އަހަރު ނިމެން ދެ މަސް ދުވަސް، ތަރައްގީގެ މަޝްރޫއުތަކަށް ޚަރަދުކުރީ ބަޖެޓުގެ އެންމެ 13 ޕަސެންޓް
ފިނޭންސް މިނިސްޓްރީން އާންމުކުރާ ވީކްލީ ފިސްކަލް ޑިވެލޮޕްމަންޓް ރިޕޯޓަކީ ސަރުކާރާ އިދިކޮޅު ފަރާތްތަކުން އާއްމު ކުރާ އެއްޗެއް ނޫނެވެ. އެ ރިޕޯޓަކީ ފިނޭންސް މިނިސްޓްރީން އާއްމު ކުރާ ރިޕޯޓެކެވެ. އެ ރިޕޯޓުގައިވާ ގޮތުން މިދިޔަ އަހަރެކޭ އެއްގޮތަށް މި އަހަރު ވެސް ތަރައްގީ ގެ މަޝްރޫއުތައް ހިންގާފައެއްނުވެ އެވެ. އަދި މި ދިޔަ އަހަރަށް ވުރެ މި އަހަރު ތަރައްގީ ގެ މަޝްރޫއުތައް ހިންގުން ވަރަށް ބޮޑު ތަނުން ދަށް ވެފައިވާ ކަން 22 އޮކްޓޫބަރު 2025 ގައި އާއްމު ކުރި ރިޕޯޓުން ވަނީ ދައްކާފަ އެވެ.
ރައީސް ޑރ. މުހައްމަދު މުއިއްޒު
ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވުމަށް ގިނަ ވައުދުތަކެއް ވެވަޑައިގެންނެވިއެވެ. ވައުދުނާމާގެ ނަމުގައި ވައުދުތައް ހިމެނޭ ފޮތެއް ވެސް އެމަނިކުފާނު ނެރުއްވިއެވެ. ނަމަވެސް ސަރުކާރަށް ދެ އަހަރުވާން ކައިރިވަމުންދާއިރު، ގިނަ މަޝްރޫއުތައް ހިންގާފައިނުވެ އެވެ. އަދި ކުރީ ސަރުކާރުގައި ފަށާފައިވާ ހުރިހާ މަޝްރޫއެއް އޮތީ ހުއްޓުވާފަ އެވެ.
ނަމަވެސް ރައީސް މުއިއްޒު ރައްޔިތުންނާ ބައްދަލު ކުރައްވާ ކޮންމެ ފަހަރަކު ބައެއް ވައުދުތައް ތަކުރާރު ކުރައްވަ އެވެ. އަދި އިތުރު ވައުދުތައް ވެވަޑައިގަންނަވަ އެވެ. ދޭތެރެ ދޭތެރެއިން އެމަނިކުފާނު އަތޮޅު ތެރޭގެ ރަށްތަކަށް ކުރައްވާ ދަތުރުފުޅުގައި ވައުދުތައް ވެވަޑައިގަތުން ނޫން ކަމެއް ނެތެވެ. ރައްޔިތުންނަށް އެތައް އުންމީދެއް ގެނެސްދެއްވަ އެވެ. އަދި ރައީސް މުއިއްޒުގެ މި ވާހަކަފުޅު ތަކަށް ބައެއް މީހުން ހެއްލި، އެމަނިކުފާނުގެ އަރިސް ބޭފުޅުން ވަރަށް ބާރަށް އަތް ވެސް ޖައްސަވަ އެވެ.
