ރައީސް މުއިއްޒު ވެރިކަމުން ފައިބަންޖެހޭ ދުވަހު ވައްކަޅިން ވެސް ބަލައިލާނެ މީހަކު ނުވާނެ: ޑރ އިޔާޒް
ފައިސާ ދީގެން މާލެ ގެނެސް ބޮޑު ޖަލްސާ ބާއްވައިގެން އެއީ ސަރުކާރަށް އޮތް ތާއީދު ކަމަށް ދެކުމަކީ މޮޔަ ކަމެއް ކަމަށް އިޔާޒް ވިދާޅިވި
މަޝްހޫރު ދީނީ ޢިލްމުވެރިޔާ ޑޮކްޓަރު މުޙައްމަދު ޢިޔާޒް ޢަބްދުއްލަޠީފް
ބޭކާރު ގޮތުގައި ފައިސާ ތަޅާ ބުރުވައިގެން އޮށްޓަރެއް ހުރި އެއްވެސް ކަމެއް ކޮށްނުދެވުނީމާ، ވެރިކަމުން ފައިބަންޖެހޭ ދުވަހު ވައްކަޅިން ވެސް ބަލައިލާނެ މީހަކު ނުވާނެކަން ހަނދާނުގައި ރައީސް ޑރ. މުހައްމަދު މުއިއްޒު، ބަހައްޓަވަން ޖެހޭ ކަމަށް ދީނީ އިލްމުވެރިޔާ ޑރ. މުހައްމަދު އިޔާޒް އަބްދުއްލަތީފް ވިދާޅުވެއްޖެ އެވެ.
އެކްސް ގައި ކުރެއްވި ޕޯސްޓެއްގައި ޑރ. އިޔާޒް ވިދާޅުވީ ސިޔާސީ މަގާމުތަކުގައި ތިބޭ މީހުންނަށް މަޖުބޫރު ކޮށްގެންނާ މީހުންނަށް ފައިސާ ދީގެން މާލެ ގެނެސް، ކިތަންމެ ބޮޑު ޖަލްސާ އެއް ބާއްވައިގެން އެއީ ސަރުކާރަށް އޮތް ތާއީދު ކަމަށް ދެކުމަކީ މޮޔަ ކަމެއް ކަމަށެވެ.
މީހުންގެ ލޯ މައްޗަށް ދަޅަ ދެއްކުމުގެ ބަދަލުގައި ފައިދާ ކުރާ ކަމެއް ކޮށްދީފިނަމަ ދެދުނިޔޭގައި ވެސް ފައިދާކުރާނެ ކަމަށް ޑރ. އިޔާޒް ވިދާޅުވި އެވެ.
ނަމަވެސް ބޭކާރު ގޮތުގައި ފައިސާ ތަޅާ ބުރުވައިގެންނާ އޮށްޓަރެއް ހުރި އެއްވެސް ކަމެއް ކޮށްނުދެވި ވެރިކަމުން ފައިބަންޖެހޭ ދުވަހު ވައްކަޅިން ވެސް ބަލައިލާނެ މީހަކު ނުވާނެކަން ރައީސް މުއިއްޒު ހަނދާން ބަހައްޓަވަން ޖެހޭ ކަމަށް އިޔާޒް ވިދާޅުވި އެވެ.
ޑރ. އިޔާޒް ވަނީ ރައީސް މުއިއްޒަށް ބައިއަތު ހިފި ސަތޭކަ އިލްމުވެރިން މި ވާހަކަތައް އެމަނިކުފާނަށް ބުނެ ނުދެއްވަނީތޯ ސުވާލު އުފައްދަވާފަ އެވެ. ނުވަތަ އެބޭފުޅުން ކިތަންމެ ވަރަކަށް ނަސޭހަތް ދިން ނަމަވެސް ރައީސް މުއިއްޒު އެ ނަސޭހަތްތައް އަޑު ނާއްސަވަނީ ތޯ ޑރ. އިޔާޒް ސުވާލު އުފެއްދެވި އެވެ.
