ގާތްގަނޑަކަށް 24 ގަޑިއިރު ފަހުން އާސަންދަ އޮފީހަށް ދިމާވި އިންޓަނެޓް މައްސަލަ ހައްލުކޮށް ޚިދުމަތް ދޭން ފަށައިފި

އާސަންދަ އޮފީހަށް ދިމާވި އިންޓަނެޓް މައްސަލަ ހައްލުކޮށް، ޚިދުމަތް ދޭން ފަށާފައިވާ ކަމަށް އެކުންފުނިން ބުނެފިއެވެ.

އާސަންދަ އޮފީހުގެ އިންޓަނެޓް ޚިދުމަތް މެދުކެނޑިފައިވަނީ ބުދަ ދުވަހުގެ ހެނދުނުގެ ވަގުތެއްގައެވެ. އަދި އެކަމާ ގުޅިގެން ސަރވާ ޑައުންވެ، ޚިދުމަތަށް ވަނީ ބުރޫ އަރާފައެވެ.

ބުރާސްފަތި ދުވަހު މިމައްސަލައާ ގުޅޭގޮތުން ފަށާއިރު ޕްރޮގްރާމުން އާސަންދަ އޮފީހަށް ގުޅުމުން، އެ އޮފީހުގެ އޮފިޝަލެއް ވިދާޅުވީ އިންޓަނެޓަށް ދިމާވި މައްސަލަ ހައްލުކޮށް، ޚިދުމަތް ފަށާފައިވާ ކަަމަށެވެ. އަދި ސަރވާ ވެސް ރަނގަޅު ކަމަށް އޭނާ ވިދާޅުވިއެވެ.

މައުލޫމާތު ލިބޭ ގޮތުގައި މި މައްސަލަ ހައްލު ކޮށްފައިިވަނީ ބުރާސްފަތި ދުވަހުގެ ފަތިހުގެ ވަގުތެއްގައެވެ.

މި ސަރުކާރުގައި އާސަންދައިން ޚިދުމަތް ލިބުން ވަރަށް ދަތިވެފައިވާ ކަމަށް ގިނަ ބަޔަކު ދަނީ ބުނަމުންނެވެ. ޚިދުމަތް ލަސްވުމާއި، ފަރުވާއަށް އާސަންދަ ހަމަނުޖެހުމާއި، އާސަންދައިން ފައިސާ ދިނުން ލަސްވުން ފަދަ މައްސަލަތައް ދިމާވެއެވެ. އަދި އާސަންދައިން ބޭސް ލިބުން ދަތިވެ، ގިނަ ބޭސްތައް ރާއްޖެއިން ނުލިބޭ ކަމުގެ ޝަކުވާ ވެސް ވަނީ ބޮޑުވެފައެވެ.

މީގެ އިތުރުން ޓެކްނިކަލް މައްސަލަތަކާ ގުޅިގެން ޚިދުމަތަށް ބުރޫ އަރަމުންދާއިރު، ޖޫން މަހުގެ 27 ވަނަ ދުވަހު ވެސް ހުޅުމާލެ ހޮސްޕިޓަލަށް ކަރަންޓުގެ މައްސަލައެއް ދިމާވެ، އޯޕީޑީގެ ޚިދުމަތް ވަގުތީ ގޮތުން އެހެން ތަނަކަށް ބަދަލު ކުރަންޖެހުނެވެ. އެ މައްސަލަ ހައްލުކޮށް އޯޕީޑީ އާއްމު ހާލަތަށް ގެނެވުނީ 6 ގަޑިއިރު ފަހުންނެވެ. އަދި ޖުލައި މަހުގެ 8 ވަނަ ދުވަހު 1 ގަޑިއިރަށް ޚިދުމަތް މެދުކެނޑިގެން ދިޔައިރު، އެހެން ދިމާވި ސަބަބަކީ ސަރވާއަށް ދިމާވި މައްސަލައަކުންކަން ހުޅުމާލެ ހޮސްޕިޓަލްގެ މީޑިއާ އޮފިޝަލް ހާމަކޮށްފައިވެއެވެ.