ދުނިޔޭގެ އެންމެ ބޮޑު އެއް ކޭކު މުބާރާތުން ނަޝީ އަށް ފަޚުރުވެރި ރިހި މެޑަލް އެއް
ނަޝީއަށް ކޭކު މުބާރާތުން ސިލްވަރ މެޑަލް ލިބިފައިވަނީ 3 ނުވަތަ އެއަށްވުރެ ގިނަ ޓަޔަރ ކޭކް ކެޓަގަރީއިން
ނަޝީ ކޭކްސް އިން މުބާރާތުގައި ބައިވެރި ކުރި ކޭކް އަދި އެ މުބާރާތުގައި ނަގާފައިވާ ބައެއް ފޮޓޯތައް
މަޝްހޫރު ކޭކު އާޓިސްޓް އައިމިނަތު ނަޝީދާ އަބޫބަކުރު (ނަޝީ) އަށް، ދުނިޔޭގެ އެންމެ ބޮޑު އެއް ކޭކު މުބާރާތް ކަމަށްވާ ކޭކު އިންޓަރނޭޝަނަލް އިން ފަޚުރުވެރި ރިހި މެޑަލް އެއް ލިބިއްޖެ އެވެ.
ދިވެހިންގެ ތެރޭގައި ކޭކު އެޅުމުގެ ރޮނގުން ބޮޑު މަޤްބޫލްކަމެއް ހޯދާފައިވާ ނަޝީ އަށް މި މުބާރާތުން ސިލްވަރ މެޑަލް ލިބިފައި ވަނީ 3 ނުވަތަ އެއަށް ވުރެ ގިނަ ޓަޔަރ ކޭކް ގެޓަގަރީ އިންނެވެ.
އެތައް ހާސް އާޓިސްތުންނެއް ބައިވެރިވި މި ކޭކު މުބާރާތަކީ 35 ކެޓަގަރީ އަށް ބަހާލައިގެން ކުރިއަށް ގެންދާ މުބާރާތެކެވެ. ނަޝީ އަށް ގޯލްޑް މެޑަލް ނުލިބުނީ އެންމެ 3 މަރކްސްގެ ތަފާތަކުން ކަމަށް ވާއިރު އޭނާގެ މަސައްކަތްތަކަށް މި މުބާރާތުގެ އުފެއްދުންތައް ބަލާލި އެތައް ބަޔަކު ވަނީ ތައުރީފްކޮށްފަ އެވެ.
ނަޝީގެ މަސައްކަތަށް އެތައް ބައެއްގެ ތައުރީފް ވެސް ވަނީ އަމާޒުވެފައެވެ. އޭނާގެ މަސައްކަތަށް ތައުރީފް ކުރި މީހުންގެ ތެރޭގައި ބޭރުގެ ފަރާތްތައް ވެސް ހިމެނެ އެވެ. ނަޝީ އަށް މި މުބާރާތުން ސިލްވަރ ލިބުނު ނަމަވެސް އޭނާގެ މަސައްކަތަކީ ގޯލްޑް ލިބޭ ފެންވަރުގެ މަސައްކަތެއް ކަމަށް ނަޝީ އަޅާފައިވާ ކޭކު ފެނުނު މީހުން ވަނީ ބުނެފަ އެވެ.
ނަޝީ މި މުބާރާތުގައި ބައިވެރި ކުރި ކޭކަށް ތައުރީފް ކުރި މީހުންގެ ތެރޭގައި އެހެނިހެން ޤައުމުތަކަށް ނިސްބަތްވާ ކޭކު އާޓިސްޓުން ފާހަގަކޮށްލެވެ އެވެ. އެގޮތުން ކޭކުގެ ކޮންސެޕްޓާއި ޑިޒައިނިން އަދި އެ ކޭކުގައި ކޮށްފައިވާ ކަވި މަސައްކަތަށް އެތައް ބަޔަކު ވަނީ ތައުރީފް ކޮށްފަ އެވެ.