މީގެ އިތުރުން ވެސް ޑރ. އިޔާޒް ވަނީ ފުވައްމުލަކު ސިޓީގައި ފެނުގެ ދަތިކަމުގެ ޝަކުވާތައް އިތުރުވެ، ރައްޔިތުން ބިކަ ވެފައިވާ މި ދަނޑިވަޅުގައި، ރައީސް މުއިއްޒު ކުރައްވަމުންދާ "ބޭކާރު ކަންތައްތައް" ހުއްޓުވުމަށް އެމަނިކުފާނުގެ ޅިޔަނުން އެއްވެސް ނަސޭހަތެއް ނުދެއްވަނީތޯ ވެސް ސުވާލު އުފައްދަވާފަ އެވެ.
ރާއްޖޭގެ އެކި ސަރަޙައްދުތަކުން ފެނުގެ ދަތިކަމުގެ ޝަކުވާތައް އިތުރުވެފައިވާ މި ދަނޑިވަޅުގައި، ރައީސް ޑރ. މުއިއްޒު އަމަލު ކުރައްވަމުން ގެންދަވާ ގޮތާމެދު ކަންބޮޑުވުން ފާޅުކުރައްވާ ޑރ. އިޔާޒް ވިދާޅުވީ ރައީސް މުއިއްޒު ގެންދަވަނީ، ރައްޔިތުން ފެނަށް ޖެހި، ޒަރޫރީ ބޭނުންތައް ފުއްދުމުގެ ދަތިކަން ކުރިމަތިވެފައި ވާއިރު ވެސް، ތިމާ އަށް ތާއީދު އޮތްކަން ދެއްކުމަށް ބޭކާރު ކަންތައްތައް ކުރައްވަމުން ކަމަށެވެ.
ސަރުކާރު ހިންގާ ޕީއެންސީ އިން ހުކުރު ދުވަހުގެ ރޭ މާލޭގެ އާޓިފިޝަލް ބީޗު ގައި ބާއްވާ ޖަލްސާ އަށް މީހުން ގިނަ ކުރަން ރާއްޖޭގެ އެކި އެއަރޕޯޓްތަކުން އެތައް ޗާޓަރު ފްލައިޓެއް އޮޕަރޭޓް ކޮށްފައި ވާއިރު، ގައުމީ އެއާލައިން، މޯލްޑިވިއަން ގައި މިވަގުތު އޮތް އެންމެ ބޮޑު މަތިންދާ ބޯޓު ބުރާސްފަތި ދުވަހު ފުރަތަމަ އައްޑޫ ސިޓީ ގަމަށް ކުރި ދަތުރު ވެސް ވެގެން ދިޔައީ ޖަލްސާ އަށް މީހުން ބަލައި ކުރި ދަތުރަށެވެ.
މިއީ 264 މީހުންގެ ޖާގަ އޮތް ބޯޓެއް ކަމަށް މައުލޫމާތު ލިބިއެވެ. އޭގެ އިތުރުން ފެނަށް ޖެހިފައި އޮތް ފުވައްމުލަކު ސިޓީއަށް ބޯފެން ގެންދިޔުމަށް މޯލްޑިވިއަނުން އެ ރަށަށް ޗާޓަރުކޮށްގެން އަޅަމުންދާ ފްލައިޓުތަކުގައި ވެސް މާލެ އަށް ގެންނަނީ ޖަލްސާ އަށް އަންނަ މީހުން ކަމަށް ވެސް ބައެއް މީހުން ބުނެފައި ވެއެވެ. އެއަރޕޯޓަށް އަންނަ މީހުން އުފުލުމަށް އެމްޓީސީސީގެ ބޮޑެތި ބަސްތައް ދަނީ ބޭނުން ކުރަމުންނެވެ.
