މިދިޔަ އޭޕްރީލް މަހުގެ 18 ވަނަ ދުވަހު ހ. މިޓާޒްގެ ފުރާޅު މައްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝީދުގެ މައްސަލާގައި ދައުވާ ކުރެވިފައިވާ ގ. އެރިޔަދޫ، ރައުދު އަހުމަދު ޒިލާލުގެ މައްސަލަ ބުދަ ދުވަހު ކްރިމިނަލް ކޯޓުން ނިންމާލައިފި އެވެ.

އެ މައްސަލަ ނިމުނީ ރައުދު އިތުރު ހުކުމެއް ތަންފީޒު ކުރަން ނުޖެހޭ ގޮތަށެވެ. ރައުދުގެ މައްޗަށް ދައުލަތުން ކުރި ދައުވާއަކީ އެހީއަށް ބޭނުންވެފައިވާ މީހަކަށް އެކަށީގެންވާ ސަބަބެއް ނެތި އެހީ ނުވުމުގެ ދައުވާ އެވެ. ރައުދަކީ ހާދިސާ ހިނގި ވަގުތު ޔުމްނު އާ އެއްކޮށް އެތަނުގައި ހުރި މީހެކެވެ. ދައުލަތުން ދައުވާ ކުރީ ޔުމްނު ވެއްޓުނުކަން އެނގިހުރެ، އެހީ ނުވެ އެތަނުން ގޮސްފައިވާތީ އެވެ.

ކްރިމިނަލް ކޯޓުން ބުނީ އެ ކުށުގެ އަސާސީ އަދަބަކީ އެއް މަހާއި ހަ ދުވަހަށް ޖަލަށްލުން ކަމަށް ވިޔަސް، ރައުދުގެ މައްޗަށް 27 ދުވަހުގެ ޖަލު ހުކުމެއް އިއްވީ އޭނާ ކޯޓުގައި އެ ކުށަށް އިއުތިރާފު ވެ އެއްބަސްވެފައި ވާތީ ކަމަށެވެ. ކޯޓުން ބުނީ ރައުދުގެ މައްޗަށް ދައުވާ ކުރި ކުށަށް އޭނާ އިއުތިރާފު ވުމުން އޭނާގެ އަދަބު ލުއި ކޮށްދީފައިވާ ކަމަށެވެ.

އަދި އަދަބުގެ މިންވަރު މަތިކުރަން ދައުލަތުން އެދިފައިނުވާ ކަމަށް ވެސް ކޯޓުން ބުންޏެވެ. ކޯޓުން އިތުރަށް ފާހަގަކުރި ކަމަކީ ރައުދުގެ މައްޗަށް 27 ދުވަހުގެ ޖަލު ހުކުމެއް އިއްވި ނަމަވެސް ތަހުގީގު މަރުހަލާގައި އޭނާ ބަންދުގައި އެ މުއްދަތު ހޭދަ ކޮށްފައިވާ ކަމެވެ. އެހެންވެ، އެ މައްސަލާގައި އޭނާ ދެން ތަންފީޒު ކުރަންޖެހޭ އަދަބެއް ނެތް ކަމަށް ކޯޓުން ވަނީ ނިންމައިފަ އެވެ.

ޔުމްނު ވެއްޓުނު ހާދިސާއަކީ މުޅި ރާއްޖޭގެ ސަމާލުކަން އެކަމަށް ހުއްޓުނު ހާދިސާއެކެވެ. އެ ހާދިސާގެ ތަހުގީގު ހިންގާ ގޮތާ ގުޅޭ ގޮތުން ނުރުހުން ފާޅުކޮށް، އެ ތަހުގީގަށް ސަރުކާރުގެ އިސް ބޭފުޅުންތަކެއް ނުފޫޒު ފޯރުވާ ކަމަށް ބުނެ ޒުވާނުން ސިލްސިލާ މުޒާހަރާތަކެއް ވެސް ކުރި އެވެ.

ޒުވާނުންގެ މުޒާހަރާތަކާ ގުޅިގެން ރައީސް ޑރ. މުހައްމަދު މުއިއްޒު، އެ ހާދިސާ ތަހުގީގު ކުރުމަށް ރިޔާސީ ކޮމިޝަނެއް އުފެއްދެވި އެވެ. އެ ކޮމިޝަނުން މައްސަލަ ތަހުގީގު ކޮށް ބެލުމަށްފަހު ނިންމީ އެ އިމާރާތުން ޔުމްނު ވައްޓާލީ ކަމަށް ބެލެވޭނެ ހެއްކެއް ނެތް ކަމަށެވެ. ނަމަވެސް އެ ތަހުގީގުގައި ފުލުހުންގެ އިހުމާލުތަކެއް ހުރިކަން ފާހަގަވާތީ އެކަންކަމަށް ފިޔަވަޅު އަޅަން އެ ކޮމިޝަނުން އެދިފައިވެ އެވެ.