ފާޑުކިޔުންތަކަށް ބެލުމެއް ނެތި، އެސްއީޒެޑް ޤާނޫނުގެ އިސްލާހުގެ މަސައްކަތް ކުރިއަށް: އަންގާރަ ދުވަހު އޮތީ މުޅި މަޖިލީހުގެ ކޮމިޓީ

ރައްޔިތުންގެ މަޖިލީހުގެ، މުޅި މަޖިލީހުގެ ކޮމިޓީގެ 2025 ވަނަ އަހަރުގެ ފުރަތަމަ ބައްދަލުވުން އަންގާރަ ދުވަހު ބޭއްވުމަށް ނިންމައިފި އެވެ.

އެ ބައްދަލުވުން ބޭއްވުމަށް ތާވަލްކޮށް މަޖިލީހުގެ މެމްބަރުންނަށް އެކަން ވަނީ މިހާރު އަންގާފަ އެވެ. އެ ބައްދަލުވުން ބޭއްވުމަށް ތާވަލްކޮށްފައި ވަނީ އަންގާރަ ދުވަހުގެ 11:00ގަ އެވެ. އެޖެންޑާގައި ހިމަނާފައިވާ މަސައްކަތަކީ ޤާނޫނު ނަންބަރު 24/2014 (ސްޕެޝަލް އިކޮނޮމިކް ޒޯނުގެ ޤާނޫނު) އަށް އިސްލާހު ގެނައުމުގެ ބިލުގެ މަސައްކަތެވެ.

ސަރުކާރުގެ ފަރާތުން، ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވާފައިވާ އެ އިސްލާހުގެ އިބްތިދާއީ ބަހުސް ކުރިއަށް ގެންގޮސްފައި ވަނީ މި ހިނގާ އޮކްޓޯބަރ މަހުގެ 21 ވަނަ ދުވަހު އެވެ. އަދި ބިލުގެ އިބްތިދާއީ ބަހުސް މަރުހަލާ ނިންމާ ބިލު މަޖިލީހަށް ބަލައިގަނެފައި ވަނީ 22 އޮކްޓޯބަރ ވީ ބުދަ ދުވަހު އެވެ.

ބިލު ހުށަހެޅުއްވި މެމްބަރު ޝުޖާއު ވިދާޅުވީ ބިލުގެ ޤައުމު އާރާސްތުކޮށް އިންވެސްޓަރުންނަށް ފަހި މާޙައުލެއް ހޯދާދިނުމެވެ. އެހެންނަމަވެސް ބިލުގައި ފޮރުވިފައިވާ އެހެން މަޤްސަދުތަކެއް ހުރިކަން މަޖިލީހުގެ ބައެއް މެމްބަރުން ވަނީ ބިލުގެ ބަހުސް މަރުހަލާގައި ފާހަގަކުރައްވާފަ އެވެ.

ސްޕެޝަލް އިކޮނޮމިކް ޒޯން (އެސްއީޒެޑް) ގެ ގޮތުގައި ސަރުކާރުން ކަނޑައަޅާ ސަރަހައްދުތައް ސަސްޓެއިނެބަލް ޓައުންޝިޕްގެ ގޮތުގައި ތަރައްގީ ކުރެވޭ ގޮތަށް ގާނޫނަށް އިސްލާހު ގެންނަނީ އޮޅުވާލައިގެން ވަކި ބަޔަކަށް ޓެކްސް އިން ބަރީއަ ވާން ފުރުސަތު ހޯދާދިނުމަށް ކަމަށް ވެސް އެ މެމްބަރުން ފާހަގަކުރެ އެވެ.

މި ސަރުކާރުން އެސްއީޒެޑް ޤާނޫނަށް އިސްލާހު ހުށަހެޅީ، 11 ރިސޯޓާއި 22 ފިނޮޅު ޓެކްސް އިން ބަރީއަކޮށްދިނުމަށް ކަމަށް ފާހަގަކޮށް އެކަމާއި މެދު މެމްބަރުންނާއި އިދިކޮޅު ފަރާތްތަކުގެ އިތުރުން ޓުއަރިޒަމް ދާއިރާގައި މަސައްކަތް ކުރާ ބައެއް މީހުން ވެސް ދަނީ ކަންބޮޑުވުން ފާޅުކުރަމުންނެވެ.

ނަމަވެސް މި އިން ކަންބޮޑުވުމަކަށް ސަރުކާރުން ވެސް އަދި ޕީއެންސީގެ ޕީޖި ގްރޫޕުން ވެސް އިޖާބަ ދޭ މަންޒަރެއް ނުފެނެ އެވެ. މި އިސްލާހަކީ ސަރުކާރުން ބޭނުންވާ ވަކި ބަޔަކަށް މަންފާ ހޯދައިދިނުމަށް ހުށަހަޅާފައިވާ އިސްލާހެއް ކަމަށް އިދިކޮޅު ފަރާތްތަކުން ދަނީ ތުހުމަތުކުރަމުންނެވެ.