ޕްރޮސްތެޓިކް އަދި އޯތޮޓިކް މެނުފެކްޗަރިންގ ލެބޯޓްރީ ބަންދު ކޮށްފައި ހުންނަތާ 10 މަސް، ޚިދުމަތް ދެވޭނެ ދުވަހެއް ނޭނގޭ: ހުޅުމާލެ ހޮސްޕިޓަލް
އެ ލެބޯޓްރީ ބަންދުކުރީ ޓެކްނީޝަނެއް ނެތުމުން މި އަހަރު ފެބްރުއަރީ މަހު
ހުޅުމާލެ ހޮސްޕިޓަލުގައި ހުޅުވި ޕްރޮސްތެޓިކް އަދި އޯތޮޓިކް މެނުފެކްޗަރިންގ ލެބޯޓްރީ
ހުޅުމާލެ ހޮސްޕިޓަލުގައި ހުޅުވި ޕްރޮސްތެޓިކް އަދި އޯތޮޓިކް މެނުފެކްޗަރިންގ ލެބޯޓްރީ ބަންދު ކޮށްފައި ހުންނަތާ 10 މަހަށް ވުރެ ގިނަ ދުވަސް ވެއްޖެ އެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ޒަމާނީ ވަސީލަތްތަައް އެކުލެވޭ ފެންވަރުގެ ރަނގަޅު ހޮސްޕިޓަލްތައް ގާއިމްކުރުމުގެ ސިޔާސަތުގެ ދަށުން ކުރިއަށް ގެންދިޔަ ޕްރޮގްރާމަށް އިންޑިއާ ގެ ރައްޔިތުންގެ ފަރާތުން އިންޑިއާ ސަރުކާރުން ދިވެހި ސަރުކާރަށް ދިން އެހީގައި ގާއިމްކުރި މި ލެބްގެ ޚިދުމަތް 9 އޯގަސްޓް 2023 ގައި ފައްޓަވައިދެއްވީ ރައީސުލްޖުމްހޫރިއްޔާގެ ނައިބު، ފައިސަލް ނަސީމެވެ. މީގެ ކުރިން މި ޚިދުމަތް ހޯދަމުން ދިޔައީ ރާއްޖެއިން ބޭރުންނެވެ. މި ލެބޯޓްރީ ގައިމުކުރުމާއެކު ގިނަ އަދަދެއްގެ ކުޑަ ކުދިން ހިމެނޭހެން ގިނަ ބަޔަކު މި ލެބޯޓްރީން ޚިދުމަތް ހޯދަމުން ދިޔަ އެވެ. ނަމަވެސް މި އަހަރުގެ ތެރޭގައި މި ލެބޯޓްރީ ބަންދުކޮށް މިހާރު ރާއްޖެއިން މި ޚިދުމަތް ނުލިބޭތީ ގިނަ ބަޔަކު ކަންބޮޑުވުން ފާޅު ކޮށްފައިވެ އެވެ.
މި ލޯބްޓްރީ ބަންދުކޮށްފައިވާތީ މިކަމާ ގުޅޭ މައުލޫމާތު ސާފު ކުރުމަށް ފަށާއިރު ޕްރޮގްރާމްގެ ތެރެއިން ހުޅުމާލެ ހޮސްޕިޓަލަށް ގުޅުމުން އެ ހޮސްޕިޓަލް ގެ މުވައްޒަފު މައުލޫމާތް ދެއްވަމުން ވިދާޅުވީ ، މި ލެބޯޓްރީ ބަންދުކުރީ މަސައްކަތް ކުރާނެ ޓެކްނީޝަނެއް ނެތުމުން ކަމަށެވެ. އަދި ޓެކްނީޝަނެއް ނެތުމުން ޚިދުމަތް ނުދެވޭތީ މި އަހަރުގެ ފެބްރުައަރީ މަހުން ފެށިގެން އެ ލެބް ބަންދު ކޮއްފައިވާ ކަމަށް އެ މުވައްޒަފު މައުލޫމާތް ދެއްވިއެވެ.
މި ލެބޯޓްރީން ވަރަށް ގިނަ މީހުން ޚިދުމަތް ހޯދިކަން ފާހަގަކުރައްވާ އެމުވައްޒަފު ވިދާޅުވީ މިހާރު ވެސް ވަރަށް ގިނަ މީހުން ޚިދުމަތް ހޯދަން އަންނަ ކަމަށެވެ. ނަމަވެސް ޚިދުމަތް ދެވޭނެ ދުވަހެއް ވިދާޅުވަން ނޭނގޭ ކަމަށާއި، މެނޭޖްމަންޓްގެ ފަރާތުން މިއަދާ ހަމައަށް އެއްވެސް މައުލޫމާތެއް ހިއްސާ ނުކުރާ ކަމަށެވެ. އަދި ޓެކްނީޝަނެއް ލިބޭނެ ދުވަހެއް ވެސް ނޭނގޭ ކަމަށް އެ މުވައްޒަފު ވިދާޅުވިއެވެ.
ޕްރޮސްތެޓިކް އެންޑް އޯތޮޓިކް ލެބަކީ ޚާއްސަ އެސިސްޓިވް ޑިވައިސްތައް ތައްޔާރު ކުރެވޭނެހެން ގާއިމްކޮށްފައިވާ ލެބެކެވެ. މީގެކުރިން ޕްރޮސްތެޓިކް ނުވަތަ އޯތޮޓިކް އެސިސްޓިވް ޑިވައިސްތައް ބޭނުންވާ ފަރާތްތަކަށް މި ތަކެތި ހޯދަމުން ދިޔައީ ރާއްޖެއިން ބޭރުންނެވެ. އަދި މި ވަސީލަތްތައް ހުޅުމާލެ ހޮސްޕިޓަލުގައި ތައްޔާރު ކުރެވެން ފެށުމުން، މިކަމަށް ސަރުކާރުން ހޭދަކުރާ ޚަރަދުގެ 3 ގުނަ ސަލާމަތް ކުރެވިފައިވާ ކަަމަށް އޭރު ސަރުކާރުން ބުނެފައިވެ އެވެ. އަދި މިފަދަ ވަސީލަތް ބޭނުންވާ ފަރާތްތަކަށް އެންމެ އަވަސް މިނުގައި މިތަކެތި ލިބުމުގެ ފުރުސަތު ވެސް ފަހިވެގެން ގޮސްފައިވެ އެވެ.
މައުލޫމާތު ލިބިފައިވާ ގޮތުގައި ރައީސް ޑރ.މުހައްމަދު މުއިއްޒު ސަރުކާރުން މިހާރު މަސައްކަތް ކުރަނީ އަލަށް ރާއްޖޭގައި ގާއިމް ކުރެވޭ ޚިދުމަތެއްގެ ގޮތުގައި އަލުން ޕްރޮސްތެޓިކް އަދި އޯތޮޓިކް މެނުފެކްޗަރިންގ ލެބޯޓްރީއެއް ގާއިމްކޮށް ހުޅުވުމަށެވެ.
