ރާއްޖޭގެ ތިން ބާރު ކޮންޓްރޯލް ކުރަނީ ސަރުކާރުން،އިންސާނީ ހައްގުތައް ބޮޑެތި ގޮންޖެހުންތަކެއް އެބަހުރި : ޝަހިންދާ
ސަރުކާރާ އިދިކޮޅު ފަރާތްތަކުގެ މައްސަލަތައް ކޯޓުން ނިމިފައި ހުރީ ސަރުކާރަށް މަގު ފަހިވާ ގޮތަށް
މާލޭގައި ބަޔަކު މީހުން މުޒާހަރާ ކުރުމަށް މަސައްކަތްކުރާއިރު ފުލުހުން އެކަން ހުއްޓުވަނީ:--
ރާއްޖޭ ދައުލަތުގެ ތިން ބާރު ހިނގަމުންދަނީ "މަސްހުނިވެގެން" ކަމަށާއި އިންސާނީ ހައްގުތަކަށް ބޮޑެތި ގޮންޖެހުންތަކެއް އެބަހުރި ކަމަށް މޯލްޑިވްސް ޑިމޮކްރެސީ ނެޓްވޯކް (އެމްޑީއެން)ގެ އެގްޒެކެޓިވް ޑިރެކްޓަރު ޝަހިންދާ އިސްމާއިލް ވިދާޅުވެއްޖެ އެވެ.
ރާއްޖެޓީވީގެ ފަލަ ސުރުހީ ޕްރޮގުރާމްގައި ޝަހިންދާ ވިދާޅުވީ ފާއިތުވި ދެތިން އަހަރު އިންސާނީ ހައްގުތައް ހޯދުމަށް މަސައްކަތް ކުރުމަށް ހުރަސްތަކެއް ކުރިމަތިވެފައިވާކަމަށެވެ.
ރާއްޖޭގެ ބައެއް ގާނޫނުތައް ހަދާފައިވަނީ ގާނޫނު އަސާސީގައި ލިބިދީފައިވާ ބައެއް ހައްގުތައް ގެއްލޭ ގޮތަށްކަން ފާހަގަ ކުރައްވައި، ޝަހިންދާ ވިދާޅުވީ ގާނޫނު އަސާސީގައި އެއްވެ އުޅުމުގެ ހައްގު ލިބިދީފައިވީ ނަމަވެސް އެއްވެ އުޅުމާ ބެހޭ ގާނޫނުގައި އޮތީ އެ ހައްގު ރެގިއުލޭޓް ކުރުމުގެ ބަދަލުގައި އެ ހައްގު ހިފެހެއްޓޭނެ ގޮތަށް ކަމަށެވެ.
އޭނާ ވިދާޅުވީ ދައުލަތުގެ ތިން ބާރުވެސް އޮތީ ސަރުކާރުގެ ކޮންޓްރޯލްގެ ދަށުގައި ކަމަށެވެ.
" ރާއްޖޭގައި މި ވަގުތު މި ފެންނަނީ ޖުޑިޝަރީގައި ވަރަށް ބޮޑު ބާރެއް އޮތްތަން. އެއްބާރު އަނެއް ބާރަށް ބާރުތައް ދޫކުރަމުން އެކި ގޮތް ގޮތަށް ނެގޯޝިއޭޓް ކުރަމުން އަންނަތައް މި ފެންނަނީ. ހަގީގަތުގައި ތިން ބާރު މިނިވަންކަމާއެކު މަސައްކަތްކުރި ތަނެއް އަޅުގަނޑުމެނަކަށް ނުފެނޭ،" ޝަހިންދާ ވިދާޅުވި އެވެ.
ސަރުކާރާ އިދިކޮޅު ފަރާތްތަކުގެ މައްސަލަތައް ސަރުކާރަށް މަގު ފަހިވާ ގޮތަށް ނިމިގެންގޮސްފައިވާ ކަމަށް ފާހަގަ ކުރައްވަމުން ޝަހިންދާ ވިދާޅުވީ މިނިވަންކޮން މަސައްކަތްކުރަން ބޭނުންވާ ފަނޑިޔާރުން ސަސްޕެންޑްކޮށް ނުވަތަ ކޮންމެ ވެސް ގޮތަކުން ވަޒީފާއިން ދުރުކުރާ ކަމަށެވެ.
ސުޕްރީމް ކޯޓުން މައްސަލައެއްގައި ސާފު ނުވާނެހެން ހުކުމެއް ނެރޭނީ ވަރަށް ބައިވަރު މައްސަލަތަކެއް ހުރުމުން ކަމަށް ގަބޫލު ކުރެއްވޭ ކަމަށް ވެސް ޝަހިންދާ ވިދާޅުވި އެވެ.
