އަންހެން ރައީސަކު އެމެރިކާ އަށް އަންނާނެ ކަމަށް ވިދާޅުވެ، އިންތިޚާބުގައި އަލުން ވާދަކޮށްފާނެ ކަމުގެ އިޝާރާތެއް ކަމަލާ ދެއްވައިފި

މީގެ ހަތަރު އަހަރު ފަހުން، 2028 ވަނަ އަހަރު އޮންނަ އެމެރިކާގެ ރިޔާސީ އިންތިޚާބުގައި އަލުން ވާދަކޮށްފާނެ ކަމުގެ އިޝާރާތެއް، އެމެރިކާގެ ކުރީގެ ނައިބު ރައީސް ކަމަލާ ހެރިސް ދެއްވައިފި އެވެ.

އެމެރިކާގެ ކުރީގެ ރައީސް ޖޯ ބައިޑަންގެ ވެރި ކަމުގައި ނައިބު ރައީސްގެ މަގާމުގައި ހުންނެވި ކަމަލާ ވަނީ، އެންމެ ފަހުން 2024 ވަނަ އަހަރު އޮތް އެމެރިކާގެ ރިޔާސީ އިންތިޚާބުގައި ވެސް ވާދަ ކުރައްވައިފަ އެވެ. އެމެރިކާގެ ރިޔާސީ ރޭހުން ވަކިވުމަށް ބައިޑަން ނިންމެވުމާ އެކު، ޑިމޮކްރަޓިކް ޕާޓީގެ ރިޔާސީ ޓިކެޓު ލިބިލެއްވީ ކަމަލާ އަށެވެ.

އިންތިޚާބު ގައި ކަމަލާ ވާދަ ކުރެއްވި ނަމަވެސް، މިހާރުގެ ރައީސް ޑޮނަލްޑް ޓްރަމްޕް އާ ވާދަ ކުރައްވައި ވަނީ ނާކާމިޔާބުވެފަ އެވެ. ނަމަވެސް، ސިޔާސީ މަޝްރަހު ދިރާސާ ކުރާ ފަރާތްތަކުން ބުނަމުން އަންނަނީ، ދެން އޮންނަ ރިޔާސީ އިންތިޚާބެއް ގައި ވެސް ކަމަލާ ވާދަ ކުރައްވާނެ ކަމަށެވެ. ނަމަވެސް، އެކަމާ ގުޅޭ ގޮތުން ކަމަލާ ސީދާ ޖަވާބެއް މިހާތަނަށް ދެއްވާފައި ނުވެ އެވެ.

"ސަންޑޭ ވިތު ލައުރާ ކުއެންސްބާގް" ޕްރޮގްރާމް ގައި ވާހަކަ ދައްކަވަމުން ކަމަލާ ވިދާޅުވެފައި ވަނީ އެމެރިކާގެ ރައީސް އަކަށް ނުވަތަ ރިޔާސީ ގަނޑުވަރު ވައިޓް ހައުސް އަށް އަންހެން ރައީސް އަކު އަންނާނެ ކަމާ މެދު އެއްވެސް ޝައްކެއް ނެތް ކަމަށެވެ. ކަމަލާ އަކީ އެމެރިކާގެ ތާރީޚުގައި ފުރަތަމަ އަންހެން ނައިބު ރައީސް ކަމަށް ވާއިރު، ދެން އޮންނަ އިންތިޚާބެއްގައި ވާދަކޮށްފާނެތޯ އޭނާއާ ވަނީ ސުވާލު ކޮށްފަ އެވެ.

އެ ސުވާލަށް ޖަވާބު ދެއްވަމުން ކަމަލާ ވިދާޅުވެފައި ވަނީ، އޭނާ ކުރަމުން އަންނަ މަސައްކަތް އަދި ނުނިމޭ ކަމަށެވެ. އެގޮތުން ދެން އޮންނަ އިންތިޚާބެއްގައި އޭނާ ވާދަ ކުރައްވަފާނެ ކަމުގެ އިޝާރާތެއް ކަމަލާ ވަނީ ދެއްވައިފަ އެވެ. މިއީ އަލުން ރިޔާސީ އިންތިޚާބުގައި ވާދަ ކުރުމާ ގުޅޭ ގޮތުން މިފަދަ އިޝާރާތެއް ކަމަލާ ދެއްވި ފުރަތަމަ ފަހަރެވެ. ބައެއް ފަރާތްތަކުން ބުނެފައި ވަނީ ޑިމޮކްރަޓިކް ޕާޓީގެ ޓިކެޓު ކަމަލާ އަށް ލިބުމުގެ ފުރުސަތު ކުޑަ ކަމަށެވެ. ނަމަވެސް ކަމަލާ ވަނީ އެއީ ޤަބޫލު ކުރެވޭ ވާހަކަ ތަކެއް ނޫން ކަމަށް ވިދާޅުވެފަ އެވެ.

