މެލޭޝިއާގައި ދިވެހި ފިރިހެނަކު ހައްޔަރުކޮށްފައިވާ ކަމަށާއި، އޭނާއަށް ތުހުމަތު ކުރެވޭ ގެވެށި އަނިޔާގެ މައްސަލައެއް ބަލަމުން އަންނަ ކަމަށް ދިވެހި ފުލުހުން ބުނެފިއެވެ.

ދިވެހި ފުލުހުންގެ ހިދުމަތުން ވެސް ވަނީ އެކަން ޔަގީން ކޮށްދީފަ އެެވެ. މެލޭޝިޔާ ފުލުހުން ހައްޔަރުކުރީ އަބްދުލް ބާތިން މުހައްމަދު މުސްތަފާ އެވެ.

ހޮނިހުރި ދުވަހު ފުލުހުން މީޑިއާ އާ ހިއްސާކުރި މެސެޖެއްގައި ބުނީ، މެލޭޝިއާ ފުލުހުން ބަލަމުން އަންނަ މައްސަލައަކާ ގުޅިގެން އަބްދުލް ބާތިން މުހައްމަދު މުސްތަފާ ހައްޔަރުކުރިކަމުގެ މައުލޫމާތު ލިބިފައިވާ ކަމަށެވެ.

ފުލުހުން ރާއްޖެ އެމްވީ އަށް ބުނީ އެ ފިރިހެން މީހާގެ މާބޮޑު ތަފްސީލެއް ލިބިފައި ނުވާ ކަަމަށާއި އެހެން ނަމަވެސް ރާއްޖޭގައި ފުލުހުން ބަލަމުން ގެންދަނީ އޭނާގެ ގެވެށި އަނިޔާގެ މައްސަލައެއް ކަމަށެވެ.

ދިވެހި ފުލުހުން ބުނީ މެލޭޝިއާ ފުލުހުން ކުރަނީ ބާތިންގެ އެހެން މައްސަލައެއްގެ ތަހުގީގެއް ކަމަށެވެ. ނަމަވެސް ކޮން ކަމަކާއި ގުޅޭ މައްސަލައެއް ކަމެއް ފުލުހުން ހާމައެއް ނުކުރެ އެވެ.