ބިދޭސީ މުވައްޒަފެއްގެ މަރުގެ މައްސަލައިގައި ހައްޔަރުކުރި ކ. ހިންމަފުށީ ލައިފް ފެން ޕްލާންޓުގެ މެނޭޖަރު ދޫކޮށްލަން ޖެހިއްޖެ އެވެ.
ލައިފް ފެން އުފައްދާ ފެކްޓްރީ ގައި މަސައްކަތް ކުރަމުންދިޔަ އުމުރުން 38 އަހަރުގެ ބަންގްލަދޭޝްގެ ރައްޔިތަކު މަރުވީ އޯގަސްޓް މަހުގެ 19 ވަނަ ދުވަހު އެވެ.
އެ މައްސަލައާ ގުޅިގެން ފެން ޕްލާންޓުގެ މެނޭޖަރު ހައްޔަރު ކޮށްފައިވަނީ އޯގަސްޓް މަހުގެ 30 ވަނަ ދުވަހު އެވެ. އޭނާ ހައްޔަރުކޮށް، ބަންދާއި މެދު ގޮތެއް ނިންމުމަށް އެ ރަށު ކޯޓަށް ހާޒިރުކުރުމުން 12 ދުވަސް ޖެހި އެވެ.
ބަންދުގައި ހުއްޓާ ހައްޔަރުކުރި މީހާގެ ވަކީލުން ބުނެފައިވަނީ ، އެމީހާ ހައްޔަރުކޮށްފައިޖިނާއީ އިޖުރާއަތުގެ ގާނޫނާ ޚިލާފަށް ކަމަށެވެ. އަދި ހޭބިއަސް ކޯޕަސް ރިޓަކަށް އެދި ހުށަހަޅާފައިވެއެވެ.
ޖިނާއީ އިޖުރާއަތުގެ ގާނޫނުގެ 207 ވަނަ މާއްދާގައި ބުނެފައި ވަނީ މީހަކު ހައްޔަރުކޮށްފައި ވަނީ ޤާނޫނާ ޚިލާފަށް ކަމަށް ބުނެ، އޭނާ ހައްޔަރުން ދޫކޮށްލުމަށް އެދި، އޭނާއަށް ނުވަތަ އޭނާގެ ބަދަލުގައި އެހެން ފަރާތަކަށް ހޭބިއަސް ކޯޕަސް ރިޓަކަށް އެދި ހުށަހެޅިދާނެ ކަމަށެވެ.
ޖިނާއީ އިޖުރާއަތުގެ ގާނޫނުގެ 40 ވަނަ މާއްދާގެ (ރ) ގައި ބުނެފައިވަނީ މީހަކު ހައްޔަރުކުރަން ވާނީ، ސަބް އިންސްޕެކްޓަރ އޮފް ޕޮލިސް ރޭންކުން ފެށިގެން މަތީ ރޭންކެއްގެ އޮފިސަރެއްގެ ހުއްދައާއެކު، ޔުނިފޯމް އެޅި ފުލުހެއް ކަމަށެވެ.
ނަމަވެސް، ފެން ޕްލާންޓުގެ މެނޭޖަރު ހައްޔަރުކުރީ ޔުނިފޯމް އަޅައިގެން ހުރި ފުލުހަކަށް ނުވާތީ ކޯޓުން ވަނީ އޭނާ ދޫކޮށްލުމަށް އަމުރު ކޮށްފަ އެވެ.
މި މައްސަލައާ ގުޅިގެން އިތުރު މީހަކު ވެސް ހައްޔަރު ކޮށްފައިވާއިރު، ޝަރީއަތް ނިމެންދެން އެ މީހާ ބަންދު ކުރުމަށް ކޯޓުން ވަނީ އަމުރު ކޮށްފަ އެވެ.
ޔުނިފޯމް ނާޅައި ގޮސް ހައްޔަރު ކުރުމުން، މަސްތުވާތަކެތި ބޭނުންކޮށް އެތަކެތީގެ ވިޔަފާރި ކުރާކަމުގެ ތުހުމަތުގައި އޯގަސްޓް 24 ވަނަ ދުވަހު ފުލުހުން ހައްޔަރު ކުރި މީހަކު ދޫކޮށްލުމަށް މީގެ ކުރިން ކްރިމިނަލް ކޯޓުން އަމުރުކޮށްފައިވެއެވެ.