މިޝިގަންގައި ދޭން އުޅުނު ޓެރަރިސްޓް ހަމަލާއެއް ހުއްޓުވައިފި

އެމެރިކާގެ މިޝިގަންގައި ދޭން އުޅުނު ޓެރަރިސްޓު ހަމަލާއެއް ހުއްޓުވައިފި އެވެ.

މިކަން ހާމަ ކުރައްވާފައި ވަނީ އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި)ގެ ޑިރެކްޓަރު ކޭޝް ޕެޓެލް އެވެ. ހުކުރު ދުވަހު ޕެޓެލް ވިދާޅުވެފައި ވަނީ ހެލޯވީން ހަފްތާގައި ދޭން ރޭވި ޓެރަރިސްޓު ހަމަލާއެއް ހުއްޓުވާފައިވާ ކަމަށާއި، އެ ހަމަލާ ދިނުމަށް މަސައްކަތް ކުރި ކަމަށް ތުހުމަތު ކުރެވޭ ބަޔަކު ހައްޔަރު ވެސް ކޮށްފައިވާ ކަމަށެވެެ.

ހުކުރު ދުވަހުގެ ހެނދުނު އެފްބީއައި އިން އެ ހަމަލާ ހުއްޓުވަފާއިވާއިރު، ޕެޓެލް ވިދާޅުވެފައި ވަނީ އެކަމުގެ ތަފްސީލް ފަހުން ހާމަ ކުރައްވާނެ ކަމަށެވެ. މިޝިގަންގެ ޑިޓްރޮއިޓް ސިޓީގެ ހުޅަނގު ގައި އޮންނަ ޑިއަބޯން ސިޓީގެ ފުލުހުން ފޭސްބުކްގައި ކުރި ޕޯސްޓެއް ގައި ބުނީ، އެފްބީއައި އިން ހުކުރު ދުވަހުގެ ހެނދުނު ޑިއަބޯންގައި އޮޕަރޭޝަން ތަކެއް ހިންގި ކަމަށެވެ. އެ ސިޓީގެ ފުލުހުން ވަނީ އެ ސިޓީގެ ރައްޔިތުން ހަމަޖެހިގެން ތިބުމަށް ވެސް އެދިފަ އެވެ.

މި ހަމަލާއާ ގުޅޭ ގޮތުން މިހާތަނަށް އެފްބީއައި އިން އިތުރު ތަފްސީލެއް ހާމަ ކޮށްފައި ނުވެ އެވެ. ނަމަވެސް، ހެލޯވީން ފަދަ ބޮޑެތި ޙަރަކާތްތައް ބާއްވާ ދުވަސް ތަކަކީ ޓެރަރިސްޓު ހަމަލާ ތަކަށް ޚާއްސަ ސަމާލު ކަމެއް ދޭން ޖެހޭ ދުވަސް ތަކެއް ކަމަށް ސަލާމަތީ އިސްވެރިން ވަނީ ފާހަގަ ކޮށްފަ އެވެ.

ސަލާމަތީ ތަޖުރިބާ ކާރުން ފާހަގަ ކޮށްފައިވާ ގޮތުގައި، އެ ހަމަލާ ހުއްޓުވުމަށް އެފްބީއައި އިން ކޮށްފައިވާ މަސައްކަތަކީ، އެމެރިކާގެ ސަލާމަތާއި ރައްކާތެރިކަން ދެމެހެއްޓުމަށް އެ އިދާރާ އިން ކުރަމުން އަންނަ މުހިންމު މަސައްކަތް ތަކުގެ ތެރެއިން މަސައްކަތެއް ކަމަށެވެ.

މި މައްސަލައިގައި ހައްޔަރު ކުރި މީހުންގެ އަދަދާއި، އެ މީހުންގެ ތަފްސީލާއި، ހަމަލާގެ ލަނޑުދަނޑި އާއި އެ ބާވަތުގެ މައުލޫމާތު އެފްބީއައި އިން ކުރިއަށް އޮތް ދުވަސް ތަކުގެ ތެރޭގައި ހާމަ ކުރާނެ ކަމަށް ރިޕޯޓު ކޮށްފައިވެ އެވެ.