާދީ ސިޔާސަތުތަކާމެދު އިތުރަށް ވިސްނަންޖެހިފައިވާ ކަމެވެ.
އަލީ ހުސެއިން މިފަދައިން ވިދާޅުވެފައިވާއިރު، ފިނޭންސް މިނިސްޓްރީގެ ތަފާސްހިސާބުތަކުން ހާމަވެފައިވާ ގޮތުން މި އަހަރުގެ ދެވަނަ ކުއާޓަރ ނިމުނުއިރު ދިވެހި ދައުލަތުގެ ޖުމްލަ ދަރަނި 148.9 ބިލިއަން ރުފިޔާއަށް ވަނީ އަރާފަ އެވެ. އަދި އިރު ރައީސް މުއިއްޒުގެ ސަރުކާރުގެ ދެ އަހަރުގެ ދަރަނި 38.1 ބިލިއަން ރުފިޔާއަށް އަރާކަން ވަނީ ފާހަގަކޮށްފަ އެވެ.
މި ހިސާބުތަކަށް ބަލާއިރު، ރައީސް މުއިއްޒުގެ ސަރުކާރު ވެރިކަމަށް އައި ފަހުން ނެގި ދަރަނި ވަނީ 38.1 ބިލިއަން ރުފިޔާއަށްވުރެ އިތުރުވެފައެވެ.