" އަނެއްކާވެސް މި ފެންނަނީ ސިޔާސީ ގޮތުން ކޮންޓްރޯލް ނުކުރެވޭ ބަޔަކަށް ފުރައްސާކުރުމާއި، އެކި ކަހަލަ ދައުވާ ކުރުމާއި ޖަލަށްލާން މަސައްކަތް ކުރުމާއި ދެން ގޮނޑި ގެއްލޭ މައްސަލަ މި ދިމާވަނީ،" އޭނާ ވިދާޅުވި އެވެ.
ސަރުކާރުން "ޖަރީމާތައް" ހިންގުމަށް އެންމެ ބޮޑަށް ބޭނުންކުރަނީ ފުލުހުން ކަމަށާއި އާންމުންގެ ރުޅިވެރިކަން ފުލުހުންނާމެދު ހުންނަނީ ފުލުހުންގެ އަމަލުތަކުގެ ސަބަބުން ކަމަށްވެސް ޕޮލިސް އިންޓެގްރިޓީ ކޮމިޝަންގެ ރައީސްކަން ވެސް ކުރިން ކުރެއްވި ޝަހިންދާ ވިދާޅުވި އެވެ. އޭނާ ވިދާޅުވީ ފުލުހުން ގާނޫނާއި ގަވައިދާ ހިލާފު އަމުރުތަކަށް ތަބާވާއިރު ފަހުން އެ މައްސަލަތައް ބެލި ފިޔަވަޅު އެޅޭނެ ކަން ދަންނަން ޖެހޭނެ ކަމަށެވެ.
މީގެ އިތުރުން މިނިވަންކޮށް މަސައްކަތްކުރަން އެކުލަވާލާފައިވާ ކޮމިޝަންތަކަށްވެސް އޭނާ ވަނީ ވަރަށް ބޮޑަށް ފާޑު ވިދާޅުވެފަ އެވެ. އެ ނެޝަނަލް އިންޓަގްރިޓީ ކޮމިޝަނާއި އެހެން ކޮމިޝަންތަކުގެ "އަތްތައް ބަނދެވިފައި"ވާ ކަމަށްވެސް އޭނާ ވިދާޅުވި އެވެ.
"އަޅުގަނޑުމެންގެ ޖަމިއްޔާއިންވެސް ހުންނާނެ ބައެއް ކޮމިޝަންތަކަށް މައްސަލަތަކެއް ހުށަހަޅާފައި. އިންސާނީ ހައްގުތައް، އަސާސީ ހައްގުތައް. ހަމަ އެއްވެސް ނަތީޖާއެއް ނުނިކުމޭ އެއަކުންވެސް. އަޅުގަނޑުމެން ބައެއް މުވައްސަސާތަކުގެ މަސައްކަތް މޮނިޓަރ ކުރުމަށް ޓެސްޓް ކުރުމަށްވެސް ބައެއް ކަހަލަ ހަރަކާތް ހިންގަން. އެއަކުންވެސް ހަމަ އެއްގޮތަކަށްވެސް އެ މުވައްސަސާތައް ހިނގަމުންދާތަނެއް އަޅުގަނޑުމެނަކަށް ނުފެނޭ،" ޝަހިންދާ ވިދާޅުވި އެވެ.
ހައްގުތައް ހިފެހެއްޓިފައިހުރި ގައުމުތަކުގައި އެ ހައްގުތައް ލިބިފައިހުރީ ރައްޔިތުން ހުއްޓާނުލާ މަސައްކަތްކޮށްގެންކަން ފާހަގަ ކުރައްވާ އޭނާ ވިދާޅުވީ މީގެ ކުރިންވެސް ރާއްޖެ ބަދަލުވީ ރައްޔިތުން ނިކުމެ މަސައްކަތް ކޮށްގެން ކަމަށެވެ.
ރާއްޖޭގައި ހިނގާ ކަންކަން ބައިނަލް އަގުވާމީ އެކި ޖަމިއްޔާ ޖަމާއަތްތަކުން ބަލައި ސަރުކާރު ޖަވާބުދާރީކުރުވުމަށް މަސައްކަތްކުރާ ކަމަށާއި އެގޮތުން އދ. އިން ބޮޑެތި މަސައްކަތްތަކެއް ކުރާ ކަމަށް އޭނާ ވިދާޅުވި އެވެ.
