ރައީސުލްޖުމްހޫރިއްޔާ، ޓެކްސް އެޕީލް ޓްރައިބިއުނަލްގެ މެންބަރު ކަމަށް، ފަސް މެންބަރުން އައްޔަން ކުރައްވައިފި

ރައީސުލްޖުމްހޫރިއްޔާ، ޑރ.މުހައްމަދު މުއިއްޒު ޓެކްސް އެޕީލް ޓްރައިބިއުނަލްގެ މެންބަރު ކަމަށް، ފަސް މެންބަރުން އައްޔަން ކުރައްވައިފި އެވެ.

މެންބަރުކަމަށް، މި ފަސްބޭފުޅުން ޢައްޔަންކުރައްވާފައިވަނީ 2025 ނޮވެންބަރު 29 ވަނަ ދުވަހު އެވެ. ޓެކްސް އެޕީލް ޓްރައިބިއުނަލް އުފައްދާފައި ވަނީ ޓެކްސް ނެގުމާ ބެހޭ އިދާރީ ޤާނޫނުގެ ދަށުން ޓެކްސްއާ ގުޅޭ މައްސަލަތައް ބެލުމަށްޓަކާ އެވެ.

އެ ބޭފުޅުން މަޤާމަށް އައްޔަންކުރެއްވީ ޤާނޫނު ނަންބަރު 3/2010 ޓެކްސް ނެގުމާބެހޭ އިދާރީ ޤާނޫނުގެ 56 ވަނަ މާއްދާގެ (ހ) ގެ (1) ވަނަ ނަންބަރުގައިވާ ގޮތުގެ މަތިންނެވެ.

ޓެކްސް އެޕީލް ޓްރައިބިއުނަލްގެ މެންބަރުކަމަށް ރައީސުލްޖުމްހޫރިއްޔާ ޢައްޔަން ކުރެއްވި ފަސް ބޭފުޅުންނަކީ، ސ.ހިތަދޫ މާވަހި، އަލްފާޟިލް ޙަސަން ނާޞިޙް އަޙްމަދު، ށ.ކޮމަންޑޫ ޗަމަން، އަލްއުސްތާޛާ އުސާމާ މޫސާ، ހމ.ފްލެޓްނަންބަރު 02-2-88، އަލްއުސްތާޛާ ޢާއިޝަތު އިޝާ، ގއ.ނިލަންދޫ ގަސްދޮށުގެ، އަލްއުސްތާޛާ ޝިފްޒާ ޢަބްދުލްޤައްޔޫމް އަދި ގދ.ގައްދޫ ބީޗްކޯނަރ، އަލްފާޟިލް އަޙްމަދު ޔާމީން އެވެ.

ޓެކްސް އެޕީލް ޓްރައިބިއުނަލްގައި މިހާރު ތިއްބެވި ފަސް މެންބަރުންގެ މުއްދަތު ހޮނިހިރު ދުވަހަށް ވަނީ ހަމަވެފަ އެވެ. މިހާރު އައްޔަން ކުރެއްވި މެމްބަރުން މަޤާމަށް އައްޔަން ކުރައްވާފައިވާ ސަބަބަކީ އެއީ އެވެ.