މިއަދަކީ ސިފައިންގެ ލަޝްކަރު އަލުން ރުކުރުވާލަންވީ ދުވަސް: މިނިސްޓަރު ޣައްސާން
ދިވެހި އަސްކަރީއްޔާ އިން ހޯދާފައިވާ ކުރިއެރުންތަކާ މެދު ފަޚުރުވެރި ވާން ޖެހޭ ކަމަށް ޣައްސާނު ވިދާޅުވި
ނަސްރު ދުވަހުގެ ޖަލްސާ ގައި ޑިފެންސް މިނިސްޓަރު މުހައްމަދު ޣައްސާން ވާހަކަ ދައްކަވަނީ
މިއަދަކީ ސިފައިންގެ ލަޝްކަރު އަލުން ރުކުރުވާލަންވީ ދުވަސް ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވެއްޖެއެވެ.
ހޯމަ ދުވަހު ކުރިއަށް ގެންދިޔަ ނަސްރު ދުވަހުގެ ޖަލްސާ ގައި، ރައީސް ޑރ.މުހައްމަދު މުއިއްޒަށް ވަރަށް ބޮޑަށް ތައުރީފް ކުރައްވައި ވިދާޅުވީ ފާއިތުވެ ދެ އަހަރެއް ދުވަހު ދިވެހި އަސްކަރިއްޔާ ކުރިއެރުވުމަށް ގިނަ މަސައްކަތް ތަކެއް ކުރެވިފައިވާ ކަމަށާއި، ގިނަ ލަނޑުދަނޑިތަކެއް ހާސިލް ކުރެވިފައިވާ ކަމަށެވެ.
އެގޮތުން ވަތަނީ ޚިދުމަތުގެ ޕްރޮގްރާމް ފަށާފައިވާ ކަަމަށާއި، އެމްއެންޑީއެފް މެރީންކޯގެ ގާބިލީއްޔަތު އިތުރު ކުރުމުގެ މަސައްކަތާއި، ކޯސްޓް ގާޑުގެ ގާބިލިއްޔަތުކަން ދެގުނަ ކުރެވިފައިވާ ކަމަށް މިނިސްޓަރު ޣައްސާން ވިދާޅުވި އެވެ. މީގެ އިތުރުން ޝަހީދުވި އަބްޠާލުންގެ ހަނދާން ނައްތާނުލާ ގައުމަށް ކުޅަދާނަވީ މިންވަރަކުން، ޝަހީދުންގެ އާއިލާތަކަށް އިނާޔަތް ދިނުމުގެ މަސައްކަތް މިހާރު ފެށިފައިވާ ކަމަށް މިނިސްޓަރު ޣައްސާން ވިދާޅުވި އެވެ.
3 ނޮވެންބަރަށް އިޝާރާތް ކުރައްވައި މިނިސްޓަރު ޣައްސާން ވިދާޅުވީ މިއަދަކީ ލަޝްކަރު އަލުން ރުކުރުވާލަންވީ ދުވަސް ކަމަށާއި، ތިބޭފުޅުންގެ ފަހުރާއި ޝަރަފު އިސް އުފުލާ ދުނިޔެ އަށް ދައްކާލަންވީ ދުވަސް ކަމަށެވެ.
މިއަދަކީ މިދިޔަ އަހަރުގެ ނޮވެންބަރު މަހުގެ 3 އަކުން މިއަހަރުުގެ ނޮވެންބަރު މަހުގެ 3 އަކަށް ސިފައިންގެ އެންމެ މަތީވެރިޔާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަޅުގަނޑުމެންނަށް ހޯއްދަވައިދެއްވި ކުރިއެރުންތަކާ ފަހުރުވެރިވާ ހާލުގައި ލަޝްކަރު އަލުން ރުކުރުވާލަންވީ ދުވަސް. ތިބޭފުޅުންގެ ފަހުރާއި ޝަރަފު އިސް އުފުލާ ދުނިޔެއަށް ދައްކާލަންވީ ދުވަސް. ނަފްސަށް ވުރެ ގައުމު އިސްކުރަންވީ އަޒުމް އައު ކުރަންވީ ދުވަސް. މިފުރުސަތުގައި ވެސް ގައުމީ ދިފާއީ ބާރުގެ އަސްކަރީ ގާބިލިއްޔަތުގެ އިތުރު ކޮށްދެއްވަން ކެނޑިނޭޅި ރެއާ ދުވާލު ވަރަށް ގާތުން ބައްލަވާގެން ސިފައިންގެ އެންމެ މަތީވެރިޔާގެ ހައިސިއްޔަތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކޮށް ދެއްވަމުން ގެންދަވާ މަސައްކަތްޕުޅު ފާހަގަކޮށް އެންމެހައި ފަހުރުވެރި ސިފައިންގެ ނަންފުޅުގައި އިހްލާސްތެރި ކަމާއެކު ހިތުގެ ފުންމިނުން ޝުކުރު ދަންނަވަން.ޑިފެންސް މިނިސްޓަރު މުހައްމަދު ޣައްސާން މައުމޫން
މިނިސްޓަރު ޣައްސާން ވިދާޅުވީ ދިވެހި އަސްކަރީއްޔާ އިން ހޯދާފައިވާ ކުރިއެރުންތަކާ މެދު ފަޚުރުވެރި ވާން ޖެހޭ ކަމަށެވެ. އަދި މިދިޔަ 15 އަހަރު ދުވަހު ވަޠަނުގެ ދިފާއަށް ގޮވާލަމުން ދިޔަ ގޮވާލުމަށް އަޅާނުވެލި އޮތުމަށްފަހު މިއަދު ގައުމުގެ މިނިވަންކަން ދިފާއު ކުރެވޭ ފަދަ އަސްކަރިއްޔާ އަކަށް ދިވެހި އަސްކަރިއްޔާ ހެދުމުގެ މަސައްކަތް ފެށިފައިވާ ކަމަށް ވިދާޅުވި އެވެ.
މިނިސްޓަރު ޣައްސާން މިމެމޭރުން ވާހަކަ ދެއްކެވި ނަމަވެސް މިދިޔަ ސަރުކާރު ތަކުގައި އަސްކަރިއްޔާގެ ގާބިލިއްޔަތުގެ އިތުރު ކުރުމަށް ގިނަ މަސައްކަތް ތަކެއް ކޮށްފައިވެ އެވެ. އަސްކަރިއްޔާ އަށް ބޭނުންވާ ވަސީލަތްތައް ހޯދުމުގެ އިތުރުން ތަމްރީނުގެ ފުރުސަތުތައް ފަހިކޮށްދީ، ސިފައިންގެއަށް އިންސާނީ ވަސީލަތް އިތުރު ކުރުމަަށް ގިނަ މަސައްކަތްތައް ކޮށްފައިވެ އެވެ.
އޭގެ އިތުރުން ރާއްޖޭގެ އިގްތިސާދީ ހާލަތާ ނުބައްދަލު ބޮޑެތި ބޭކާރު ޚަރަދުތައް އަސްކަރިއްޔާ ކުރިއެރުވުމުގެ ނަމުގައި މުއިއްޒުގެ ސަރުކާރުން ކުރަމުން ގެންދާތީ އާންމުން ދަނީ އެކަމަށްވެސް ވަރަށް ބޮޑަށް ފާޑު ކިޔަމުންނެވެ.
