ދިވެހިންގެ ތެރޭގައި ކޭކު އެޅުމުގެ ރޮނގުން ބޮޑު މަޤްބޫލްކަމެއް ހޯދާފައިވާ އައިމިނަތު ނަޝީދާ އަބޫބަކުރު ނުވަތަ ދިވެހިންނަށް މަޤްބޫލް ނަމުން ނަމަ (ނަޝީ) އަކީ ކޭކު އެޅުމުގެ ދުނިޔޭގައި އުހުގައި ފިޔަ ޖަހަމުން އަންނަ ފަންނާނެކެވެ.

ނަޝީ ފެންނަނީ އަހަރަކަށް ވުރެ އަހަރެއް ކޭކު އެޅުމުގެ ދާއިރާ އިން ކުރިއަރަމުން، އޭނާގެ މަސައްކަތް ދުވަހަކަށް ވުރެ ދުވަހެއް ފުރިހަމަ ކުރަމުން އަންނަ ކުޅަދާނަ ފަންނާނެއް ގޮތުގައެވެ. ކަވި މަސައްކަތްތަކާއި، ކުޅަދާނަ އީޖާބީ އުކުޅުތަކާއި އެކު ކޭކު އުޅުމުގެ ދުނިޔޭގައި ރާއްޖޭގެ ނަން އުޖާލާ ކޮށްދިނުމުގައި ނަޝީ އަދާކޮށްފައި ވަނީ ކާމިޔާބު ދައުރެކެވެ.

މިހާތަނަށް އައި އިރު ރާއްޖެ އިން ބޭރުގެ ފާހަގަކޮށްލެވޭ އެތައް އެވޯޑް ތަކެއް ހޯދާ، ނަޝީ ވަނީ ރާއްޖޭގެ ކޭކު އެޅުމުގެ ސިނާއަތާއި މަސައްކަތްތެރިންނަށް ފަޚުރުވެރި ނަމޫނާ އެއް ދައްކާފައެވެ. މަސައްކަތް ކޮށްފި ނަމަ ދިވެހިންނަކީ ދުނިޔޭގެ ކުރީ ސަފުގައި ގުނާލެވޭނެ ފަދަ ކުޅަދާނަ ފަންނާނުން ތަކެއްކަން ނަޝީ އެ ދަނީ ކެނޑިނޭޅި ސާބިތު ކޮށްދެމުންނެވެ.

ފަހުގެ ތާރީހުގައި ނަޝީގެ ކާމިޔާބީތަކަށް ބަލާލާ ނަމަ ދުނިޔޭގެ ފެންވަރުގެ އެވޯޑެއް ކަމަށްވާ ޑިލީޝަސް މެގަޒިން އެވޯރޑްސްގެ ދެ ކެޓަގަރީގެ ފައިނަލިސްޓުންގެ ތެރޭގައި 2024 ވަނަ އަހަރު ނަޝީ ހިމެނުމަކީ ފާހަގަކޮށްލަން ޖެހޭ މުހިންމު ކާމިޔާބީއެކެެވެ.

މިދިޔަ އަހަރު ވެސް ނަޝީ ވަނީ ދެ ގެޓަގަރީ އަކުން ފައިނަލިސްޓަކަށް ހޮވިފައެވެ. އެއީ އެ މަޤާމަށް ވާދަކުރި 11400 މީހުންގެ ތެރެއިން އެންމެ ރަނގަޅު 5 އާޓިސްޓުންގެ ތެރޭގައި ހިމެނިގެންނެވެ. ނަޝީ ފައިނަލިސްޓަކަށް ހޮވުނު ދެ ދައިރާ އަކީ ކޭކް ޑިޒައިނަރ އޮފް ދަ އިއަރ އަދި މޮޑާން ކޭކް އާޓިސްޓް އިނޮވޭޓަރ އޮފް ދަ އިއަރއެވެ.

