އުތުރުގެ އަތޮޅުތަކަށް ރީނދޫ ސަމާލު ނެރެފި
ރީނދޫ ސަމާލު ނެރެފައިވަނީ އޮކްޓޯބަރު 22 ވަނަ ދުވަހުރޭ 18:00 އިން ފެށިގެން 20:30 އާއި ހަމައަށް
ރާއްޖޭގެ ބޮޑު ބަޔަކަށް ދަނީ ވިއްސާރަ ކުރަމުން
ރާއްޖެއަށް މިހާރު ކުރަމުންދާ ވިއްސާރައިގައި އުތުރުގެ އަތޮޅުތަކަށް ރީނދޫ ސަމާލު ނެރެފި އެވެ.
މޫސުމާއި ބެހޭ ގައުމީ އިދާރާއިން ނެރެފައިވާ ރީނދޫ ސަމާލުގައި ބުނެފައިވަނީ އޮކްޓޯބަރު 22 ވަނަ ދުވަހުރޭ 18:00 އިން ފެށިގެން 20:30 އާއި ހަމައަށް މިއެލަރޓް ނެރެފައިވާ ކަމަށެވެ.
އެގޮތުން ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައިޖެހި ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ވަރަށް ގަދަވާނެ ކަމަށް ލަފާކުރެވޭ ކަމަށް މެޓުން ވަނީ ބުނެފައެވެ.
ރާއްޖެ އަށް މިހާރު ކުރަމުން މިދަނީ މޫސުމީ ވިއްސާރަ ކަމަށާއި ކަނޑު ދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް މެޓުން ވަނީ އިލްތިމާސްކޮށްފަ އެވެ.
ރާއްޖެ އަށް ކުރަމުންދާ ވިއްސާރައިގައި، މާލެއިން ފުރައިގެން ކ.އެރިޔަދޫ އަށް ހަތް މީހުންނާ އެކު ދަތުރު ކުރަމުން ދިޔަ "އަލްމާކް ފިޔަ" ލޭންޑިން ކްރާފްޓް ބަންޑުން ޖަހާލި ހާދިސާގައި ގެއްލިގެން ހޯދި ތިން މީހުން ވެސް މަރުވެފައި އޮތްވާ ވަނީ ފެނިފައެވެ. އެއީ ދެ ދިވެހިންނާއި ސްރީލަންކާއަށް ނިސްބަތްވާ މީހެކެވެ.
މީގެ އިތުރުން މާލެއިން ޅ. ނައިފަރަށް ދަތުރު ކުރަމުން ދިޔަ މުދާ އުފުލާ ބޯޓެއްވެސް ވަނީ އަޑިއަށް ގޮސްފައެވެ.
މޫސުމާ ގުޅިގެން ކުރިމަތިވެދާނެ އެކި ހާދިސާތަކަށް ތައްޔާރުވުމުގެ ގޮތުން، ދިވެހި ފުލުހުންގެ ޚިދުމަތުން ވަނީ އެހެނިހެން މުއައްސަސާތަކާ ގުޅިގެން މަސައްކަތްކުރުމުގެ އިންތިޒާމުތައް ވަނީ ހަމަޖައްސާފައެވެ.
ކުއްލި ހާލަތެއް ކުރިމަތިވެ ނުވަތަ ފުލުހުންގެ އެހީތެރިކަން ބޭނުންވެއްޖެނަމަ، 911 އަށް ގުޅުއްވުމަށް ފުލުހުން ވަނީ އެދިފައެވެ.