މީގެ އިތުރުން އެ ޕްރޮގްރާމްގައި ވާހަކަ ދައްކަވަމުން ކަމަލާ ވަނީ އެމެރިކާގެ މިހާރުގެ ރައީސް ޓްރަމްޕް އަށް ވަރަށް ބޮޑަށް ފާޑު ވިދާޅުވެފަ އެވެ. އިންތިޚާބުގައި ޓްރަމްޕް އަތުން ކަމަލާ ބަލިވެފައިވާއިރު، މީގެ ކުރިން ކަމަލާ ވިދާޅުވެފައި ވަނީ އިންތިޚާބުން ބަލިވުމުގެ މައިގަނޑު ސަބަބަކީ އެކަށީގެންވާ ވަގުތު ނެތުން ކަމަށެވެ. ޓްރަމްޕްގެ ސިޔާސަތުތަކާއި، ނިންމުންްތައް އަދި ވެރިކަަމަށް ފާޑު ވިދާޅުވަމުން ކަމަލާ ވިދާޅުވެފައި ވަނީ، ޓްރަމްޕް އަކީ ޖައްބާރެއް ކަމަށެވެ.

ކަމަލާ ވިދާޅުވެފައި ވަނީ އޭނާގެ މުޅި ކެރިއަރަކީ ޚިދުމަތް ކުރުމުގައި ހޭދަކޮށްފައިވާ ކެރިއަރެއް ކަމަށެވެ. އެގޮތުން އަބަދު ވެސް ރައްޔިތުންނަށް ބޭނުންވަ ކަންކަމާއި، ރައްޔިތުންގެ ހައްގުގައި މަސައްކަތް ކުރުމުގައި ދެމި ހުރެފައިވާ ކަމަށް ކަމަލާ ވިދާޅުވި އެވެ. އެގޮތަށް މަސައްކަތް ކުރުމަކީ އޭނާގެ ލޭގައި ހުރި ކަމެއް ކަމަށާއި، އެހެންކަމުން އަދި އޭނާގެ ކެރިއަރު ނިމުމަކަށް އައީ ކަމަށް ޤަބޫލު ނުކުރާ ކަމަށް ވެސް ކަމަލާ ވިދާޅުވެފައިވެ އެވެ.

ރިޔާސީ އިންތިޚާބުގައި ކަމަލާ އަށް ކުރިމަތިވި ނާކާމިޔާާބާ އެކު ވެސް، އޭނާ އަންނަނީ ސިޔާސީ މަސައްކަތުގައި ހަރަކާތްތެރި ވަމުންނެވެ. އިންތިޚާބުގެ ތަޖުރިބާ ތަކުގެ މައްޗަށް ބިނާކޮށް ކަމަލާ ވަނީ، "107 ދުވަސް" ނަމުގައި ފޮތެއް ވެސް ޝާއިއު ކޮށްފަ އެވެ. އެ ފޮތުގައި ކަމަލާ ވަނީ އިންތިޚާބުގެ ދުވަސްވަރު ކަންތައް ހިނގާފައިވާ ގޮތްތަކާއި، ކެމްޕެއިިންގެ ކަންކަމުގެ ވާހަކަތައް ހިމަނައިފަ އެވެ. މިހާރު ކަމަލާ ގެންދަވަނީ އެ ފޮތް ޕްރޮމޯޓު ކުރުމުގެ މަސައްކަތް ކުރައްވަމުންނެވެ.

އެމެރިކާގެ ސިޔާސީ މަޝްރަހު ދިރާސާ ކުރާ ފަރާތްތަކުން ބުނެފައި ވަނީ، ކަމަލާގެ އަމާޒަކީ 2028 ވަނަ އަހަރުގެ ރިޔާސީ އިންތިޚާބުގައި އަނެއްކާ ވެސް ވާދަ ކުރެއްވުމެވެ. އެގޮތުން ޑިމޮކްރަޓިކް ޕާޓީގެ ޓިކެޓު ހޯއްދެވުމުގެ ޝައުޤުވެރިކަމާ އެކު ކަމަލާ މަސައްކަތް ކުރައްވަމުން އަންނަ ކަމަށް ވަނީ ފާހަގަ ކޮށްފަ އެވެ. އެހެން ނަމަވެސް، ކުރީގެ އިންތިޚާބުގައި ފާހަގަ ކުރެވުނު މައްސަލަތަކާއި، ރަނގަޅު ކުރަން ހުރި ކަންކަމަށް ކަމަލާ ވަރަށް ބޮޑަށް ވިސްނަަން ޖެހޭނެ ކަމަށް ވެސް މާހިރުން ވަނީ ފާހަގަކޮށްފަ އެވެ.