"މިއީ ސްކޭމް ސަރުކާރެއްގެ ސްކޭމް ރައީސުލްޖުމްހޫރިއްޔާއެއް. މީނާ އިސްތިއުފާ ދެއްވަން އެބަޖެހޭ!"
އެމްޑީޕީގެ މެޖޯރިޓީ އޮތް 19 ވަނަ މަޖިލީހުން ފާސްކޮށް މި ސަރުކާރާ ހަވާލު ކުރި ބަޖެޓަށް ވީގޮތް ނޭނގޭ ކަމަށް
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މިއަދުގެ ރާއްޖޭގެ ރައީސްކަމުގައި މި ހުންނެވީ ބޮޑު ސްކޭމަރެއް. މޯނޯރެއިލްއިން ފެށިގެން، އަންޑަ ވޯޓާ ޓަނަލުން ފެށިގެން، މާލޭގެ ޕާކިން ސްލޮޓްތަކުން ފެށިގެން މީނާ ހާދާފައި އޮތީ ހުސް ސްކޭމް. މިއީ ސްކޭމް ސަރުކާރެއްގެ ސްކޭމް ރައީސުލްޖުމްހޫރިއްޔާއެއް. މީނާ އިސްތިއުފާ ދެއްވަން އެބަޖެހޭ،ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމް
މިއަދު ރާއްޖޭގެ ރައީސް ކަމުގައި ހުންނެވީ ބޮޑު ސްކޭމަރެއް ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވެއްޖެ އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ބަޖެޓް ކޮމިޓީ ރިޕޯޓަށް ބަހުސް ކުރައްވަމުން މީކާއިލް ވިދާޅުވީ މި އަހަރުގެ ބަޖެޓަށް ވީ ގޮތް އެނގޭ އެކަކު ވެސް ނެތް ކަމަށެވެ. އަދި އެމްޑީޕީގެ މެޖޯރިޓީ އޮތް 19 ވަނަ މަޖިލީހުން ފާސްކޮށް މި ސަރުކާރާ ހަވާލު ކުރި ބަޖެޓަށް ވީގޮތް ވެސް ނޭނގޭ ކަމަށެވެ.
ރައްޔިތުންގެ ފައިސާ އިން މި ސަރުކާރު ކުރާ ކަމެއް އެނގޭ މީހަކު ނެތް ކަމަށާ ގައުމު ބަނގުރޫޓު ވުމުގެ ކުރިން ރައީސް ޑރ. މުހައްމަދު މުއިއްޒު އިސްތިއުފާ ދެއްވަން ޖެހޭ ކަމަށް މީކާއިލް ވިދާޅުވި އެވެ.
މީކާއިލް ވިދާޅުވީ މަޖިލީހުގެ މެންބަރަކަށް ވީތީ ބަޖެޓަށް ވޯޓު ދޭން ޖެހޭ ކަމަށް ސަރުކާރަށް ނިސްބަތްވާ މެންބަރުން ވިދާޅުވާ ކަމަށެވެ. ނަމަވެސް މިކަހަލަ ބަޖެޓަކަށް ވޯޓު ދޭން ނުޖެހޭ ކަމަށް މީކާއިލް ވިދާޅުވި އެވެ.
މި ބަޖެޓަކީ ބޮޑު އޮޅުވާލުމެއްގެ ތެރެއިން އައިސްފައިވާ ބަޖެޓެއް ކަމަށް ވެސް މީކާއިލް ވިދާޅުވި އެވެ. އެގޮތުން މެންބަރު ވިދާޅުވީ ބަޖެޓުގައި ހިސާބު އޮޅުވާލާފައިވާއިރު އަކުރު ވެސް އޮޅުވާލާފައިވާ ކަމަށެވެ. އެހެންކަމުން މިފަދަ ބަޖެޓަކަށް ވޯޓު ދޭން ނުޖެހޭ ކަމަށް މީކާއިލް ތަކުރާރު ކޮށް ވިދާޅުވި އެވެ.
މެންބަރު ވިދާޅުވީ ގައުމު ޑިފޯލްޓަކަށް ދާއިރު 20 ވަނަ ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން މިފަދަ ބަޖެޓަކަށް ވޯޓު ދިނީ ކީއްވެތޯ ރައްޔިތުން ފަހުން ސުވާލު ކުރާނެ ކަމަށެވެ. އެހެންކަމުން ރައްޔިތުންނަށް ޖަވާބުދާރީ ވުމަށްޓަކައި ވެސް މި ބަޖެޓަށް ވޯޓު ދޭން ނުޖެހޭ ކަމަށް މީކާއިލް ވަނީ ވިދާޅުވެފަ އެވެ.
ރާއްޖޭގެ މާލީ ހާލަތު މިއަދު އޮތް ގޮތް އެންމެނަށް ވެސް އެނގޭ ކަމަށާ އިގްތިދާތީ ހާލަތު ވެސް އޮތީ ސާފުކޮށް ފެންނަން ކަމަށް މީކާއިލް ވިދާޅުވި އެވެ. އަދި ވިދާޅުވީ މިހާރު މި އޮތް ހާލަތުގައި އޮވެ، ރިކަރަންޓް ޚަރަދު ކުޑަ ނުކޮށްފި ނަމަ ޑިފޯލްޓް ވާނެ ކަމަށެވެ. އެހެން ކަމުން ހުރިހާ މެންބަރުން ވެސް އެކަމާ މެދު ވިސްނާލުމަށް މީކާއިލް ވަނީ ގޮވާލައްވާފަ އެވެ.