މީގެ އިތުރުން މެއި މަހުގެ 3 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވެފައި ވަނީ ސަރުކާރުން ރައްޔިތުންނަށް ވެފައިވާ ވައުދުތައް ފުއްދުމަށް 2025 އަދި 2026 ވަނަ އަހަރު ޖުމްލަ 2130 މަޝްރޫއެއް ކުރިއަށް ގެންދިއުމަށް ނިންމާފައިވާ ކަމަށެވެ. އަދި މަރޗު މަހު ގެނެސްދިން ސުވާލާއި ޖަވާބު ޕޮޑްކާސްޓް ޝޯގައި ޕްރެޒެންޓަރު އަހުމަދު ޝަކީބު ކުރެއްވި ސުވާލުތަކުގެ ޖަވާބުގައި ރައީސް މުއިއްޒު ވިދާޅުވީ މިހާތަނަށް ސޮއިކުރި މަޝްރޫއުތަކުގެ ތެރޭގައި ކުރިން ހުއްޓިފައިވާ މަޝްރޫއުތަކާއި އަލަށް ފަށާ މަޝްރޫއުތައް ހިމެނޭ ކަމަށާއި، ރާއްޖޭގެ ތަރައްގީ އަށް ބޭނުންވާ 550 އަށް ވުރެ ގިނަ މަޝްރޫއުތަކެއް ހިންގަން މި ފަހުން ސޮއިކޮށްފައިވާ ކަމަށެވެ.
ރައީސް މުއިއްޒު ވިދާޅުވި ގޮތުގައި، މި އަހަރާއި އަންނަ އަހަރު ގިނަ މަޝްރޫއުތަކެއް ނިމުމަކާ ހަމައަށް ދާނެ އެވެ.
ކަން މިހެން އޮތް ނަމަވެސް ދެރައީ ގިނަ މަޝްރޫއުތަކުގެ އަމަލީ މަސައްކަތް ފެށިފައިނުވާތީ އެވެ. އަދި އަމަލީ މަސައްކަތް ފަށާފައިވާ މަދު މަޝްރޫއުތަކުގެ މަސައްކަތް ކުރިއަށް ގެންދިޔަ ނަމަވެސް މާގިނަ ދުވަހެއް ނުވެ، މަޝްރޫއުތަކަށް ގެންގޮސްފައިވާ ސާމާނުތަކާއި، ހައިމާކުތައް ވެސް އެހެން ދިމަދިމާލަށް ފުރައިގެންދެ އެވެ.
އެއާއެކު ގިނަ ރައްޔިތުންގެ ފާޑު ކިޔުން ސަރުކާރަށް އަމާޒުވި ނަމަވެސް މިއީ ހަގީގަތް ނޫން ކަމާއި، މިއީ ސަރުކާރާ އިދިކޮޅު ފަރާތްތަކުން ދައްކާ ވާހަކަތަކެއް ކަމަށާއި، ގިނަ މަޝްރޫއުތައް ކުރިއަށް ގެންދިއުމަށް އެއްބަސްވުންތަކުގައި ސޮއި ކުރައްވާފައިވާކަން ފާހަގަކޮށް ދަނީ އެކަން ޕްރޮމޯޓް ކުރަމުންނެވެ.
ނަމަވެސް ފިނޭންސް މިނިސްޓްރީން މި ހިނގާ އޮކްޓޯބަރު މަހުގެ 16 ވަނަ ދުވަހާ ހަމަ އަށް ހިސާބުތައް އޮތް ގޮތް ހާމަވާ ގޮތައް އާންމުކުރާ ވީކްލީ ފިސްކަލް ޑިވެލޮޕްމަންޓް ރިޕޯޓަކީ ސަރުކާރާ އިދިކޮޅު ފަރާތްތަކުން އާއްމު ކުރާ އެއްޗެއް ނޫނެވެ. އެ ރިޕޯޓަކީ ފިނޭންސް މިނިސްޓްރީން އާއްމު ކުރާ ރިޕޯޓެކެވެ. އެ ރިޕޯޓުގައިވާ ގޮތުން މިދިޔަ އަހަރެކޭ އެއްގޮތަށް މި އަހަރު ވެސް ތަރައްގީ ގެ މަޝްރޫއުތައް ހިންގާފަނުވެ އެވެ. އަދި މި ދިޔަ އަހަރަށް ވުރެ މި އަހަރު ތަރައްގީ ގެ މަޝްރޫއުތައް ހިންގުން ވަރަށް ބޮޑު ތަނުން ދަށް ވެފައިވާ ކަން 22 އޮކްޓޫބަރު 2025 ގައި އާއްމު ކުރި ރިޕޯޓުން ވަނީ ދައްކާފަ އެވެ.
