ޔަހްޔާ ސިންވާރުގެ ހަށިގަނޑު އަނބުރާ ރައްދު ނުކޮށް އަންދާލުމަށް އިސްރާއީލުން ވިސްނަނީ

އިސްރާއީލުން ދިން ހަމަލާ އެއްގައި ޝަހީދުވި ހަމާސް ގެ ލީޑަރު ޔަހްޔާ ސިންވާރުގެ ހަށިގަނޑު އަނބުރާ ހަވާލު ކުރުމުގެ ބަދަލުގައި އަންދާލުމަށް ވިސްނަމުންދާ ކަމަށް އިސްރާއީލުގެ ޓްރާންސްޕޯޓް މިނިސްޓަރު ހާމަ ކޮށްފިއެވެ.

އިސްރާއީލުގެ މިނިސްޓަރު ހާމަ ކުރި ގޮތުގައި އޭނާ ހުށަހަޅާފައި ވަނީ ޙަމާސްގެ ލީޑަރު ޔަޙްޔާ ސިންވާރުގެ ހަށިގަނޑު ހަމާސް ޖަމާއަތާ އަނބުރާ ރައްދު ކުރުމުގެ ބަދަލުގައި އަންދާލުމަށް ކަމަށެވެ.

އިސްރާއީލުގެ ޓްރާންސްޕޯޓް މިނިސްޓަރު މީރީ ރެގެވް ހޯމަ ދުވަހު ހާމަކޮށްފައި ވަނީ އޭނާ މި ހުށަހެޅުން ހުށަހެޅީ އިސްރާއީލުގެ ސެކިއުރިޓީ ކެބިނެޓުގެ ބައްދަލުވުމެއްގައި ކަމަށެވެ. އޭނާގެ ވިސްނުމަކީ އެމެރިކާ އިން އުސާމާ ބިން ލާދިން އާ މެދު ކަންތައް ކުރި ގޮތައް ސިންވާރު އާ މެދުވެސް ކަންތައް ކުރަން ކަމަށް ބުނެފައިވެއެވެ.

މިއީ އަލް-ޤާޢިދާގެ ބާނީ އަށް އިޝާރާތްކޮށް ދެއްކި ވާހަކައެކެވެ. ބިން ލާދިން މަރުވި ހާދިސާ ގައި އޭނާ އަށް ހަމަލާ ދިނީ 2011 ގައި އެމެރިކާގެ ޚާއްޞަ ބާރުތަކުންނެވެ. އަދި އޭނާގެ ހަށިގަނޑު ވަނީ ކަށުކަމާކެމީގެ ކަންކަން ފުރިހަމަ ކުރުމަށް ފަހު އުތުރު އަރަބި ކަނޑުގެ ސަރަހައްދަކަށް ފައްތާފައެވެ. އޭގެ މަގްސަދެއް ކަމުގައި ބެލެވެފައި އޮތީ އެއްގަމުގައި ވަޅުލުމުގެ ސަބަބުން އޭނާގެ މަހާނަ ޒިޔާރަތަކަށް ހެދުމުގެ ފުރުސަތު ނުދިނުން ކަމަށް ވެއެވެ.

ރިޕޯޓުތަކުގައިވާ ގޮތުން، ރެގެވްގެ މި ހުށަހެޅުން އިސްރާއީލުގެ ސެކިއުރިޓީ އޮފިޝަލުން ގެންދަނީ ދިރާސާ ކުރަމުންނެވެ.

އިސްރާއީލުން ވަނީ ކުރިން ވެސް ސިންވާރުގެ ހަށިގަނޑު ދޫކުރަން އިންކާރުކޮށްފައެވެ. އަދި އެ ހަށިގަނޑު ވަނީ ސިއްރު ތަނަކަށް ގެންދެވިފައެވެ.

އޮކްޓޯބަރު 9 ގައި، އެމެރިކާގެ ރައީސް ޑޮނަލްޑް ޓްރަމްޕް އިޢުލާނުކުރެއްވި ގޮތުގައި އިސްރާއީލާއި ޙަމާސްއިން ވަނީ އޭނާގެ ހަނގުރާމަ ހުއްޓާލުމުގެ ޕްލޭންގެ ފުރަތަމަ މަރުޙަލާ އަށް އެއްބަސްވެފައެވެ. މިއީ ޣައްޒާގައި ހަނގުރާމަ ހުއްޓުމަކަށް ގެނެސް، ގިނަ އަސީރުން ދޫކޮށްލުމަށް މަގުފަހިކުރާނެ އެއްބަސްވުމެކެވެ. އިސްރާއީލުގެ އޮފިޝަލަކު ސީއެންއެން އަށް ބުނެފައި ވަނީ "ސިންވާރު ދެބެން ގެ ހަށިގަނޑުތައް ހަވާލު ކުރުން މިހާރުގެ އެއްބަސްވުމުގައި ނުހިމެނޭނެ" ކަމަށެވެ.

އޮކްޓޯބަރު 18، 2024 ގައި، ޙަމާސް އިން ވަނީ އެ ޖަމާޢަތުގެ އައިކޮނިކް ލީޑަރު ޔަޙްޔާ ސިންވާރު ދެކުނު ޣައްޒާގެ ރަފާޙު ސިޓީގައި ޝަހީދުކޮށްލެވުނު ކަން އިއުލާނު ކޮށްފައެވެ.

އަސްކަރީ ހެދުމުގައި އޭކޭ-47 ބަޑިއެއް ހިފައިގެން ހުރި ސިންވާރު ފެނުނީ އިމާރާތެއްގެ ތެރެއިން، އިސްރާއީލުގެ ބާރުތަކާ ދެކޮޅަށް ކުރީ ސަފުގައި ހަނގުރާމަ ކުރުމަށްފަހު ޝަހީދުވެފައި އޮއްވައެވެ.

އޭނާ ވަނީ ދިގު މުއްދަތަކަށް އިސްރާއީލު ރެޖީމުގެ "މަރާލަންޖެހޭ މީހުންގެ ލިސްޓު" ގައި ހިމެނިފައެވެ. އަދި އިސްރާއީލުން އޭނާ އަށް އަމާޒު ކޮށް ދިން އެތައް ހަމަލާ އަކުން ސަލާމަތްވެފައިވެއެވެ.

އިސްރާއީލުގެ ޑްރޯނަކުން ރެކޯޑުކޮށްފައިވާ ފުޓޭޖުން އޭނާ ޝަހީދުވި ވަގުތުގެ ވީޑިއޯ އިން ހާމަވީ އޭނާ އުޅެމުން ގެންދިޔައީ ބިމުއަޑީގެ ޓަނަލްތަކުގައި ފޮރުވިގެން ކަމަށް ބުނެ އިސްރާއީލުން ކުރިން ފަތުރަމުން ގެންދިޔައީ ދޮގު ވާހަކަތަކެއް ކަމެވެ.