އިންޓަގްރިޓީ ދަމަހައްޓަން ހުރި ތަންތަނުގެ މަގާމުތަކުގައި ތިއްބެވި ބޭފުޅުން އިންޓަގްރިޓީ ހިފެހެއްޓުމަށް ކުރެވުނު ކަމެއް ފެންނާކަށް ނެތް: މަޖިލިސް ނައިބު ރައީސް ނާޒިމް
ބޮޑެތި ގައުމުތަކުގައި މިނިވަން މުއައްސަސާތައް ހުންނަ މިންވަރަށް މި ގައުމުގައި މިނިވަން މުއައްސަސާތައް އެބައޮތް
ބަޖެޓް ދިރާސާ ކުރާ ކޮމިޓީ
އިންޓަގްރިޓީ ދަމަހައްޓަން ހުރި ތަންތަނުގެ މަގާމުތަކުގައި ތިއްބެވި ބޭފުޅުންގެ އިންޓަގްރިޓީ ހިފެހެއްޓުމަށް ކުރެވުނު ކަމެއް ފެންނާކަށް ނެތް ކަމަށް މަޖިލިސް ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވެއްޖެ އެވެ.
ބަޖެޓް ދިރާސާ ކުރާ ކޮމިޓީގެ ބުރާސްފަތި ދުވަހުގެ ބައްދަލުވުމުގައި މެމްބަރުން ވަނީ މިނިވަން މުއައްސަސާތަކަށް ވަރަށް ބޮޑަށް ފާޑުވިދާޅުވެފައެވެ.
ދިވެހިރާއްޖޭ ގައި ކަންކަންވާ މިނިވަން މުއައްސަސާތައް ނެތް ކަމަށާއި، ހުރީ ނަންވާ މުއައްސަސާތައް ކަމަށް ބަޖެޓް ދިރާސާކުރާ ކޮމިޓީގެ މެންބަރުން ވިދާވިއެވެ.
ކޮމެޓީގައި މެންބަރުން ވަނީ ރާއްޖޭގައި މިނިވަން މުއައްސަސާތައް ވަރަށް ގިނަކަން ފާހަގަކުރައްވައި ވާހަކަ ދައްކަވާފަ އެވެ. އަދި އެ މުއައްސަސާތަކުގެ މަސައްކަތްތައް އެންމެ އެކަށީގެންވާ ގޮތުަގައި ނުހިނގާ ކަމަށާއި، ނަތީޖާ ނުފެންނަ ކަމަށް ވިދާޅުވެފައިވެ އެވެ.
މި ކޮމެޓީގައި ވާހަކަ ދައްކަވަމުން ހަނިމާދޫ ދާއިރާގެ މެންބަރު އަބްދުލް ގަފޫރު މޫސާ ވިދާޅުވީ ބޮޑެތި ގައުމުތަކުގައި މިނިވަން މުއައްސަސާތައް ހުންނަ މިންވަރަށް މި ގައުމުގައި މިނިވަން މުއައްސަސާތައް އެބަހުރި ކަމަށާއި، އަހަރުން އަހަރަށް ބަޖެޓު ބޮޑު ވަމުންދާ ކަމަށެވެ. އަދި ރަނގަޅު ނަތީޖާ ނުނެރެވުނަސް މުވައްޒަފުން ވެސް އިތުރު ވަމުންދާ ކަމަށް އޭނާ ވިދާޅުވި އެވެ.
މިތަނުގައި މިހުރި އެއްވެސް މުއައްސަސާއަކާ ދޭތެރޭގައި އެބޭފުޅުންގެ ގާނޫނީ މަސައްކަތް ފުރިހަމަ ކުރާކަމުގެ އިތުބާރެއް ހުރި އެއްވެސް ބޭފުޅަކު ނެތް. ބަޖެޓު ބޮޑު ކޮށްދޭން ޖެހޭނީ އެބޭފުޅުންނަށް ހަވާލުކޮށްފައިވާ މަސައްކަތުން ހޯދުނު ނަތީޖާއެއް ދައްކާފައި ބަޖެޓު ބޮޑު ކޮށްދެވޭނީ އަޅުގަނޑުމެންނަށް. އެކްޝަން ޕްލޭންއާ އަދި ޑިވަލޮޕްމަންޓް ޕްލޭންއާ އޮތް ހާލަތާ މިހުރިހާ އެއްޗެއް ހުންނަން ޖެހޭނެ. މިއިން އެއްވެސް އެއްޗެއް ނެތް ފެންނާކަށް.ހަނިމާދޫ ދާއިރާގެ މެންބަރު އަބްދުލް ގަފޫރު މޫސާ
އެންޓި ކޮމިޝަން ކޮމިޝަނަށް އިޝާރާތް ކުރައްވައި މެންބަރު އަބްދުލް ގަފޫރު މޫސާ ވިދާޅުވީ އެ ކޮމިޝަނުގައި ވެސް 100ށް ވުރެ ގިނަ މުވައްޒަފުން އެބަތިބި ކަމަށާއި، ރައްޔިތުންނަށް ހޯދައިދެވުނު ނަތީޖާ އެއް ނެތް ކަމަށެވެ.
