ޔޫއެސް އޯޕަން ޓެނިސް ޗެމްޕިއަންޝިޕްގެ ސެމީފައިނަލްއިން އެމެރިކާގެ ވީނަސް ވިލިއަމްސް ޖާގަ ހޯދައިފިއެވެ.

ޔޫއެސް އޯޕަން ދެފަހަރު ކާމިޔާބު ކޮށްފައިވާ ވީނަސް ވިލިއަމްސް މިއަހަރުގެ މުބާރާތުގެ ސެމީ ފައިނަލަށް ދަތުރުކުރީ 13 ވަނައަށް ސީޑު ކުރެވިފައިވާ ޗެކް ރިޕަބްލިކްގެ ޕެޓްރާ ކިވިޓޯވާ ދެ ސެޓު އެއް ސެޓުން ބަލިކޮށްގެންނެވެ. ވީނަސް ފުރަތަމަ ސެޓު 6-3 ގެންދިޔަ ނަމަވެސް ކިވިޓޯވާ ވަނީ ދެވަނަ ސެޓު 6-3 ގެންގޮސް މި މެޗު ތިންވަނަ ސެޓަކަށް ގެންގޮސްފައެވެ. އެގޮތުން ނަތީޖާ ނެރުމަށް ކުޅުނު ތިންވަނަ ސެޓު ވާދަވެރި ކުޅުމަކަށް ފަހު ވީނަސް ކާމިޔާބުކުރީ 7-6 އަކުންނެވެ.

މެޗު ކާމިޔާބު ކުރުމަށްފަހު ވާހަކަ ދައްކަމުން ވީނަސް ބުނެފައިވަނީ ވަރުގަދަ ކުޅުންތެރިޔެއް ބަލިކުރުމަށްފަހު ސެމީއަށް ދަތުރު ކުރެވުމަކީ ލިބޭ ހިތްހަމަ ޖެހުމެއް ކަމަށާ ޔޫއެސް އޯޕަންގެ ސެމީ ފައިނަލްގައި ހުސް އެމެރިކާއަށް ނިސްބަތްވާ ކުޅުންތެރިން ފެނުމަކީ ވަރަށް ބޮޑު އުއްމީދެއް ކަމަށެވެ. ވީނަސްވަނީ މި މޮޅާއެކު ތިންވަނަ ގްރޭންޑް ސްލޭމެއްގެ ފައިނަލްގައި ވާދަކުރުމުގެ އުއްމީދު ދަމަހައްޓާފައެވެ.

ސެމީ ފައިނަލްގައި ވީނަސް ވިލިއަމްސް ވާދަކުރަން ޖެހޭނީ އެމެރިކާގެ ޒުވާން ޓެނިސް ކުޅުންތެރިޔާ ސްލޮއާން ސްޓެފެންސްއާއެވެ. ސްޓެފެންސް ސެމީގެ ޖާގައެއް ކަށަވަރު ކުރީ މުބާރާތުގެ 16 ވަނައަށް ސީޑު ކުރެވިފައިވާ ލެޓްވިއާގެ އަނަސްޓޭޝިއާ ސެވަސްޓޯވާ ދެ ސެޓު އެއް ސެޓުން ބަލިކޮށްގެންނެވެ. ފުރަތަމަ ސެޓު ސްޓެފަންސް ގެންގޮސްފައިވަނީ 6-3 އަކުންނެވެ. އެހެން ނަމަވެސް ސެވަސަޓޯވާ ވަނީ ދެވަނަ ސެޓު 6-3 އަކުން ކާމިޔާބުކޮށް ތިން ވަނަ ސެޓަކަށް މެޗު ގެންގޮސްފައެވެ. ސެމީފައިނަލްގެ ޖާގަ ކަށަވަރުކުރުމަށް ކުޅުނު ތިންވަނަ ސެޓު ފޯރިގަދަ ކުޅުމަކަށްފަހު 7-6 އަކުން ކާމިޔާބުކުރީ ސްޓެފަންސްއެވެ.

މި ދެ ކުޅުންތެރިން ވާދަކުރާ ސެމީފައިނަލްގެ މެޗު ކުޅެވޭނީ ހުކުރު ދުވަހުއެވެ.