އެގޮތުން އޮކްޓޯބަރު 16 ގެ ނިޔަލަށް ސަރުކާރުގެ ޖުމްލަ ޚަރަދުގެ ގޮތުގައި 30,481.3 މިލިއަން ރުފިޔާ ޚަރަދުކޮށްފައިވާއިރު، މީގެ ތެރެއިން ކެޕިޓަލް ޚަރަދުގެ ގޮތުގައި ހޭދަކޮށްފައިވަނީ އެންމެ 4,016.1 މިލިއަން ރުފިޔާއެވެ. މިއީ މިއަހަރަށް ފާސްކުރި ބަޖެޓުގައި ކެޕިޓަލް ޚަރަދުގެ ގޮތުގައި ކަނޑައެޅި 12,556.8 މިލިއަން ރުފިޔާގެ 32 އިންސައްތައެވެ.
ތަރައްގީގެ މަޝްރޫއުތަކުގެ ތެރެއިން އިންފްރާސްޓްރަކްޗަރ އެސެޓްތަކަށް ކަނޑައެޅުނު 7,112.8 މިލިއަން ރުފިޔާގެ ތެރެއިން މިހާތަނަށް ޚަރަދުކުރެވިފައި ވަނީ 2,344.8 މިލިއަން ރުފިޔާއެވެ. އަދި ބިންތަކާއި އިމާރާތްތަކަށް ކަނޑައެޅުނު 4,198.6 މިލިއަން ރުފިޔާގެ ތެރެއިން ޚަރަދުކުރެވިފައިވަނީ 1,152.8 މިލިއަން ރުފިޔާއެވެ.
ކެޕިޓަލް އިކުއިޕްމަންޓްތަކަށް ކަނޑައެޅުނު 711.6 މިލިއަން ރުފިޔާގެ ތެރެއިން 504.4 މިލިއަން ރުފިޔާ ޚަރަދުކުރެވިފައިވާއިރު، ތަރައްގީގެ މަޝްރޫއުތަކާއި ކެޕިޓަލް ޓްރާންސްފަރތަކަށް ކަނޑައެޅުނު 283.3 މިލިއަން ރުފިޔާގެ ތެރެއިން ޚަރަދުކުރެވިފައިވަނީ އެންމެ 14.1 މިލިއަން ރުފިޔާއެވެ.
އެހެންކަމުން ތަރައްގީގެ މަޝްރޫއުތައް ކުރިއަށް ނުގެންދާކަން ނުވަތަ ބާރު މިން މި ވަނީ ޚުދު ސަރުކާރުން ހާމަ ކުރާ ހިސާބުތަކުން ފެންނާށެވެ. މި މަޝްރޫއުތައް ހުއްޓުވާލުމަށްފަހު، ބަޖެޓު ސަރޕްލަސް ވެފައިވާ ކަމަށް ސަރުކާރުން ދަނީ ބުނަމުންނެވެ. ނަމަވެސް އެކަމާ އުފާވާނެ ރައްޔިތެއް މިއަދު ނެތެވެ. ރައްޔިތުންގެ ޓެކްސްގެ ގޮތުގައި އަދި އެހެނިހެން ފައިސާތައް ދައްކަނީ ތަރައްގީ އަށެވެ. ޚިދުމަތް ތަކަށެވެ. ފަސޭހަ ޖީބަށް ލުއި ދިރިއުޅުމަކަށެވެ. ތަކުލީފު އުފުލާކަށް ނޫނެވެ. ނަމަވެސް މި ސަރުކާރުގައި ރައްޔިތުންނަށް ލިބެންޖެހޭ ބެއަރ މިނިމަމް ވެސް ނުލިބި ރައްޔިތު މީހާގެ ޖީބަށް ވަނީ ވަރަށް ބޮޑަށް ބުރަ ވެފަ އެވެ.
