ހިރިލަންދޫގައި "ނަޝީ ބޭކަރީ" ހުޅުވައިފި
ބޭކަރީ ހުރިހާ އެއްޗެއް ނަޝީ ބޭކަރީން ލިބޭ
ނަޝީ ބޭކަރީ ހުޅުވުން
ތ. ހިރިލަންދޫގައި "ނަޝީ ކޭކްސް"ގެ ފަރާތުން "ނަޝީ ބޭކަރީ"ގެ ނަމުގައި ބޭކަރީއެއް ހުޅުވައިފިއެވެ.
މަޝްހޫރު ކޭކު އެޅުންތެރިޔާ އާމިނަތު ނަޝީދާ (ނަޝީ)ގެ އުފަން ރަށުގައި ބޭކަރީއެއް ހުޅުވާފައިވާއިރު މިކަމާއި ގުޅިގެން ރާއްޖެއެމްވީ އާއި ވާހަކަދައްކަމުން ނަޝީ ބުނީ މި ބޭކަރީންވެސް ބޭކަރީއަކުން ލިބޭނެ ހުރިހާ އެއްޗެއް ލިބެން ހުންނާނެ ކަމަށެވެ. ބޭކަރީ ތަކެތީގެ އިތުރުން ކޭކް ސްލައިސްވެސް ބޭކަރީން ލިބެން ހުންނާނެ ކަމަށެވެ. އަދި ކޭކް އޯޑަރުވެސް ނަގާނެ ކަމަށް ނަޝީ ބުނިއެވެ.
ނަޝީ ބުނީ ހިރިލަންދޫގައި ބޭކަރީއެއް ހުޅުވަން ނިންމީ ރަށުން ބޭކަރީގެ ބާވަތްތައް ލިބެން ނެތުމުން ގިނަ ބައެއްގެ އެދުމުގެ މަތިން ކަމަށެވެ. އަދި ބޭކަރީ ހުޅުވައި އެތަކެތި ފޯރުކޮށްދޭން ފެށުމާއެކު، ރައްޔިތުންގެ ފަރާތުން ވަރަށް ރަނގަޅު ކޮމެންޓްތައް ހުށަހަޅަމުން އަންނަކަން އޭނާ ވަނީ ފާހަގަކޮށްފައެވެ.
ނަޝީ ބުނީ ހިރިލަންދޫއިން ކައިރި ރަށްރަށަށް މިތަކެތި ސަޕްލައި ކުރުމުގެ މަސައްކަތްވެސް މިހާރު ފަށާފައިވާކަމަށެވެ. މިގޮތުން ތ. ވަންދޫއާއި ތ. ކަނޑޫދޫގެ ބައެއް ފިހާރަތަކަށް މިހާރުވެސް މިތަކެތި ސަޕްލައި ކުރަމުންދާކަމަށެވެ. އަދި އަމާޒަކީ ވީހާވެސް ގިނަ ރަށަކަށް ސަޕްލައި ކުރަން ފެށުން ކަމަށް އޭނާ ބުނިއެވެ.
ނަޝީ ބުނީ ހިރިލަންދޫގެ އިތުރުން އެހެން ރަށްރަށުގައި ބޭކަރީ ހުޅުވުމުގެ މަސައްކަތްވެސް މިހާރު ކުރަމުންދާކަމަށެވެ. އެގޮތުން މިހާރު މަސައްކަތްކުރަނީ ތަންކޮޅެއް އާބާދީ ބޮޑު ރަށެއްގައި ބޭކަރީއެއް ގާއިމްކުރުމަށް ކަމަށް ނަޝީ ބުނިއެވެ.