މެންބަރު އަބްދުލް ގަފޫރު ވިދާޅުވީ ކޮމިޝަންތަކަށް އައްޔަން ކުރާ މެންބަރުންގެ އަދަދު ވެސް މަދު ކުރަންޖެހޭ ކަމަށެވެ. އެގޮތުން ކޮންމެ ކޮމިޝަނެއް ނުވަތަ މުއައްސަސާއެއްގައި 5 ނުވަތަ 7 މެންބަރުން އައްޔަން ކުރަން ނުޖެހޭ ކަމަށާއި، 3 މެންބަރުންނާއެކު ވެސް ހިންގޭނެ ކަމަށް އޭނާ ވިދާޅުވި އެވެ.
މީގެ އިތުރުން މި ކޮމެޓީގައި ވާހަކަ ދައްކަވަމުން ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވީ، ނޭޝަނަލް އިންޓަގްރިޓީ ކޮމިޝަނަށް އަހަރަކު 14.7 މިލިއަން ރުފިޔާ، ޗިލްޑްރަންސް އޮމްބަޑްސްޕަރސަންގެ އޮފީހަށް އަހަރަކު 8.8 މިލިއަން ރުފިޔާ، އިންފޮމޭޝަން ކޮމިޝަނަރު އޮފީހަށް އަހަރަކު 7.5 މިލިއަން ރުފިޔާ އަދި ހިއުމަން ރައިޓް ކޮމިޝަން އޮފީހަށް 29 މިލިއަން ރުފިޔާ އަހަރަކު ހަރަދުވާ ކަމަށެވެ. އަދިވެސް ރާއްޖޭގެ މިނިވަން މުއައްސަސާތަކަށް ގިނަ ހަރަދުތަކެއް ހިނގާ ކަމަށް އޭނާ ވިދާޅުވި އެވެ.
މިސާލަކަށް ދަންނަވަންޏާ ނޭޝަނަލް އިންޓްގްރިޓީ ކޮމިޝަން. މިތަނުން ރިޕޯޓުތައް ތައްޔާރުކުރޭ. އެހެންނަމަވެސް އިންޓަގްރިޓީ ދަމަހައްޓަން ތަންތަނުގެ މަގާމުތަކުގައި ތިއްބެވި ބޭފުޅުންގެ އިންޓަގްރިޓީ ހިފެހެއްޓުމަށް ކުރެވުނު ކަމެއް ފެންނާކަށް ނެތް. އަޅުގަނޑުމެން ޕޮލްކޯގެ މައްސަލަ ބަލަމުންދިޔައިރު ފެނުނު ހުށަހެޅިފައި ހުރި މައްސަލަ 7 އަހަރުވެފައިވާ މައްސަލަ އެބަހުރި. އެމްއެމްޕީއާރްސީގެ ހިޔާނާތުގެ މައްސަލަ ބަލާތާ 6 އަހަރު ވެއްޖެ. ނިމިފައި ނެތް. ޕީޖީން ވެސް އެބައޮތް އަންގާފައި މައްސަލަތައް ބަލަން. މި ކަހަލަ ތަންތަން ހަރަދު ކުޑަ ކުރުމުގެ ދަށުން އެހެން ތަންތަނަށް ލާން ޖެހޭ. ލާފައި ޖުމްލަ ހަރަދު ކުޑަ ކުރެވެނޭ ގޮތަށް މަސައްކަތް ކުރިއަށް ގެންދަން ޖެހޭ.ދިއްގަރު ދާއިރާގެ މެންބަރު އަހުމަދު ނާޒިމް
މެންބަރު ނާޒިމް ވިދާޅުވީ މިހާރު މިނިވަން މުއައްސަސާތަކާއި ކޮމިޝަންތަކާއެކު މަތި ވަރަށް ބަރު ކަމަށާއި، އެއް ކުރެވޭ މުއައްސަސާތަކާއި ކޮމިޝަންތައް އެއްކުރަން ޖެހޭ ކަމަށެވެ. މިއަދު ކަންކަންވާ މިނިވަން މުއައްސަސާތައް ނެތް ކަމަށާއި، ހުރީ ނަންވާ މުއައްސަސާތައް ކަމަށް އޭނާ ވިދާޅުވި އެވެ.
މި ކޮމެޓީގައި މިކަމަށް ގިނަ މެންބަރުން ވަނީ ތާއީދުކޮށް ވާހަކަ ދައްކަވާފަ އެވެ.
ބަޖެޓް ދިރާސާކުރާ ކޮމިޓީގެ މެންބަރުން މި މޭރުމުން ވާހަކަ ދެއްކެވިއިރު، އޭސީސީ މަތިކޮށްފައިވާ މަސްއޫލިއްޔަތު އަދާކުރުމަށް ބޭނުން ވަނީ މިހާރު ކަނޑައަޅާފައިވާ ވަރަށް ވުރެ ބޮުޑު ބަޖެޓެއް ކަމަށް އެ ކޮމިޝަނުން ވަނީ ބުނެފަ އެވެ. މިކަމާ ގުޅިގެން ވަރަށް ގިނަ ބައެއްގެ ފާޑު ކިޔުން ވެެސް އެ ކޮމިޝަނަށް ވަނީ އަމާޒުވެފަ އެވެ. އެއީ މައްސަލައެއް އިންސާފު ވެރިކަމާ މިނިވަންކަމާއެކު ބަލާ ކޮމިޝަނެއް ނޫން ކަމަށާއި، އެއީ މެންޑިޑޭޓްގެ ބޭރުން މަސައްކަތް ކުރާ ސިޔާސީ ކޮމިޝަނެއް ކަމަށް ގިނަ ބަޔަކު ދަނީ ތުހުމަތު ކުރަމުންނެވެ.