ނަޝީ ކޭކްސް ގެ ބާނީ ނަޝީ އަކީ ދިވެހިންގެ އިތުރުން ރާއްޖެ އިން ބޭރުގެ ފަރާތްތަކަށް ވެސް ކަމުދާނެ އެތައް ކޭކުތަކެއް ގެނެސްދިފައިވާ ލާމަސީލު އާޓިސްޓެކެވެ. ރީތި، ރަހަ މީރު ކޭކު ތައް އާއްމުންނާ ހަމައަށް ގެނެސްދީ، އެ މަސައްކަތުގެ އެންމެ ކުރީގައި ނަޝީ ދުނިޔޭގެ އެހެން އާޓިސްޓުންނާ ފައިހަމަ ކުރަމުން ދިއުމަކީ މުޅި ރާއްޖެ އަށް ލިބޭ ފަޚުރެކެވެ.

ނަޝީ ވަނީ ޑެލިޝަސް އެވޯޑްސް (ޑީއެމްއޭސް) 2025 ގައި އަނެއްކާ ވެސް އިތުރު ބައެއް ކެޓަގަރީތަކަށް ކުރިމަތިލާން ނިންމާފައެވެ. ޑީއެމްއޭސް 2025ގެ ނޮމިނޭޝަންތަކަށް މިހާރު ހުޅުވާލާފައިވާ އިރު ރާއްޖެ އަށް ކޭކު އެޅުމުގެ ދާއިރާ އިން އާ ރީތި ނަމެއް ހޯދާ ދިނުމަށް އަނެއްކާ ވެސް ނަޝީ މި ވަނީ ތައްޔާރުވެފައެވެ. މުޅި ދުނިޔެ އަށް ހުޅުވާލައިގެން ހުޅުވާލާ މި ނޮމިނޭޝަންތަކުން ހޮވާލެވެނީ މުޅި ދުނިޔޭގެ ފެންވަރުގައި ގުނާލެވޭ، ހުނަރުވެރި ފަންނާނުންނެވެ.

މިފަހަރު ނަޝީ ބައިވެރިވާ ކެޓަގަރީތަކަކީ "ވަން ޓު ވޮޗް ކެޓަގަރީ - 9"، "މޮޑާން ކޭކް އާޓިސްޓް އިނޮވޭޓަރ އޮފް ދަ އިއަރ ކެޓަގަރީ -13" އެވެ. ދުނިޔޭގެ އެންމެ ފާހަގަ ކޮށްލެވޭ ކޭކު އެޅުންތެރިން ވެސް ވާދަކުރާ މި އެވޯޑުގައި ނަޝީ ވާދަކުރާ އިރު އާއްމުންގެ ފަރާތުން ނަޝީ އެދެނީ އޭނާ އަށް އާއްމުން ދެމުންދާ ލޮތްބާއި ހިތްވަރު މި ފަހަރުވެސް ދައްކައި ދިނުމަށެވެ.

ޑިލީޝަސް މެގަޒިން ކަވަރގަވެސް މީގެ ކުރިން ނަޝީ ގެ ކޭކް ޓިއުޓޯރިއަލްގެ ފޮޓޯ ވަނީ ހިމަނާފައެވެ. ނަޝީ ވަނީ މިފަދަ ބައިނަލްއަޤުވާމީ އެވޯޑް ތައް މީގެ ކުރިން ވެސް ހާސިލު ކޮށްފައެވެ. ދާދި ފަހުން އޭޝިއާ ކޭކު އޮސްކާގެ، "މާސްޓަރ ކޭކު އާޓިސްޓް އޮފް ދަ އިއަރ" އެވޯޑް ވެސް ނަޝީ ހާސިލު ކޮށްފައި ވުމުން، މި ދާއިރާގައި މެދުކެނޑުމެއް ނެތި ނަޝީ ކޮށްފައިވާ ފުރިހަަމަ މަސައްކަތްތައް ވަރަށް ރަނގަޅަށް ހާމަވާން އެބަހުއްޓެވެ.